ភ្នំពេញៈ ​ទិវា​ជាតិ​អាហារូបត្ថម្ភ​ត្រូវបាន​ប្រារព្ធ​ឡើងជា​រៀងរាល់ឆ្នាំ នា​ថ្ងៃទី​ ៦ ខែវិច្ឆិកា ក្នុង​គោលបំណង​ផ្សព្វផ្សាយ​អប់រំ និង​លើកកម្ពស់​ការយល់ដឹង​ជា​សាធារណៈ ឱ្យបាន​ទូលំទូលាយ​នៅ​ទូទាំងប្រទេស ពី​សារៈសំខាន់​នៃ​វិស័យ​សន្តិសុខ​ស្បៀង​និង​អាហារូបត្ថម្ភ ក្នុងការ​ចូលរួមចំណែក​អភិវឌ្ឍ មូលធន​មនុស្ស បង្កើន​ប្រសិទ្ធភាព​ការងារ ជំរុញ​កំណើនសេដ្ឋកិច្ច និង​វឌ្ឍនភាព​សង្គម​។​

សម្រាប់​ទិវា​ជាតិ​អាហារូបត្ថម្ភ លើក​ទី​៩ ឆ្នាំ​ ២០២២ ​នេះ ត្រូវបាន​ធ្វើឡើង​ក្រោម​ប្រធានបទ «​ម្ហូបអាហារ​កាន់តែ​មាន​សុវត្ថិភាព សុខភាព​កាន់តែ​ល្អប្រសើរ​»​។​

លោកនាយក​រដ្ឋមន្ត្រី ហ៊ុន សែន បានលើកឡើង​តាមរយៈ​សារលិខិត​នៅ​ថ្ងៃទី​ ១ ខែវិច្ឆិកា​ថា សុវត្ថិភាព​ម្ហូបអាហារ គឺជា​កិច្ចការ​[​យើង​]​ទាំងអស់គ្នា ហើយ​ម្ហូបអាហារ​មាន​សុវត្ថិភាព មាន​សារៈសំខាន់ ខ្លាំងណាស់​ចំពោះ​សុខភាព ជីវភាព​រស់នៅ និង​សុខុមាលភាព​របស់​មនុស្ស​គ្រប់រូប​។

លោក​ថា ការលើកកម្ពស់​សុវត្ថិ​ភាពម្ហូបអាហារ គឺជា​កត្តា​សំខាន់​សម្រាប់​ចីរភាព​ប្រព័ន្ធ​ស្បៀង ការអភិវឌ្ឍ​មូលធន​មនុស្ស និង​ជា​តម្រូវការ ចាំបាច់​ដើម្បី​ឈានទៅ​សម្រេចបាន​នូវ​គោលដៅ​អភិវឌ្ឍ​ន៍ប្រកបដោយ​ចីរភាព​ឆ្នាំ​ ២០៣០ ។​

លោក ហ៊ុន សែន បានឱ្យដឹងថា ៖ «​យុទ្ធនាការ​លើកកម្ពស់​សុវត្ថិភាព​ម្ហូបអាហារ នឹងត្រូវ​រៀបចំ​ធ្វើឡើង​នៅ​ទូទាំងប្រទេស ដោយ​ផ្តោតលើ​សកម្មភាព​ជាច្រើន ដូចជា ការលើកកម្ពស់​ការយ​ល់​ដឹង​ជា​សាធារណៈ ការពង្រឹង សមត្ថភាព​បច្ចេកទេស ការរៀបចំ​គោលការណ៍​ណែនាំ បទ​ប្បញ្ញត្តិ​បច្ចេកទេស​និង​ស្តង់ដា និង​ការពង្រឹង ការអនុវត្ត​គោលនយោបាយ ច្បាប់ និង​លិខិតបទដ្ឋាន​គតិយុត្ត​នានា ប្រកបដោយ​បរិ​យា​ប័ន្ន តម្លាភាព ប្រសិទ្ធភាព និង​ការទទួលខុសត្រូវ​»​។​

យោងតាម​លទ្ធផល​នៃ​អង្កេត​ប្រជាសាស្ត្រ​និង​សុខភាព​កម្ពុជា ឆ្នាំ​ ២០២១-២០២២ បាន​បង្ហាញថា​ អត្រា​ក្រិស​ក្រិន​របស់​កុមារ​អាយុ​ក្រោម ៥​ឆ្នាំ បាន​ធ្លាក់ចុះ​ពី ៣២% មក​ត្រឹម​ ២២% ហើយ​អត្រា​មិន​គ្រប់​ទម្ងន់​របស់​កុមារ​អាយុ​ក្រោម ៥ ​ឆ្នាំ បាន​ធ្លាក់ចុះ​ពី​ ២៤% មក ត្រឹម ១៦%​ ប៉ុន្តែ​អត្រា​ស្គមស្គាំង កុមារ​អាយុ​ក្រោម ៥ ​ឆ្នាំ ហាក់​នៅ​ដដែល​គឺ ៩,៨% ចាប់ពី​ឆ្នាំ​ ២០១៤ ដល់ ឆ្នាំ​ ២០២១​។

ឈរលើ​ស្មារតី​នេះ ដើម្បី​បង្កើន​វឌ្ឍនភាព​ស្តីពី​ការលើកកម្ពស់​សុវត្ថិភាព​ម្ហូបអាហារ សន្តិសុខ​ស្បៀង និង​អាហារូបត្ថម្ភ​ឱ្យមាន​ការរីកចម្រើន​ជា​ប្រព័ន្ធ លោក ហ៊ុន សែន​បានផ្តល់​អនុសាសន៍ ដល់​គ្រប់​ក្រសួង ស្ថាប័ន​ពាក់ព័ន្ធ ត្រូវ​បន្ត​ពិនិត្យ​រៀបចំ​លិខិតបទដ្ឋាន​គតិយុត្ត​នានា​ដែល​ពាក់ព័ន្ធ​នឹង​វិធាន​អនាម័យ សុវត្ថិភាព គុណភាព និង​ភាពសមស្រប​នៃ​ម្ហូបអាហារ​។​

លោក​ថា៖ «​ក្នុងនោះ រួមទាំង​ម្ហូបអាហារ​ដាក់លក់​តាមដងផ្លូវ និង​តាម​គ្រឹះស្ថានសិក្សា ដើម្បី​គាំទ្រ​ដល់​ការអនុវត្ត​ច្បាប់​ស្តីពី​សុវត្ថិភាព​ម្ហូបអាហារ និង​ពង្រឹង​ការ អនុវត្ត​ច្បាប់​នេះ ដោយ​ត្រូវមាន​ការពិគ្រោះ​យោបល់​ឱ្យបាន​ទូលំទូលាយ​ជាមួយនឹង​វិស័យ​ឯកជន និង​ដៃគូ​អភិវឌ្ឍ​ន៍»​។​

លោក​បាន​បន្តថា គ្រប់​ក្រសួង ស្ថាប័ន​ពាក់ព័ន្ធ​នឹង​គុណភាព សុវត្ថិភាព​ម្ហូបអាហារ ចាប់ពី​កសិដ្ឋាន​ទៅដល់ កន្លែង​បរិភោគ ត្រូវ​សហការ​និង​ផ្តល់ព័ត៌មាន​ដល់​គ្នា ដើម្បី​ជួយ​សម្រួល​ដល់​ការធ្វើផែនការ​និង​រៀបចំ​កម្មវិធី ជាតិ​សម្រាប់​ការអនុវត្ត និង​ការវិភាគ ដើម្បី​គ្រប់គ្រង​ហានិភ័យ​ដែល​អាច​កើតមាន​។​

ជាមួយគ្នានេះដែរ លោកនាយក​រដ្ឋមន្ត្រី ហ៊ុន សែន ក៏បាន​ណែនាំ​ដល់​គ្រប់​ក្រសួង ស្ថាប័ន រដ្ឋបាល​ថ្នាក់ក្រោម​ជាតិ ដៃគូ​អភិវឌ្ឍន៍ សង្គម​ស៊ីវិល វិស័យ​ឯកជន និង​សហគមន៍​ត្រូវ​ចូលរួម​បំផុសស្មារតី​គាំទ្រ​ការអនុវត្ត​ការ​បំបៅកូន​ដោយ​ទឹកដោះ​ម្តាយ​តែ ១ មុខ​គត់​ក្នុងអំឡុង ៦ ​ខែ​ដំបូង និង​ការបន្ត​បំបៅកូន​ដោយ​ទឹកដោះ​ម្តាយ​ឱ្យបាន​រហូតដល់​កុមារ​អាយុ​យ៉ាងតិច​បំផុត ​២ ​ឆ្នាំ​។​

ក្នុង​ទិវា​ជាតិ​អាហារូបត្ថម្ភ​នេះដែរ លោក ហ៊ុន សែន ក៏បាន​អំពាវនាវ​ដល់​ប្រជាពលរដ្ឋ​គ្រប់រូប ម្ចាស់​សិប្បកម្ម ភោជនីយដ្ឋាន គ្រឹះស្ថានសិក្សា និង​រមណីយដ្ឋាន​ទេសចរណ៍ និង​អ្នកលក់​ម្ហូប​តាម​ដងផ្លូវ ត្រូវ​ចូលរួម​ក្នុងការ​លើកកម្ពស់​សុវត្ថិ​ភាព​អាហារ ក្នុង​ការផលិត កែច្នៃ រក្សាទុក និង​ចែកចាយ​ទាំង​ម្ហូបអាហារ ស្រស់​និង​ឆ្អិន​ស្រាប់​ឱ្យមាន​អនាម័យ​ល្អ សុវត្ថិភាព និង​គុណភាព ស្របតាម​ស្តង់ដា​បច្ចេកទេស និង​លក្ខខណ្ឌ​តម្រូវ​ស្តីពី​អនាម័យ​និង​សុវត្ថិភាព​ម្ហូបអាហារ​។​

កាលពី​ថ្ងៃទី​ ២៧ ខែតុលា កន្លងទៅនេះ ក្រសួងសុខាភិបាល និង​មជ្ឈមណ្ឌល​ជាតិ​គាំពារ​មាតា និង​ទារក បានរួម​គ្នា​ប្រកាស​ដាក់ឱ្យអនុវត្ត​គោលការណ៍​ណែនាំ​អន្តរកាល ស្តីពី​ការតាមដាន និង​លើកកម្ពស់​ការលូតលាស់​របស់​កុមារ​អាយុ​ក្រោម ៥ ឆ្នាំ​ជា​លើកដំបូង​នៅ​កម្ពុជា ដែល​គោលការណ៍​នេះ នឹង​ផ្តល់​ប្រសិទ្ធភាព​ក្នុងការ​តាមដាន​ការលូតលាស់ និង​ការអភិវឌ្ឍ​របស់​កុមារ​។​

​នាយករង​មជ្ឈមណ្ឌល​ជាតិ​គាំពារ​មាតា និង​ទារក លោក កែវ មួយ​ស្រូ​យ បាន​ប្រាប់​ឱ្យដឹងថា នេះ​គឺជា​លើក​ទី​១ ហើយ​ដែល​ក្រសួងសុខាភិបាល តាមរយៈ​កម្មវិធី​ជាតិ​អាហារូបត្ថម្ភ បានធ្វើការ​ផ្សព្វផ្សាយ និង​ដាក់ឱ្យ​ប្រើប្រាស់​គោលការណ៍​ណែនាំ​អន្តរកាល​ស្តីពី​ការតាមដាន និង​លើកកម្ពស់​ការលូតលាស់​របស់​កុមារ​អាយុ​ក្រោម ៥ ឆ្នាំ​។​

លោក​បន្ថែមថា រយៈពេល ៥ ឆ្នាំ​ដំបូង​នៃ​ជីវិត គឺ​សំខាន់​សម្រាប់​ការលូតលាស់ និង​អភិវឌ្ឍ​របស់​កុមារ ជាពិសេស​ក្នុងអំឡុងពេល ១ ០០០ ថ្ងៃ​ដំបូង (​ចាប់តាំងពី​នៅក្នុង​ផ្ទៃ​ម្តាយ​រហូតដល់​កុមារ​អាយុ ២ ឆ្នាំ​)​។ កុមារ​ជា​តំណាងឱ្យ​ការអភិវឌ្ឍ សេដ្ឋកិច្ច និង​សង្គម​នៅពេល​អនាគត​របស់​ក​ម្ពុ​ជា ដូចនេះ​ត្រូវ​ធានា​ឱ្យបាន​នូវ​សុខភាព និង​អាហារូបត្ថម្ភ​របស់​ពួកគេ​»​។

​អគ្គរដ្ឋទូត​សាធារណរដ្ឋ​សហព័ន្ធ​អាល្លឺម៉ង់​ប្រចាំ​កម្ពុជា​លោក Stefan Messerer​ បាន​ថ្លែង​ដោយក្ដីសង្ឃឹម​ថា ​ក្រោយ​ឆ្នាំ ២០៣០ បន្ទាប់ពី​កម្ពុជា​ឈានទៅដល់​គោលដៅ SDGs នោះ​អាហារូបត្ថម្ភ នឹង​នៅតែ​ជា​សសរស្តម្ភ​សំខាន់​សម្រាប់​គ្រប់គ្រង​សង្គម ដែល​ប្រទេស​កម្ពុជា ក្នុង​ពេលនេះ កំពុង​ប្រឈមមុខ​ទៅនឹង​កង្វះ​អាហារូបត្ថម្ភ​ស្រាប់​។​

ស្រប​ពេលដែល​បញ្ហា​ប្រឈម និង​និន្នាការ​កង្វះ​អាហារូបត្ថម្ភ​នៅតែ​បន្ត​កើតមាន ជាពិសេស​ក្នុងចំណោម​កុមារ លោក Stefan Messerer​បាន​ថ្លែងដោយចាត់ទុកថា គំនិត​នៃ​បញ្ហា​ប្រឈម​នេះ អាច​នឹងមាន​ការផ្លាស់​ប្តូរ ដើម្បី​ធានាបាន​នូវ​របប​អាហារ​គ្រប់គ្រាន់ ចម្រុះ និង​មាន​សុខ​ភាពល្អ​សម្រាប់​ទាំងអស់គ្នា​៕