ភ្នំពេញៈ តំណាងពលរដ្ឋខ្មែរនៅសហរដ្ឋអាមេរិក លោក ម៉ក់ ហឺន នៅថ្ងៃទី ២ ខែវិច្ឆិកា បាននាំយកអំណោយជាអាវពោងសុវត្ថិភាព ចំនួន ១ ៥០០ អាវ ទៅផ្ដល់ជូនគណៈកម្មាធិការជាតិគ្រប់គ្រងគ្រោះមហន្តរាយ ដើម្បីបំពាក់ជូនដល់កងប្រតិបត្តិការជួយសង្គ្រោះ ប្រើប្រាស់ក្នុងពេលចុះអន្តរាគមន៍សង្គ្រោះពលរដ្ឋក្នុងតំបន់ ដែលជួបគ្រោះទឹកជំនន់ និងក្នុងករណីជួបឧបទ្ទវហេតុលិចទូក។
លោកទេសរដ្ឋមន្រ្តី គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ បានថ្លែងអំណរគុណ ចំពោះលោក ម៉ក់ ហឺន ព្រមទាំងពលរដ្ឋខ្មែរនៅសហរដ្ឋអាមេរិក ដែលបាននាំមកនូវអំណោយដ៏ថ្លៃថ្លានេះ ផ្ដល់ជូនដល់គណៈកម្មាធិការជាតិគ្រប់គ្រងគ្រោះមហន្តរាយ សម្រាប់ប្រើប្រាស់ក្នុងប្រតិបត្តិការជួយសង្គ្រោះពលរដ្ឋ ដែលរងគ្រោះដោយគ្រោះទឹកជំនន់ និងដោយឧបទ្ទហេតុគ្រោះថ្នាក់ចរារចណ៍ នៅតាមផ្លូវទឹកជាដើម។
លោកបានបន្តថា ដើម្បីបង្កើនប្រសិទ្ធភាព នៃការរុករក និងសង្គ្រោះគ្រោះមហន្តរាយលើផ្ទៃទឹក រាជរដ្ឋាភិបាល បានសម្រេចឱ្យគណៈកម្មាធិការជាតិគ្រប់គ្រងគ្រោះមហន្តរាយ បង្កើតកងរុករក និងសង្គ្រោះលើផ្ទៃទឹក។ កងរុករក និងសង្គ្រោះលើផ្ទៃទឹកនេះ គ្រោងចាយថវិកាប្រមាណ ៥០ ម៉ឺនដុល្លារ សម្រាប់ការហ្វឹកហ្វឺន និងបំពាក់សម្ភារបរិក្ខារនានា។
លោកថ្លែងថា៖ «អំណោយនេះ គឺជាការចូលរួមចំណែកពង្រឹងសមត្ថភាពដល់កងប្រតិបត្តិការសង្គ្រោះ ដើម្បីបំពេញបេសកកម្មសង្គ្រោះពលរដ្ឋរងគ្រោះដោយទឹកជំនន់ និងដោយឧបទ្ទហេតុ លិចទូក-កាណូត និងនាវា នៅក្នុងសមុទ្រ ទន្លេ ស្ទឹង បឹងបួនានាទូទាំងប្រទេសកម្ពុជា ប្រកបដោយប្រសិទ្ធភាព»។
ក្នុងឱកាសនោះ លោក ម៉ក់ ហឺន ដែលជាពលរដ្ឋខ្មែរនៅអាមេរិក និងដែលត្រូវបានគេស្គាល់ថា ជាអ្នកវិភាគបញ្ហានយោបាយ និងសង្គមខ្មែរម្នាក់ ដែលតែងតែរិះគន់ទៅលើរាជរដ្ឋាភិបាលកម្ពុជា ដើម្បីស្ថាបនា បានប្រាប់ប្រព័ន្ធផ្សព្វផ្សាយថា កាលពីមុន គាត់ស្ដាប់តែការបំភ្លៃរបស់អ្នកនយោបាយខ្មែរនៅក្រៅប្រទេសថា នៅស្រុកខ្មែរបែបនេះ បែបនោះ។ ប៉ុន្តែឥឡូវនេះ គាត់បានមកដល់ស្រុកខ្មែរ ឃើញថា នៅស្រុកខ្មែរពិតជាមាន«សន្តិភាព និងការអភិវឌ្ឍលើសពីការរំពឹងទុក»។
ជាមួយគ្នានេះ លោកបានអំពាវនាវដល់ពលរដ្ឋខ្មែរនៅឯក្រៅប្រទេសទាំងអស់ គួរផ្ដោតការយកចិត្តទុកដាក់ និងរកពេលវេលាត្រឡប់មកលេងប្រទេសកំណើត ដើម្បីមើលឱ្យឃើញច្បាស់នឹងភ្នែក នូវអ្វី ដែលពលរដ្ឋ និងរាជរដ្ឋាភិបាលខ្មែរនាពេលបច្ចុប្បន្ន កំពុងរួមគ្នាធ្វើដើម្បីការពារសន្តិភាព និងការអភិវឌ្ឍប្រទេសប្រកបដោយបរិយាប័ន្ន ជាជាងជឿទៅលើការបំប៉ោងរបស់អ្នកនយោបាយ ១ ក្តាប់តូចនៅឯក្រៅប្រទេស។
លោកបន្តថា លោក និងក្រុមគ្រួសារ នឹងចូលរួមចុះឈ្មោះបោះឆ្នោតក្នុងការបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ ២០២៣ ខាងមុខ ដើម្បីជ្រើសរើសមេដឹកនាំសម្រាប់កូនចៅជំនាន់ក្រោយ៕