.jpg)
លោក ប្រាក់ សុខុន រដ្ឋមន្ត្រីក្រសួងការបរទេស នៅថ្ងៃទី២ ខែវិច្ឆិកា ទទួលសារតាំងពីលោក Joseph Scheuer អ្នកសម្របសម្រួលថ្មីរបស់UNប្រចាំកម្ពុជា។ រូបថត ក្រសួងការបរទេស
ភ្នំពេញៈ លោក ប្រាក់ សុខុន រដ្ឋមន្ត្រីក្រសួងការបរទេស នៅថ្ងៃទី ២ ខែវិច្ឆិកា បានទទួលសារតាំងពីលោក Joseph Scheuer អ្នកសម្របសម្រួលថ្មីរបស់ UN ប្រចាំកម្ពុជា ហើយបានជួបពិភាក្សា ដោយភាគីទាំង ២ បានប្តេជ្ញាពង្រឹងបន្ថែមទៀតនូវកិច្ចសហប្រតិបត្តិការ ដែលបានទន្ទឹងដល់ការបន្តកិច្ចសន្ទនាប្រចាំឆ្នាំរវាងរាជរដ្ឋាភិបាលកម្ពុជា និងទីភ្នាក់ងារអង្គការសហប្រជាជាតិទាំងអស់នៅកម្ពុជា ដែលបានអាក់ខានដោយសារជំងឺរាតត្បាតកូវីដ ១៩។
លោក ជុំ សុន្ទរី អ្នកនាំពាក្យក្រសួងការបរទេសថ្លែងថា៖ «ឯកឧត្ដមឧបនាយករដ្ឋមន្ត្រី ប្រាក់ សុខុន និងលោក Joseph Scheuer បានសម្តែងនូវការពេញចិត្តចំពោះកិច្ចសហប្រតិបត្តិការដ៏ល្អដែលកំពុងមាននាពេលបច្ចុប្បន្នរវាងកម្ពុជា និងអង្គការសហប្រជាជាតិ និងបានផ្លាស់ប្តូរទស្សនៈគ្នាអំពីការពង្រឹងបន្ថែមទៀតនូវកិច្ចសហប្រតិបត្តិការរវាងកម្ពុជា និងអង្គការ សហប្រជាជាតិ»។
លោកបញ្ជាក់នៅថ្ងៃទី ២ ខែវិច្ឆិកាថា៖ «ភាគីទាំង ២ បានទន្ទឹងដល់ការបន្តកិច្ចសន្ទនាប្រចាំឆ្នាំរវាងរាជរដ្ឋាភិបាលកម្ពុជា និងទីភ្នាក់ងារអង្គការសហប្រជាជាតិទាំងអស់នៅកម្ពុជា ដែលបានអាក់ខានដោយសារជំងឺរាតត្បាតកន្លងមក»។
លោក ប្រាក់ សុខុន ថ្លែងថា ក្រុមការងារ UN បានរួមចំណែកដ៏មានតម្លៃតាមរយៈក្របខ័ណ្ឌជំនួយអភិវឌ្ឍន៍របស់អង្គការសហប្រជាជាតិ (UNDAF) និងក្នុងអំឡុងពេលនៃការរីករាលដាលនៃជំងឺរាតត្បាត ជាពិសេសការផ្តល់វ៉ាក់សាំងបង្ការ ជំងឺកូវីដ ១៩ តាមរយៈយន្តការកូវ៉ាក់ (COVAX Facility) និងឧបករណ៍វេជ្ជសាស្ត្រផ្សេងៗទៀត។
លោករដ្ឋមន្ត្រីថ្លែងថា តាមរយៈជំនួយសប្បុរសនេះ បូករួមជាមួយនឹងយុទ្ធសាស្ត្រចាក់វ៉ាក់សាំងរបស់រាជរដ្ឋាភិបាល កម្ពុជាសម្រេចបានការចាក់វ៉ាក់សាំងជូនប្រជាពលរដ្ឋបានជាង ៩៥ ភាគរយនៃចំនួនពលរដ្ឋសរុប។
លោកបានរំឭកថា ជំនួបរវាងលោកនាយករដ្ឋមន្ត្រី ហ៊ុន សែន និងអគ្គលេខាធិការអង្គការសហប្រជាជាតិ លោក Antonio Guterres នៅឯមហាសន្និបាតអង្គការសហប្រជាជាតិនៅទីក្រុងញូវយ៉ក សហរដ្ឋអាមេរិកកាលពីខែឧសភា គឺទទួលបានលទ្ធផលផ្លែផ្កា។
លោក Antonio Guterres គ្រោងនឹងមកចូលរួមក្នុងកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនៅរាជធានីភ្នំពេញដែលនឹងចាប់ផ្តើមនៅសប្តាហ៍ក្រោយ។ លោក Joseph និងលោក ប្រាក់ សុខុន ចាត់ទុកជំនួបជាថ្មីម្ដងទៀតរវាងលោក ហ៊ុន សែន និងលោក Antonio Guterres នៅក្នុងឱកាសនៃកិច្ចប្រជុំកំពូលអាស៊ាននេះពិតជាមានសារៈសំខាន់។
លោក ប្រាក់ សុខុន លើកឡើងថា កម្ពុជាបានរួមចំណែកយ៉ាងសកម្មចំពោះប្រតិបត្តិការថែរក្សាសន្តិភាពរបស់អង្គការសហប្រជាជាតិ (UNPKOs) ហើយថា កម្ពុជាបានតាំងចិត្តបន្តបញ្ជូនកងកម្លាំងមួកខៀវរបស់ខ្លួន ដើម្បីជាគុណប្រយោជន៍ដល់សន្តិភាព៕
