ភ្នំពេញៈ លោកនាយករដ្ឋមន្ត្រី ហ៊ុន សែន បានឆ្លើយតបទៅនឹងអ្នករិះគន់មួយចំនួនដែលបញ្ចេញមតិមិនពេញចិត្ត និងរិះគន់រដ្ឋាភិបាលលើការតែងតាំងលោក ឌិត ទីណា ដែលជាវិស្វកររ៉ែ ឱ្យកាន់តួនាទីជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលពុំធ្លាប់បម្រើការក្នុងវិស័យនេះពីមុនមក។
នាពិធីប្រគល់សញ្ញាបត្រជូនដល់និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) នៅព្រឹកថ្ងៃទី ១ វិច្ឆិកា លោកនាយករដ្ឋមន្ត្រីបានឆ្លៀតរំលេចនូវទស្សនៈពាក់ព័ន្ធទៅនឹងមតិរិះគន់កន្លងមកចំពោះការសម្រេចចិត្តរបស់រដ្ឋាភិបាល ក្នុងការតែងតាំងលោក ឌិត ទីណា ឱ្យកាន់តំណែងជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលលោកចាត់ទុកថា ជាមតិរិះគន់របស់អ្នកខ្វះការចេះដឹង។
លោក ហ៊ុន សែន ថ្លែងក្នុងអង្គពិធីដូច្នេះថា៖ «អ្នកខ្លះ បានលើកជាមតិថា មន្ត្រីកសិកម្មមួយគរគោកមិនយកទៅធ្វើរដ្ឋមន្ត្រីកសិកម្មទេ យកវិស្វកររ៉ែឯណា ទៅធ្វើរដ្ឋមន្ត្រីកសិកម្ម។ ជាការល្អហើយរដ្ឋមន្ត្រីកសិកម្ម គាត់បង្រៀនត្រឡប់ទៅវិញ អ្នកឯងចេះកសិកម្ម ចេះអស់នៅ? ស្អីខ្លះកសិកម្មនោះ? និយាយឱ្យវាច្បាស់ ថ្ងៃក្រោយប្រយ័ត្នក្មេងប្រដៅ»។
លោកបន្តថា វិស័យកសិកម្មមានភាពទូលំទូលាយណាស់ ដែលមិនរាប់ត្រឹមការធ្វើស្រែចម្ការ ដាំដុះតែមួយមុខនោះឡើយ ដែលវាមានវិសាលភាពទូលាយ។ លោកបានចោទសួរថា៖ «ជនដែលរិះគន់ការតែងតាំងនេះបានយល់ដឹងពីកសិកម្មអស់ហើយនៅ?» ដោយលោកចាត់ទុកអ្នករិះគន់ចំពោះបញ្ហានេះ ថា ជាជនខ្វះការយល់ដឹង ចំពោះនិយមន័យពិតប្រាកដភាពជាអ្នកដឹកនាំ។
លោក ហ៊ុន សែន បញ្ជាក់ថា ក្នុងនាមលោកជានាយករដ្ឋមន្ត្រី លោកក៏មិនអាចចេះដឹងសព្វយ៉ាងលើវិស័យទាំងអស់ក្នុងប្រទេសផងដែរ ប៉ុន្តែភាពចាំបាច់ដែលអ្នកដឹកនាំត្រូវមាន គឺចេះប្រើមន្ត្រីក្រោមឱវាទរបស់ខ្លួនតែប៉ុណ្ណោះ។ «ភាពជាអ្នកដឹកនាំ អ្វីដែលសំខាន់ គឺចេះប្រើប្រាស់មន្ត្រី ដែលនៅក្រោមការគ្រប់គ្រងរបស់ខ្លួនឱ្យធ្វើការ។ បញ្ហាវានៅត្រង់ហ្នឹង។ ខ្ញុំមិនប្រដៅ ចំពោះអ្នកវិភាគ ឬអ្នកលើកឡើងនោះទេ។ ក៏ប៉ុន្តែខ្ញុំគួរតែរំឭកថា កុំវាយតម្លៃរហ័សពេក ហើយក៏កុំគិតថា វាទាល់តែជំនាញកសិកម្ម ទើបសមរម្យ»។
ជុំវិញករណីនេះ លោក ហេង គឹមហុង ប្រធានកម្មវិធីផ្នែកស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា (CYN) យល់ស្របចំពោះការលើកឡើងរបស់លោក ហ៊ុន សែន ចំពោះការតែងតាំងរដ្ឋមន្ត្រីកសិកម្មដែលលោកថា មិនចាំបាច់ទាល់តែមានជំនាញខាងវិស័យដែលខ្លួនត្រូវកាន់កាប់នោះឡើយ។ ប៉ុន្តែថ្នាក់ដឹកនាំរបស់ក្រសួង ឬមន្ទីរនីមួយៗក៏ចាំបាច់មានចំណេះដឹង និងជំនាញប្រហាក់ប្រហែលផងដែរ និងជាពិសេសគុណតម្លៃនៃភាពជាអ្នកដឹកនាំ។
លោកសង្កត់ធ្ងន់លើករណីតែងតាំងលោក ឌិត ទីណា ថា៖ «ខ្ញុំនៅតែសង្កត់ធ្ងន់លើកត្តាភាពជាអ្នកដឹកនាំ ថាតើបុគ្គលនោះ មានភាពជាអ្នកដឹកនាំ ហើយសមត្ថភាព និងការបំពេញមុខងារកន្លងមករបស់លោក ឌិត ទីណា បានបំពេញមុខងារយ៉ាងល្អប្រសើរហើយឬនៅ? ហើយការដឹកនាំស្ថាប័ន និងអង្គភាពកន្លងមកហ្នឹង ថាតើមានប្រសិទ្ធភាពការងារហ្នឹងយ៉ាងដូចម្តេច ដើម្បីឈានទៅរកតួនាទីជារដ្ឋមន្ត្រីដែលជាតួនាទីដ៏សំខាន់»។
ជាមួយគ្នានេះដែរ លោក អ៊ូ ច័ន្ទរ័ត្ន សហស្ថាបនិកគណបក្សកែទម្រង់កម្ពុជា ដែលជាអតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ យល់ស្របលើទស្សនៈរបស់លោក ហ៊ុន សែន។ ប៉ុន្តែលោកថា គេក៏មិនអាចយកអ្នកជំនាញដាច់ឆ្ងាយឱ្យទៅធ្វើថ្នាក់ដឹកនាំនោះបានដែរ។
កាលពីថ្ងៃទី ១៧ ខែតុលានៅក្នុងសន្និសីទសារព័ត៌មាននៅទីស្តីការក្រសួងកសិកម្មលោក ឌិត ទីណា បានលើកឡើងថា ផលប្រយោជន៍របស់ប្រជាពលរដ្ឋខ្មែរ គឺជាអាទិភាពនៃការចូលមកកាន់ការងារថ្មីរបស់លោក។ លោកថា បើទោះបីជាលោកមិនទាន់មានបទពិសោធក្នុងវិស័យកសិកម្មក្តី តែលោកជាអតីតមន្ត្រីជាន់ខ្ពស់នៅក្រសួងចំនួន ២ រួចទៅហើយ គឺក្រសួងរ៉ែ និងថាមពល និងក្រសួងពាណិជ្ជកម្ម។ លោកបានប្តេជ្ញាថា៖ «ខ្ញុំនឹងជួយជ្រោមជ្រែងកសិករ និងវិស័យកសិកម្មកម្ពុជាឱ្យមានភាពរីកចម្រើនលើកិច្ចការសំខាន់ៗមួយចំនួន ដែលរួមមានការស្វែងយល់ពីទីផ្សារកសិកម្ម និងតម្រូវការសម្រាប់ផលិតផលកសិកម្មជាដើម»។
លោក អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ ដែលជាអតីតមន្ត្រីបម្រើការងារនៅក្រសួងរ៉ែជាមួយលោក ឌិត ទីណា បានលើកឡើងថា លោក ឌិត ទីណា មានសមត្ថភាពក្នុងការដឹកនាំក្រសួងកសិកម្ម។ ការអះអាងយ៉ាងដូច្នេះ ដោយលោកមើលឃើញថា លោកឌិ ត ទីណា ជាថ្នាក់ដឹកនាំមួយរូបដែលមានការទទួលខុសត្រូវខ្ពស់ ដោយគិតពីផលប្រយោជន៍រួម និងជាតិជាធំ។
លោកបន្តថា៖ «លោកមានភាពម៉ឺងម៉ាត់ ហ្មត់ចត់ តែទន់ភ្លន់នៅលើគ្រប់កិច្ចការ។ ក្នុងរយៈពេលដែលលោកបំពេញការងារជារដ្ឋលេខាធិការនៅក្រសួងរ៉ែ និងថាមពល លោកតែងតែគោរពនូវគំនិតយោបល់អ្នកបច្ចេកទេសដោយមិនធ្វើការរំលោភបំពានអំណាចនោះទេ។ លោកបំពេញការងារជាអ្នកនយោបាយ និងលើកយោបល់ជាអ្នកនយោបាយ ដោយទុកឱ្យមានការទទួលខុសត្រូវតាមផ្នែកនីមួយៗធ្វើការងាររបស់ខ្លួនដោយការទទួលខុសត្រូវខ្ពស់»។
បន្ថែមជាមួយនោះ លោក អ៊ឹង ឌីប៉ូឡា អះអាងទៀតថា លោក ឌិត ទីណា ជាថ្នាក់ដឹកនាំ ១ រូបដែលតែងតែខិតខំប្រឹងប្រែង ពុះពារគ្រប់ឧបសគ្គ ដើម្បីបណ្តុះបណ្តាល ណែនាំ ជំរុញ និងផ្តល់ឱកាសដល់គ្រប់មន្ត្រីក្រោមឱវាទ ជាពិសេសយុវជន។ ដូច្នេះលោកមើលឃើញថា៖ «បើយើងមើលលើលក្ខណៈបុគ្គលរបស់គាត់ គាត់ជាមនុស្សសាមញ្ញ ស្មោះត្រង់ រួសរាយរាក់ទាក់ និងយកអាសាអ្នកដទៃ។ គាត់ពិតជាថ្នាក់ដឹកនាំយុវជនគំរូ ១ រូប»។
ចំណែកលោក យស មុនីរ៉ាត់ អតីតអ្នកនាំពាក្យក្រសួងរ៉ែ ដែលធ្លាប់មានបទពិសោធបម្រើការងារជាមួយលោក ឌិត ទីណា លើកឡើងថា លោក ឌិត ទីណា គឺជាថ្នាក់ដឹកនាំដែលមានសក្តានុពលមានគំនិតផ្តួចផ្តើម និងមានការប្តេជ្ញាចិត្តខ្ពស់។ លោកមានសមត្ថភាពធ្វើការជាក្រុម ដោយមិនប្រកាន់ឋាន: និងតួនាទីដោយលោកគឺជាថ្នាក់ដឹកនាំដែលហ៊ានធ្វើគឺហ៊ានទទួលខុសត្រូវ។ ជាងនេះទៀតលោកអះអាងថា ចំពោះបុគ្គលិកលក្ខណៈរដ្ឋមន្ត្រីកសិកម្មបច្ចុប្បន្ន គឺស័ក្តិសមជាអ្នកដឹកនាំវ័យក្មេងតាមទំនោរពិភពលោកនាពេលបច្ចុប្បន្ននេះហើយ ព្រោះលោក ឌិត ទីណា មានកម្រិតវប្បធម៌ អតីតភាពបទពិសោធ និងស្នាដៃការងារសមល្មមគ្រប់គ្រាន់។
លោកថា៖ «គ្មានសាកលវិទ្យាល័យណាផលិតធនធានមនុស្សសម្រាប់ធ្វើរដ្ឋមន្ត្រី ឬនាយករដ្ឋមន្ត្រីទេ ព្រោះពួកគាត់ជាអ្នកនយោបាយ ហើយអ្នកនយោបាយឱ្យតែមានភាពជាអ្នកដឹកនាំសុទ្ធតែអាចតែងតាំងជារដ្ឋមន្ត្រី ឬរដ្ឋលេខាធិការបានហើយ។ ដូច្នេះគាត់គ្រាន់តែជាអ្នកតម្រង់គោលនយោបាយសម្រាប់អគ្គនាយកដ្ឋានជំនាញនីមួយៗរបស់ក្រសួង គឺក្រសួងនោះដំណើរការរលូនហើយ»។
យ៉ាងណាក្តីចំពោះសំណួរទាក់ទងនឹងការដឹកនាំរបស់លោក ឌិត ទីណា លោក យស មុនីរ៉ាត់ ឱ្យធ្វើការតាមដាន និងរង់ចាំមើលលទ្ធផលនៅពេលក្រោយបន្ទាប់ពីលោក ឌិត ទីណា ដឹកនាំការងារនៅក្រសួងកសិកម្មមួយរយៈសិន នោះចម្លើយនឹងមានច្បាស់ជាមិនខាន។
លោក ឌិត ទីណា ជាបញ្ញវន្តទទួលបានការសិក្សាទាំងនៅកម្ពុជា និងនៅប្រទេសបារាំង។ លោកបានបញ្ចប់ការសិក្សាកម្រិតបរិញ្ញាបត្រ និងបរិញ្ញាបត្រជាន់ខ្ពស់ ផ្នែករូបវិទ្យានៅសាកលវិទ្យាល័យ Orsay ប្រទេសបារាំង និងទទួលបានសញ្ញាបត្រវិស្វកររ៉ែពីសាលាជាតិរ៉ែ ទីក្រុងប៉ារីស នៅឆ្នាំ ២០០២ មុននឹងត្រឡប់មកបម្រើការងារនៅកម្ពុជា៕