ភ្នំពេញៈ រយៈពេល ១ ខែ នៃការបើកឱ្យប្រើប្រាស់សាកល្បងដោយឥតគិតថ្លៃលើផ្លូវល្បឿនលឿនភ្នំពេញ-ក្រុងព្រះសីហនុ មានយានយន្តជិត ៤៤ ម៉ឺនគ្រឿង បានធ្វើចរាចរណ៍លើផ្លវូនេះ ក្នុងនោះករណីគ្រោះថ្នាក់មានចំនួន ១៩ ករណីប៉ុណ្ណោះ ខណៈការប្រឹក្សាយោបល់ សាកសួរព័ត៌មាន និងស្វែងរកជំនួយសង្គ្រោះមានជាង ១ ២០០ លើក។
ផ្លូវល្បឿនលឿនភ្នំពេញ-ក្រុងព្រះសីហនុ ត្រូវបានបើកដំណើរការដោយគិតថ្លៃសេវាធ្វើដំណើរចាប់ថ្ងៃទី ១ ខែវិច្ឆិកាតទៅ ហើយក្នុងរយៈពេល ១ ឆ្នាំដំបូងនៃការបើកឱ្យប្រើប្រាស់ជាផ្លូវការនេះ ក្រុមហ៊ុន បានប្រកាសបញ្ចុះតម្លៃ ២០ ភាគរយ ដែលអ្នកបើកបរអាចចំណាយថវិកាចន្លោះពី ១២ ដុល្លារ ទៅដល់ ៦០ ដុល្លារលើផ្លូវប្រវែង ១៨៧,០៥ គីឡូម៉ែត្រ។ ផ្លូវនេះ ត្រូវបានក្រសួងសាធារណការ បើកឱ្យសាកល្បងដោយឥតគិតថ្លៃរយៈពេល ១ ខែ កាលពីខែតុលា។
ក្រសួងសាធារណការ និងដឹកជញ្ជូន បានប្រកាសនៅថ្ងៃទី ២ ខែវិច្ឆិកាថា បើតាមកំណត់ត្រាស្ថិតិយានយន្ត និងស្ថានភាពចរាចរណ៍ ក្នុងរយៈពេល ៣១ ថ្ងៃ នៃការបើកឱ្យប្រើប្រាស់សាកល្បងដោយឥតគិតថ្លៃ ដោយរាប់ចាប់ពីម៉ោង ៧ ព្រឹក ថ្ងៃទី ១ ខែតុលា ឆ្នាំ ២០២២ ដល់ម៉ោង ២៤ យប់ ថ្ងៃទី ៣១ ខែតុលា ឆ្នាំ ២០២២ មានយានយន្តចំនួន ៤៣៧ ៣៨១ គ្រឿង បានធ្វើចរាចរណ៍លើផ្លូវល្បឿនលឿនភ្នំពេញ-ព្រះសីហនុ។
ក្រសួងសាធារណការ បានអះអាងថា ចំនួននេះ គឺយោងតាមច្រកចេញចូលតាមស្ថានីយទាំង៨ទីតាំង ហើយចំពោះករណីគ្រោះថ្នាក់វិញ គឺមានចំនួន ១៩ ករណី ឬស្មើនឹង ០,០០៤% បើធៀបទៅនឹងទំហំចរាចរណ៍ដែលបានកត់ត្រាប៉ុណ្ណោះ។
ក្រសួងបានបញ្ជាក់ថា ក្នុងចំណោមយានយន្តចំនួនជិត ៤៤ ម៉ឺនគ្រឿង ដែលបានចរាចរក្នុងពេលបើកឱ្យប្រើប្រាស់សាកល្បងដោយឥតគិតថ្លៃ ១ ខែនេះ មានករណីប្រឹក្សាយោបល់ សាកសួរព័ត៌មាន និងស្វែងរកជំនួយសង្គ្រោះ សរុបចំនួន ១ ២៩១ ខ្សែ បានធ្វើការទាក់ទងទៅកាន់លេខ ១៣៩៩ ដែលជាលេខទូរស័ព្ទសង្គ្រោះរបស់ក្រុមហ៊ុន។
ជាមួយនឹងការប្រកាសនេះ ក្រសួងសាធារណការ និងដឹកជញ្ជូន ក៏បានសំណូមពរដល់ប្រជាពលរដ្ឋគ្រប់រូប ចូលរួមស្វែងយល់ និងអនុវត្តតាមសេចក្តីណែនាំឱ្យបានម៉ឺងម៉ាត់ ចំពោះគ្រប់លក្ខខណ្ឌក្នុងការបើកបរលើផ្លូវល្បឿនលឿននេះ និងគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួន ដើម្បីការធ្វើដំណើរប្រកបទៅដោយភាពសប្បាយរីករាយ និងសុខសុវត្ថិភាព។
តាមតារាងតម្លៃទូទាត់លើមធ្យោបាយធ្វើដំណើរលើផ្លូវល្បឿនលឿនភ្នំពេញ-ក្រុងព្រះសីហនុបានបង្ហាញថា គ្រប់យានយន្តដែលអាចធ្វើដំណើរបានលើផ្លូវល្បឿនលឿន ត្រូវបានបែងចែកជា៥ ប្រភេទ ដែលមានពី A, B, C, D, E ហើយ ការប្រមូលកម្រៃសេវាផ្លូវ ធ្វើឡើងទៅតាមចម្ងាយផ្លូវជាក់ស្តែង និងប្រភេទយានយន្តដែលអ្នកដំណើរបានបើកបរ។
កាលពីថ្ងៃទី ២៧ ខែតុលា លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា ការផាកពិន័យតាមច្បាប់ ចាប់ផ្តើមអនុវត្តចាប់ពីថ្ងៃទី ១ ខែវិច្ឆិកា តទៅ ស្របពេលផ្លូវនេះដាក់ឱ្យដំណើរការជាផ្លូវការដោយគិតថ្លៃ។ ក្នុងនោះ លោកបានឱ្យដឹងថា ផ្លូវល្បឿនលឿនមានដាក់ពង្រាយកាមេរ៉ាសុវត្ថិភាពប្រមាណ ២០០ គ្រឿង និងមានមន្ត្រីនគរបាលចរាចរណ៍ប្រចាំការ ២៤ ម៉ោងលើ ២៤ ម៉ោងចំនួន ១៨ រូប ដើម្បីចាំពិនិត្យមើលតាមកាមេរ៉ាសុវត្ថិភាព និងចុះទៅអន្តរាគមន៍ភ្លាមៗ។
លោក គឹម បញ្ញា នាយកអង្គការមូលនិធិបង្ការរបួសអាស៊ីបានថ្លែងថា គណៈគ្រប់គ្រងផ្លូវនេះ គួរតែអនុវត្តច្បាប់ឱ្យបានតឹងរ៉ឹង និងផាកពិន័យតាមច្បាប់ ចំពោះបាតុភាព និងសកម្មភាពល្មើសនានា ដើម្បីការពារកុំឱ្យមានគ្រោះថ្នាក់ដែលធ្វើឱ្យប៉ះពាល់ដល់អាយុជីវិតរបស់អ្នកដំណើរ៕