ភ្នំពេញៈ ការសិក្សាស្រាវជ្រាវពីឥទ្ធិពលផ្នែកសេដ្ឋកិច្ចសង្គម ពាក់ព័ន្ធនឹងការដាក់ឱ្យប្រើប្រាស់អង្ករមីក្រូសារជាតិសម្រាប់ប្រជាពលរដ្ឋទូទៅនៅកម្ពុជា នឹងចាប់ផ្តើមនៅដើមឆ្នាំក្រោយនេះ ដែលការវិភាគនេះនឹងជួយរដ្ឋាភិបាលក្នុងការពិនិត្យមើលទៅលើអត្ថប្រយោជន៍នៃការវិនិយោគទៅលើអង្ករមីក្រូសារជាតិដែលផលិតក្នុងស្រុក និងវាយតម្លៃទៅលើឥទ្ធិពលរបស់វាក្នុងការកាត់បន្ថយកង្វះមីក្រូសារជាតិរបស់ប្រជាពលរដ្ឋ។
ការសិក្សានេះ ត្រូវបានរៀបចំធ្វើឡើងដោយកម្មវិធីស្បៀងអាហារពិភពលោករបស់អង្គការសហប្រជាជាតិ (WFP) សហការជាមួយនាយកដ្ឋានលើកកម្ពស់អាហារូបត្ថម្ភនៃក្រសួងផែនការ និងវិទ្យាស្ថានពហុបច្ចេកទេសនិងសាកលវិទ្យាល័យរដ្ឋ Virginia (Virginia Tech)។ នេះបើយោងតាមសេចក្តីប្រកាសព័ត៌មានរបស់WFP កាលពីថ្ងៃទី ៣១ ខែតុលា។
សេចក្តីប្រកាសបានលើកឡើងថា ការបញ្ចូលមីក្រូសារជាតិ គឺជាការដាក់បន្ថែមនូវមីក្រូសារជាតិសំខាន់ៗទៅក្នុងចំណីអាហារ ដើម្បីបង្កើនតម្លៃអាហារូបត្ថម្ភរបស់វា ដោយសុវត្ថិភាព និងក្នុងតម្លៃសមស្រប។ នៅកម្ពុជា ការបញ្ចូលមីក្រូសារជាតិក្នុងអំបិល ទឹកត្រី និងទឹកស៊ីអុីវ ជាមួយនឹងជាតិអុីយ៉ូត និង/ឬ ជាតិហ្វូឡាត ត្រូវបានអនុវត្តបានយ៉ាងប្រសើរអស់រយៈពេលជាច្រើនឆ្នាំ ក៏ប៉ុន្តែការបញ្ចូលមីក្រូសារជាតិទៅក្នុងអង្ករ ក្នុងទ្រង់ទ្រាយធំ គឺជារឿងថ្មីនៅឡើយ។
WFP បានបញ្ជាក់ថា ៖ «លទ្ធផលនៃការវិភាគនេះ អាចរួមមានដូចជា កាត់បន្ថយការចំណាយលើការថែទាំសុខភាព សុខភាពនិងអាហារូបត្ថម្ភប្រសើរឡើង សមត្ថភាពរៀនសូត្រប្រសើរឡើង លើកកម្ពស់ផលិតភាពការងារ និងកត្តាផ្សេងទៀតដែលផ្តល់អត្ថប្រយោជន៍ដល់ការអភិវឌ្ឍធនធានមនុស្ស និងសេដ្ឋកិច្ច»។
ទាក់ទងនឹងកម្មវិធីសិក្សាស្រាវជ្រាវនេះ លោក សុខ សូយ៉ុន អនុរដ្ឋលេខាធិការក្រសួងផែនការ និងជាប្រធានអនុគណៈកម្មាធិការជាតិទទួលបន្ទុកការងារបញ្ចូលមីក្រូសារជាតិទៅក្នុងចំណីអាហារ (NSCFF) បានឱ្យដឹងថា វាជាជំហានមួយដ៏សំខាន់ ក្នុងការគាំទ្រនិងឆ្លើយតបទៅនឹងអនុសាសន៍របស់កិច្ចប្រជុំកំពូលស្ដីពីប្រព័ន្ធស្បៀងឆ្នាំ ២០២១។
លោកថ្លែងថា៖ «ការសិក្សានេះគឺជាជំហានដ៏សំខាន់មួយឆ្ពោះទៅមុខដើម្បីគាំទ្ររបៀបវារៈជាតិស្តីពីការបញ្ចូលមីក្រូសារជាតិក្នុងចំណីអាហារ ក៏ដូចជាឆ្លើយតបទៅនឹងអនុសាសន៍របស់កិច្ចប្រជុំកំពូលស្ដីពីប្រព័ន្ធស្បៀងឆ្នាំ២០២១ ពាក់ព័ន្ធនឹងការបញ្ចូលមីក្រូសារជាតិទៅក្នុងស្បៀងអាហារ នៅថ្នាក់ជាតិ»។
កាលពីសប្ដាហ៍មុន WFP និងក្រុមអ្នកសិក្សាស្រាវជ្រាវមកពី Virginia Tech ជួបពិភាក្សាជាមួយតំណាងរដ្ឋាភិបាល វិស័យឯកជន អ្នកប្រើប្រាស់ និងអ្នកផលិត ដើម្បីរួមគ្នាបង្កើតក្របខ័ណ្ឌសម្រាប់ការវិភាគ។
ក្នុងនោះ WFP បានសហការរៀបចំសិក្ខាសាលាមួយជាមួយក្រសួងផែនការនៅថ្ងៃទី២៧ ខែតុលា ដោយបានប្រមូលផ្តុំភាគីពាក់ព័ន្ធសំខាន់ៗរបស់ NSCFF និងភ្នាក់ងារអភិវឌ្ឍន៍ដើម្បីពិភាក្សាអំពីអាទិភាព និងសំណួរគន្លឹះដែលរាជរដ្ឋាភិបាលកម្ពុជាចង់ឱ្យការសិក្សានេះរកដំណោះស្រាយ និងដើម្បីជំរុញរបៀបវារៈជាតិស្ដីពីការបញ្ចូលមីក្រូសារជាតិក្នុងចំណីអាហារ។
តំណាង និងជានាយកប្រចាំប្រទេសនៃកម្មវិធីស្បៀងអាហារពិភពលោកលោកស្រី គ្លែរ កូណាន់ ក៏បានលើកឡើងដែរថា អង្ករមីក្រូសារជាតិផ្តល់នូវឱកាសដ៏សំខាន់មួយក្នុងការលើកកម្ពស់អាហារូបត្ថម្ភរបស់ប្រជាជនងាយរងគ្រោះនៅទូទាំងប្រទេស ដោយប្រសិទ្ធភាព និងក្នុងតម្លៃសមរម្យ។
លោកស្រីបានប្រាប់ថា៖ «អស់រយៈពេលជាង ១ ទសវត្សរ៍មកនេះ WFP គឺជាដៃគូឈានមុខរបស់រដ្ឋាភិបាលពាក់ព័ន្ធនឹងអង្ករមីក្រូសារជាតិ និងបានផ្តល់អង្ករមីក្រូសារជាតិដល់សិស្សសាលារាប់សែននាក់ តាមរយៈកម្មវិធីផ្តល់ស្បៀងអាហារតាមសាលារៀន»។
នាយកប្រចាំប្រទេសនៃកម្មវិធីស្បៀងអាហារពិភពលោក បានបន្ថែមទៀតថា អង្ករមីក្រូសារជាតិបង្កើនតម្លៃអាហារូបត្ថម្ភ ដោយគ្រាន់តែចំណាយបន្ថែមក្នុងកម្រិតអប្បបរមា និងបានដើរតួនាទីក្នុងការលើកកម្ពស់សមត្ថភាពរៀនសូត្រ និងសុខភាពរបស់សិស្ស។
សូមបញ្ជាក់ថា តាមការសិក្សាអំពីផលវិបាកផ្នែកសេដ្ឋកិច្ចដោយសារបញ្ហាអាហារូបត្ថម្ភនៅកម្ពុជា បានរកឃើញថា ការចំណាយទៅលើបញ្ហាកង្វះអាហារូបត្ថម្ភមានបរិមាណពី ២៥០ ទៅ ៤០០ លានដុល្លារ ក្នុង ១ ឆ្នាំ ដែលក្នុងនោះជាង ១៣៤ លានដុល្លារ បានខាតបង់ដោយសារបញ្ហាកង្វះមីក្រូសារជាតិ។
បច្ចុប្បន្ននេះ WFP ក៏កំពុងសហការជាមួយនឹងរាជរដ្ឋាភិបាលកម្ពុជា ដើម្បីស្វែងរកឱកាសក្នុងការនាំយកនូវអង្ករបញ្ចូលមីក្រូសារជាតិទៅកាន់ប្រជាពលរដ្ឋឱ្យបានកាន់តែទូលំទូលាយ ក្នុងភាពជាដៃគូរវាងរដ្ឋាភិបាលនិងវិស័យឯកជន ដើម្បីលើកកម្ពស់សុខភាព និងអាហារូបត្ថម្ភឱ្យបានទូលំទូលាយ និងនិងជំរុញការអភិវឌ្ឍន៍សេដ្ឋកិច្ច។
បើតាម WFP ការសិក្សានេះ នឹងក្លាយជាជំហានដ៏សំខាន់មួយក្នុងការជំរុញរបៀបវារៈនេះនៅថ្នាក់ជាតិ៕