.jpg)
មន្ត្រីអង្គការសង្គមស៊ីវិល និងប្រជាសហគមន៍នៅក្នុងសន្និបាតប្រជាជន នៅថ្ងៃទី ៣ វិច្ឆិកា។ ហុង មិនា
ភ្នំពេញៈ អាជ្ញាធររាជធានីភ្នំពេញបានទទួលញត្តិពីតំណាងសមាគមអង្គការមិនមែនរដ្ឋាភិបាល និងតំណាងប្រជាជនមូលដ្ឋាន ដើម្បីដាក់ជូនស្ថាប័នពាក់ព័ន្ធតាមនីតិវិធីរដ្ឋបាល ក្រោយអង្គការសង្គមស៊ីវិល និងប្រជាសហគមន៍ប្រមាណ ៧០០ នាក់ បានជួបជុំគ្នាសម្តែងមតិនៅក្នុងសន្និបាតប្រជាជន កាលពីថ្ងៃទី ៣ វិច្ឆិកា ឆ្នាំ ២០២២។
ការជួបជុំនេះបានធ្វើឡើងក្រោយពីក្រសួងមហាផ្ទៃអនុញ្ញាតឱ្យតំណាងសមាគម អង្គការមិនមែនរដ្ឋាភិបាល និងតំណាង ប្រជាជនមូលដ្ឋាន ប្រើប្រាស់ទីលានប្រជាធិបតេយ្យដើម្បីជួបជុំសម្តែងមតិក្រោមប្រធានបទ "សន្និបាតមហាជន" ដោយមិនអនុញ្ញាតឱ្យមានជនបរទេសចូលរួមសម្ដែងមតិនេះឡើយ។
ជាមួយនឹងការអនុញ្ញាតនេះ ក្រសួងមហាផ្ទៃ បានកំណត់ឱ្យពួកគេដាក់ញត្តិជូនក្រសួងការបរទេស និងសហប្រតិបត្តិការអន្ដរជាតិ ត្រូវធ្វើតាមរយៈមន្ត្រីតំណាងរដ្ឋបាលរាជធានីភ្នំពេញ ដើម្បីសម្របសម្រួលបញ្ជូនទៅក្រសួងការបរទេស និងសហប្រតិបត្តិការអន្តរជាតិ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានប្រាប់ ភ្នំពេញ ប៉ុស្តិ៍ នៅថ្ងៃទី ៣ វិច្ឆិកាថា ក្រោយមានការសម្របសម្រួលឱ្យមានការជួបជុំក្នុងសន្និបាតប្រជាជននេះប្រព្រឹត្តទៅដោយរលូន និងជោគជ័យ រដ្ឋបាលសាលារាជធានី ក៏បានទទួលញត្តិដើម្បីដាក់ជូនស្ថាប័នពាក់ព័ន្ធបន្តផងដែរ។
លោកបានបញ្ជាក់ថា៖ «ញត្តិដែលរដ្ឋបាលរាជធានីភ្នំពេញបានទទួលយើងនឹងបញ្ជូនបន្តតាមនីតិវិធីរដ្ឋបាល ទៅស្ថាប័នពាក់ព័ន្ធ ដែលញត្តិពួកគាត់ បានប្រគល់ជូន»។
តាមការអះអាង ញត្តិដែលបានបង្ហាញពីបញ្ហាប្រឈម និងអនុសាសន៍របស់ប្រជាពលរដ្ឋ អង្គការសង្គមស៊ីវិល គឺមានបំណងដាក់ជូនថ្នាក់ដឹកនាំអាស៊ានតាមរយៈក្រសួងការបរទសនិងជូនរដ្ឋាភិបាលកម្ពុជាតាមរយៈក្រសួងពាក់ព័ន្ធនានារួមមានក្រសួងមហាផ្ទៃ ក្រសួងរៀបចំដែនដីនគរូបនីយកម្ម និងសំណង់ ក្រសួងកសិកម្មរុក្ខាប្រមាញ់និងនេសាទ ក្រសួងកិច្ចការនារី ក្រសួងសុខាភិបាល ក្រសួងអប់រំ យុវជន និងកីឡា ក្រសួងយុត្តិធម៌ និងក្រសួងការងារ និងបណ្តុះបណ្តាលវិជ្ជាជីវៈជាដើម។
លោក ជា សុភ័ក តំណាងអ្នករៀបចំសន្និបាតម្នាក់បានប្រាប់ ភ្នំពេញ ប៉ុស្តិ៍ថា បញ្ហានានា ដែលបានលើកឡើងក្នុងការជួបជុំ និងដាក់ចូលក្នុងញត្តិរបស់ខ្លួន គឺមានទាំងកម្រិតថ្នាក់ជាតិ និងកម្រិតអាស៊ានជុំវិញអធិបតេយ្យ ស្បៀង វិបត្តិប្រព័ន្ធស្បៀងផលប៉ះពាល់ពីពាណិជ្ជកម្មសេរី សិទ្ធិដីធ្លី និងលំនៅឋានធនធានធម្មជាតិ និងការប្រែប្រួលអាកាសធាតុ ផលប៉ះពាល់ពីកូវីដ ១៩ សិទ្ធិអ្នកប្រកបរបរផ្លូវភេទ និងតួនាទីសិល្បៈ។
ជាមួយនឹងការលើកឡើងនេះ លោកសង្ឃឹមថា ញត្តិនិងអនុសាសន៍ទាំងនេះ នឹងត្រូវបានយកចិត្តទុកដាក់ពីសំណាក់រាជរដ្ឋាភិបាលកម្ពុជា និងប្រទេសជាសមាជិកអាស៊ានដែលបានចូលរួមក្នុងកិច្ចប្រជុំអាស៊ាន ដែលកម្ពុជាធ្វើជាម្ចាស់ផ្ទះក្នុងពេលខាងមុខ។
លោកបានបញ្ជាក់ថា៖ «យើងគិតថា អាជ្ញាធរកម្ពុជា ក៏ដូចជារដ្ឋាភិបាលរបស់អាស៊ាន នឹងទទួលបានសាររបស់ប្រជាពលរដ្ឋ បើទោះជាក្តីសង្ឃឹមទៅលើដំណោះស្រាយទាំងនេះស្ថិតក្នុងការពិចារណានៅឡើយ ក៏យើងគិតថា ការសម្តែងមតិរបស់យើងក្នុងចំណោមមនុស្សជិត ១ ០០០ នាក់ គឺជាសារមួយដែរ ហើយអ្វីដែលយើងបានធ្វើ គឺជាផ្នែកមួយនៃដំណោះស្រាយដោយយ៉ាងហោចណាស់យើងបានបញ្ចេញសារទៅកាន់រដ្ឋាភិបាលនិងកិច្ចប្រជុំអាស៊ានឱ្យបានដឹង»។
បើតាមលោក ជា សុភ័ក សន្និបាតប្រជាជន បានរៀបចំឡើងរយៈពេល ៣ ថ្ងៃ ចាប់ពីថ្ងៃទី ១ ដល់ថ្ងៃទី ៣ ខែវិច្ឆិកា ឆ្នាំ ២០២២ ដែលសន្និបាតនេះ គឺជាផ្នែកមួយនៃចលនាប្រជាជនមូលដ្ឋាន និងសកម្មជនសង្គមមកពីអាស៊ីអាគ្នេយ៍ ដើម្បីបង្ហាញពីសាមគ្គីភាព និងសំឡេងរបស់ពួកគេទៅកាន់ថ្នាក់ដឹកនាំដោយរំពឹងថា តម្រូវការ និងសំណូមពររបស់ខ្លួននឹងត្រូវបានយកចិត្តទុកដាក់។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា បានលើកឡើងថា អាស៊ាន គឺជាអង្គការអន្តររដ្ឋាភិបាលដែលមិនមានសិទ្ធិលូកដៃលើកិច្ចការផ្ទៃក្នុងប្រទេសណាមួយទេ។ លោកថា ការធ្វើសមាជនិងការដាក់ញត្តិនេះមិនអាចយកជាការបានទេ ហើយវាគ្រាន់ជាការជួបជុំបញ្ចេញមតិដែលតាមច្បាប់កម្ពុជា ពួកគេមានសិទ្ធិក្នុងការបញ្ចេញមតិតែប៉ុណ្ណោះ។
លោកបានបញ្ជាក់ថា៖ «សមាជនេះកើតចេញពីណា? តើអង្គការសហគមន៍ហ្នឹងមកពីណា? មាននិន្នាការរបៀបម៉េច? ដូច្នេះនេះគ្រាន់តែជាការបញ្ចេញមតិដែលមិនមានអ្វីក្រៅពីហ្នឹងនោះទេ។ ដូច្នេះការបញ្ចេញយោបល់នេះ តើអាចឱ្យអាស៊ានជាអង្គការអន្តររដ្ឋាភិបាលនេះ ដោះស្រាយបញ្ហាអ្វី?»៕
