.jpg)
លោករដ្ឋមន្ត្រីកសិកម្ម ឌិត ទីណា និងភាគីពាក់ព័ន្ធនៅក្នុងកិច្ចប្រជុំម្សិលមិញ។ រូប សហការី
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក ឌិត ទីណា បានលើកពីផែនការសកម្មភាពអាទិភាពចំពោះមុខ ក្នុងការជំរុញផលិតកម្ម និងការប្រើប្រាស់ពូជស្រូវដែលមានគុណភាពល្អ ក្នុងបរិមាណទាបតែផ្តល់ទិន្នផលខ្ពស់ មានអត្រាដាំដុះ លឿន ធន់នឹងជំងឺ និងសត្វល្អិត ស្រូវទុំស្រុះគ្នាហើយពូជស្រូវល្អអង្ករសុទ្ធ និងការជំរុញឱ្យស្រូវអង្ករមានតម្លៃខ្ពស់នៅលើទីផ្សារ។
ការលើកឡើងរបស់លោក ឌិត ទីណា បែបនេះធ្វើឡើងនៅពេលជួបប្រជុំពិគ្រោះយោបល់ ស្តីពីការងារផលិតកម្មពូជស្រូវ និងការនាំចេញអង្ករជាមួយតំណាងមកពីសហព័ន្ធស្រូវអង្ករកម្ពុជា នាព្រឹកថ្ងៃទី ៣១ ខែតុលា ឆ្នាំ ២០២២ នេះនៅទីស្តីការក្រសួងកសិកម្ម។ កិច្ចប្រជុំនេះមានការចូលរួមពីមន្ត្រីជំនាញពាក់ព័ន្ធនៃក្រសួងកសិកម្មព្រមទាំងប្រធានមន្ទីរកសិកម្មនៅតាមបណ្តាខេត្ត និងសមាជិក សមាជិកានៃសហព័ន្ធស្រូវអង្ករកម្ពុជា ដឹកនាំដោយលោក ហ៊ុន ឡាក់ ប្រធានក្រុមប្រឹក្សាភិបាលនៃសហព័ន្ធស្រូវ អង្ករកម្ពុជា និងជាអគ្គនាយកនៃក្រុមហ៊ុន Mekong Oryza Trading Co., Ltd។
លោក ឌិត ទីណា លើកឡើងថា៖ «ពូជស្រូវដែលមានគុណភាពល្អក្នុងបរិមាណទាបតែផ្តល់ទិន្នផលខ្ពស់ មានអត្រាដាំដុះគ្រាប់ក្នុងស្រែខ្ពស់លឿន មានកម្លាំងខ្លាំង ធន់ជំងឺ និងសត្វល្អិត ដំណាំស្រូវទុំស្រុះគ្នាល្អ និងមានអត្រាលាយគ្រាប់ពូជផ្សេង និងគ្រាប់ខ្មៅចង្រៃទាបនឹងរួមចំណែកឱ្យស្រូវអង្ករមានតម្លៃខ្ពស់នៅលើទីផ្សារ»។
ជាមួយគ្នានេះ លោក ហ៊ុន ឡាក់ បានសម្តែងការគាំទ្រចំពោះគំនិតផ្តួចផ្តើមរបស់លោករដ្ឋមន្ត្រីក្រសួងកសិកម្ម ក្នុងការផលិតពូជស្រូវសុទ្ធ ដើម្បីផ្គត់ផ្គង់នៅលើទីផ្សារសម្រាប់កសិករ។ លោកលើកឡើងថា៖ «ការប្រើប្រាស់ពូជស្រវសុទ្ធនឹងអាចធានាបាននូវភាពសុទ្ធនៃគ្រាប់អង្ករ សម្រាប់ការដាក់លក់លើទីផ្សារ ទាំងទីផ្សារក្នុងស្រុក និងទីផ្សារបរទេស»។
ចំពោះផែនការផលិតពូជស្រូវសុទ្ធនេះ លោករដ្ឋមន្ត្រី ឌិត ទីណា បានលើកទឹកចិត្តឱ្យមានការចូលរួមពីគ្រប់ភាគីពាក់ព័ន្ធទាំងអស់ ជាពិសេសវិស័យឯកជន ដើម្បីធានាថា ពូជស្រូវសុទ្ធដែលប្រជាកសិករផលិតបាននឹងមានទីផ្សារទទួលទិញយកទៅដាំដុះបន្ត។ ចំណែកការនាំចេញអង្ករទៅកាន់ទីផ្សារបរទេសវិញ លោក ឌិត ទីណា បានស្នើឱ្យភាគីពាក់ព័ន្ធសិក្សាអំពីប្រភេទអង្ករដែលជាតម្រូវការនៅលើទីផ្សារអន្តរជាតិ ហើយជំរុញការផលិតស្របទៅតាមតម្រូវការទីផ្សារ។
ចំពោះការងារនេះលោក ហ៊ុន ឡាក់ បានស្នើដល់លោករដ្ឋមន្ត្រីជួយសម្រួលខ្សែចង្វាក់ផលិតកម្ម ដើម្បីកាត់បន្ថយចំណាយ និងបង្កើនប្រាក់ចំណេញដល់កសិករ ក៏ដូចជាជំរុញការនាំចេញទៅកាន់ទីផ្សារដែលមានសក្តានុពលថ្មីៗ បន្ថែមទៀត។ តាមរបាយការណ៍របស់សហព័ន្ធស្រូវអង្ករកម្ពុជា ការនាំចេញស្រូវ និងអង្ករកម្ពុជាក្នុងរយៈពេល ៩ ខែ ឆ្នាំ ២០២២ នេះបានទឹកប្រាក់សរុបចំនួនប្រមាណ ៨៥០,៤៤ លានដុល្លារសហរដ្ឋអាមេរិក។ សហព័ន្ធស្រូវអង្ករកម្ពុជាបញ្ជាក់ថា ក្នុងរយៈពេល ៩ ខែ នៃឆ្នាំ ២០២២ នេះ ប្រទេសកម្ពុជាបាននាំចេញអង្ករគ្រប់ប្រភេទបានចំនួន ៤៤៩ ៣២៥ តោន ទៅកាន់គោលដៅចំនួន ៥៥ ដែលក្នុងនោះប្រទេសចំនួន ៩ បានគ្របដណ្តប់លើទីផ្សារនាំចេញអង្ករកម្ពុជាជាង ៨២% ដែលរួមមានសាធារណរដ្ឋប្រជាមានិតចិន ៤៤,០៩% ប្រទេសបារាំង ១៤,៨៣% ប្រទេសម៉ាឡេស៊ី ៥,៥៨% ប្រទេសហូឡង់ ៤,៦៥% ប្រទេសអ៊ីតាលី ២,៦៥% ប្រទេសហ្គាបុង ២,៦៣% ប្រទេសប្រ៊ុយណេ ២,៤៤% ចក្រភពអង់គ្លេស ២,៤៥% និងប្រទេសអាល្លឺម៉ង់ ២,០៨%។
ប្រភពដដែលបានឱ្យដឹងទៀតថា ប្រភេទអង្ករក្រអូបប្រណីតមានចំនួន ៣៩% ឬ ១៧៧ ៤៨១ តោន អង្ករសែនក្រអូបចំនួនជិត ២៩% ឬ ១២៨ ៧៥៣ តោន អង្ករសគ្រាប់វែងចំនួនជិត ២៨% ឬ ១២៣ ៣១៨ តោន អង្ករចំហុយ ជាង ២% ឬ ១០ ៦៨០ តោន អង្ករសរីរាង្គចំនួនជិត ២% ឬ ៨ ១០៦ តោន។ ចំណែកស្រូវបានចំនួន ២ ៣៥៧ ៦៧៤ តោនដែលមានតម្លៃប៉ាន់ស្មានប្រមាណចំនួនជា ៥៦៣,៥៤ លាន ដុល្លារសហរដ្ឋអាមេរិកត្រូវបាននាំចេញទៅប្រទេសវៀតណាមក្នុងរយៈពេល ៩ ខែនៃឆ្នាំ ២០២២៕
វីដេអូ៖
