.jpg)
ប្រភេទកាំជ្រួចដែលជនជាតិថៃចូលមកលេងនៅស្រុកអន្លង់វែង។ ហេង ជីវ័ន
ឧត្តរមានជ័យៈ យ៉ាងហោចណាស់ជនជាតិថៃប្រមាណ ២០០ នាក់ក្នុង ១ ថ្ងៃ បានឆ្លងដែនចូលមកស្រុកអន្លង់វែង ក្នុងខេត្តឧត្តរមានជ័យ ដើម្បីភ្នាល់ល្បែងបាញ់កាំជ្រួចនៅលើខ្នងភ្នំដងរែក ជាទីដែលក្រុមហ៊ុនក្នុងស្រុក ១ បើកឱ្យដំណើរការឡើងវិញនូវល្បែងស៊ីសងប្រភេទនេះ បន្ទាប់ពីកម្ពុជាបានបើកប្រទេសឡើងវិញ ក្រោយបញ្ចប់ការបិទខ្ទប់នៃការរីករាលដាលជំងឺកូវីដ ១៩។
ទោះបីជាមានការគ្រប់គ្រងដោយមន្ត្រីនគរបាលជំនាញតាមដានត្រួតពិនិត្យការអនុវត្ត និងសកម្មភាពអាជីវកម្មអំពីផលវិជ្ជមាន និងអវិជ្ជមាននានាក្នុងការបើកលេងអុជកាំជ្រួចជាល្បែងស៊ីសងរបស់ក្រុមហ៊ុន សាមនខេមរៈអភិវឌ្ឍន៍ ក៏ដោយ ប្រជាពលរដ្ឋនៅភូមិជើងភ្នំ ឃុំត្រពាំងប្រីយ៍ លោក ហង្ស សាទ អាយុ ៥២ ឆ្នាំ បានប្រាប់ភ្នំពេញប៉ុស្តិ៍ ដោយបានបង្ហាញពីក្ដីបារម្ភពីសុវត្ថិភាពរបស់ពលរដ្ឋដែលរស់នៅក្បែរតំបន់នោះ ព្រោះមើលទៅវាគួរឱ្យភ័យខ្លាច។
លោកបានបន្តថា កាលពីថ្ងៃទី ៣០ ខែតុលា ឆ្នាំ ២០២២ ក្រុមអ្នកញៀនល្បែងភ្នាល់បាញ់កាំជ្រួចជនជាតិថៃប្រមាណជាង ២០០ នាក់ក្នុង ១ ថ្ងៃបានមកលេងភ្នាល់ល្បែងនេះនៅលើខ្នងភ្នំដងរែក ដោយបានបាញ់កាំជ្រួចអស់ចំនួន ១៣ ដើម។
លោកបានបញ្ជាក់ថា៖ «សម្បកគ្រាប់កាំជ្រួចដែលពួកគេបានបាញ់បង្ហោះនោះ បានធ្លាក់លើចម្ការដំណាំ និងដំបូលផ្ទះរបស់អ្នកភូមិ ដែលនៅជាប់ជើងភ្នំ ប៉ុន្តែវាមិនបង្កការផ្ទុះ ឬខូចខាតដំណាំ និងផ្ទះសំបែងនោះទេ ព្រោះសម្បកគ្រាប់នោះជាបំពង់ទុយោជ័រ»។
លោកថា៖ «ថ្វីបើយ៉ាងដូច្នេះក្ដី វាបានបង្កការភ័យខ្លាចដល់អ្នកភូមិរបស់យើង ពិសេសកុមារតូចៗ»។
លោក សាក់ សុផន អាយុ ៤៦ ឆ្នាំជាមេភូមិអូរគ្រញូងបាននិយាយបន្ទរ ដោយអះអាងថា កាលពីមុនក្រុមហ៊ុនបានបើកលេងតែ ២ ថ្ងៃប៉ុណ្ណោះក្នុង ១ សប្ដាហ៍ គឺ នៅថ្ងៃសៅរិ៍ និងថ្ងៃអាទិត្យ ហើយការបាញ់ភ្នាល់មានត្រឹមតែ ៤ ទៅ ៦ ដើមប៉ុណ្ណោះក្នុង ១ ថ្ងៃ។ ប៉ុន្តែឥឡូវនេះ ក្រុមហ៊ុនបានបើកលេងការភ្នាល់បាញ់កាំជ្រួចនេះ ១ ថ្ងៃបន្ថែមទៀត គឺ ៣ ថ្ងៃក្នុង ១ សប្ដាហ៍ ដោយចាប់ផ្ដើមពីថ្ងៃសៅរ៍ ដល់ថ្ងៃចន្ទ ហើយក្នុង ១ ថ្ងៃ បាញ់កាំជ្រួចអស់មិនក្រោម ១០ ដើមនោះទេ។
លោក សុផន បានបន្ថែមថា៖ «ឥឡូវនេះ វាមិនទាន់មានហានិភ័យអ្វីកើតឡើងទេ ប៉ុន្តែវាអាចនឹងកើតមាននៅពេលណាមួយ ប្រសិនបើការបាញ់ភ្នាល់គ្រាប់កាំជ្រួចនោះខុសបច្ចេកទេស ឬដោយមានបច្ច័យអាក្រក់ណាមួយកើតឡើង»។
ចំណែកអ្នកភូមិអូរថ្ម លោក មាស ហៃលី អាយុ ៦១ ឆ្នាំបានអះអាងប្រាប់ភ្នំពេញប៉ុស្តិ៍ថា កាលពីអំឡុងទសវត្សរ៍ឆ្នាំ ១៩៩០ ខណៈលោកនៅជាអតីតយោធាខ្មែរក្រហម លោកធ្លាប់ត្រូវបានគេអញ្ជើញឱ្យចូលរួមលេងនៅក្នុងកម្មវិធីបែបនេះនៅក្នុងខេត្តស៊ីសាកេត ប្រទេសថៃ ចំនួន ២ ដង។
លោកបានធ្វើការពណ៌នាអំពីកាំជ្រួច ដែលគេនាំយកមកដើម្បីបាញ់លេងជាល្បែងភ្នាល់នៅក្នុងទឹកដីស្រុកអន្លង់វែងនាពេលនេះថា វា [កាំជ្រួច] ត្រូវបានគេផលិតឡើងពីបំពង់ទុយោជ័រ ដែលមានមុខកាត់ពី ១០០ មីល្លីម៉ែត្រ ទៅ ២០០ មីល្លីម៉ែត្រ និងមានប្រវែងចន្លោះពី ១,៨ ម៉ែត្រ ទៅ ២,៥ ម៉ែត្រ និងមានបង្កប់សារធាតុរំសេវម្យ៉ាងដែលអាចឆេះ និងហោះបាន តែវាមិនបង្កការផ្ទុះបែកបំពង់ទុយោនោះឡើយ។
លោក ហៃលី បានបញ្ជាក់ថា៖ «ល្បែងបាញ់បង្ហោះកាំជ្រួចនេះ មានការពេញនិយមលេងដោយក្រុមយុវជនជនជាតិថៃនៅក្នុងពិធីបុណ្យជាតិធំៗ ពិសេសក្នុងពិធីបុណ្យខួបនៃការបង្កើតរដ្ឋថៃ ប៉ុន្តែការបាញ់លេងជាល្បែងភ្នាល់មិនត្រូវបានរដ្ឋាភិបាលថៃអនុញ្ញាតឡើយ»។
លោក ស៊ូ នូវ អធិការរងស្រុកអន្លង់វែងបានប្រាប់ ភ្នំពេញ ប៉ុស្តិ៍ថា ការលេងល្បែងភ្នាល់បាញ់កាំជ្រួចនេះ គឺគេអនុញ្ញាតឱ្យតែពលរដ្ឋថៃប៉ុណ្ណោះចូលលេង និងទស្សនាកម្សាន្តនៅក្នុងទីលានបាញ់កាំជ្រួចនោះ ដោយក្នុងម្នាក់ៗត្រូវចំណាយប្រាក់ចំនួន ៣០០ បាតទៅលើថ្លៃសំបុត្រចូលទស្សនា ដែលថ្លៃសំបុត្រនេះក្រុមហ៊ុន សាមនខេមរៈអភិវឌ្ឍន៍ ជាអ្នកលក់ និងគ្រប់គ្រងដោយផ្ទាល់។
លោកថា៖ «ក្រុមហ៊ុនគេមានច្បាប់អនុញ្ញាតធ្វើអាជីវកម្មត្រឹមត្រូវតាមច្បាប់ ហើយពលរដ្ឋខ្មែរមិនត្រូវបានអនុញ្ញាតឱ្យចូលលេងនោះទេ»។
លោកបានបន្ថែមថា៖ «បើកម្មវិធីល្បែងបាញ់កាំជ្រួចនេះមានអ្នកចូលរួមច្រើន ប្រាក់ចំណូលរបស់ពលរដ្ឋយើងនៅក្នុងតំបន់នោះក៏កើនឡើងដែរ តាមរយៈការលក់ចំណីអាហារ ភេសជ្ជៈ និងការផ្ដល់សេវាដឹកជញ្ជូនភ្ញៀវទេសចរ។ ព្រោះភ្ញៀវទេសចរដែលមកលេងនៅទីនោះជាជនបរទេសចម្រុះជាតិសាសន៍»។
ពាក់ព័ន្ធទៅនឹងបញ្ហានេះ លោក ផល សាមន នាយកគ្រប់គ្រងក្រុមហ៊ុន សាមនខេមរៈអភិវឌ្ឍន៍ បានប្រាប់ភ្នំពេញប៉ុស្តិ៍ថា ការរៀបចំឱ្យមានកម្មវិធីនេះឡើង គឺក្នុងគោលបំណងទាក់ទាញក្រុមទេសចរពីគ្រប់ទិសទី ពិសេសទេសចរថៃឱ្យមកចូលទស្សនាស្រុកអន្លង់វែងដែលជាអតីតសមរភូមិប្រយុទ្ធដ៏ក្ដៅគគុករវាងកងទ័ពរដ្ឋាភិបាលកម្ពុជា និងកងទ័ពព្រៃខ្មែរក្រហម ដែលបច្ចុប្បន្នកំពង់ប្រែក្លាយជាតំបន់អភិវឌ្ឍន៍ជឿនលឿនស្ទើរគ្រប់វិស័យមិនចាញ់តំបន់ទេសចរណ៍ដទៃទៀតឡើយ។
លោកថ្លែងថា៖ «ល្បែងបាញ់កាំជ្រួចនេះ វាមិនបង្កគ្រោះថ្នាក់នោះទេ តែវានឹងបង្កើនភាពរីករាយ និងទាក់ទាញដល់អ្នកទស្សនា និងអ្នកបាញ់ដោយផ្ទាល់ ព្រោះវាមិនដូចជាកាំជ្រួចដែលគេបាញ់សម្រាប់ពិធីបុណ្យចូលឆ្នាំ ដែលមានផ្ទុះបែកជាផ្កាភ្លើងនោះទេ។ វាស្រដៀងទៅនឹងកាំជ្រួចមីស៊ីល»។
លោកបានបន្ថែមថា៖ «គ្រាប់កាំជ្រួចនោះ ១ ដើមថ្លៃប្រមាណពី ៥ ០០០ បាត ទៅ ១០ ០០០ បាត ហើយដូច្នេះបើមានអ្នកមកលេងតិច គឺមិនរួចថ្លៃដើមទេ»។
បើតាមការអះអាងរបស់លោក សាមន ការលេងភ្នាល់នៅក្នុងល្បែងនេះ គឺតម្រូវឱ្យមានការប្រកួតបាញ់ដោយបែងចែកជា ២-៣ ក្រុម អាស្រ័យទៅលើចំនួនមនុស្ស ដែលបានមកចូលរួមលេង និងមានគណៈកម្មការបច្ចេកទេសមួយសម្រាប់ធ្វើការវិនិច្ឆ័យ និងដាក់ពិន្ទុ ដោយកំណត់ទៅលើរយៈពេល រយៈកម្ពស់ និងល្បឿននៃការហោះហើរទៅក្នុងអាកាសរបស់គ្រាប់កាំជ្រួចនោះ ដែលត្រូវបានបាញ់ចេញ។
លោកបានបញ្ជាក់ថា៖ «អ្នកឈ្នះនឹងទទួលបានរង្វាន់លើកទឹកចិត្តពីកម្មវិធី។ វាមិនមែនជាល្បែងភ្នាល់តែម្យ៉ាងនោះទេ ប៉ុន្តែវាជាការបង្ហាញនូវបច្ចេកទេសនៃការរៀបចំជើងទម្រ និង ការបញ្ជាបាញ់គ្រាប់កាំជ្រួចទៅក្នុងទីលម្ហផងដែរ»។
លោកបានប្រាប់ឱ្យដឹងទៀតថា ការរៀបចំកម្មវិធីលេងល្បែងភ្នាល់នេះ គឺអាស្រ័យលើចំនួនភ្ញៀវដែលបានចុះឈ្មោះចូលលេង និងទស្សនា បើសិនជាមានភ្ញៀវមកលេង និងទស្សនាច្រើននោះ គឺកម្មវិធីនឹងរៀបចំបង្កើនការបាញ់គ្រាប់កាំជ្រួចបានច្រើនដើម និងបង្កើនថ្ងៃលេង ព្រោះក្រុមហ៊ុនមានច្បាប់អនុញ្ញាតឱ្យបើកលេងល្បែងអុជ [បាញ់] កាំជ្រួច ដែលជាល្បែងស៊ីសងផ្ដាច់មុខជាអចិន្រៃ្តយ៍នេះពីរាជរដ្ឋាភិបាលកម្ពុជា។
បើតាមលោក សាមន ក្រុមហ៊ុនរបស់លោកទទួលបានច្បាប់អនុញ្ញាតពីរាជរដ្ឋាភិបាលតាំងពីឆ្នាំ ២០១៥ ប៉ុន្តែក្នុងរយៈពេល ២ ឆ្នាំកន្លងមកនេះ ក្រុមហ៊ុនបានផ្អាកនូវកម្មវិធីនេះជាបណ្ដោះអាសន្ន ដើម្បីចូលរួមទប់ស្កាត់ការឆ្លងរីករាលដាលនៃជំងឺកូវីដ ១៩ ។ កាលពីខែកក្កដា ឆ្នាំ ២០២២ នេះ ក្រុមហ៊ុនបានចាប់ផ្ដើមបើកសម្ពោធដំណើរការនូវកម្មវិធីល្បែងភ្នាល់បាញ់កាំជ្រួចនេះជាថ្មីឡើងវិញ ដើម្បីទាក់ទាញទេសចរ និងបង្កើនប្រាក់ចំណូលដល់ប្រជាពលរដ្ឋ តាមរយៈការលក់ដូរចំណីអាហារ ភេសជ្ជៈ និងការផ្ដល់ឧបដ្ឋាកដឹកជញ្ជូនដល់ភ្ញៀវទេសចរក្នុងវិស័យនេះ៕
វីដេអូ៖
