ភ្នំពេញៈ នាយករដ្ឋមន្ត្រីវៀតណាមលោក ផាម មិញជិញ នឹងមកបំពេញទស្សនកិច្ចនៅកម្ពុជារយៈពេល ២ ថ្ងៃ ចាប់ពីថ្ងៃទី ៨ ដល់ទី ៩ ខែវិច្ឆិកា ខណៈនាយករដ្ឋមន្ត្រីកាណាដាលោក Justin Trudeauបានប្រកាសថា លោកនឹងមកចូលរួមក្នុងកិច្ចប្រជុំកំពូលអាស៊ាននៅរាជធានីភ្នំពេញដែលនឹងចាប់ផ្តើមក្នុងសប្តាហ៍ក្រោយ។
សេចក្តីប្រកាសព័ត៌មានក្រសួងការបរទេសកម្ពុជាបញ្ជាក់នាថ្ងៃទី៣ ខែវិច្ឆិកា ថា លោក ផាម មិញជិញ នឹងចូលក្រាបបង្គំគាល់ព្រះមហាក្សត្រកម្ពុជានៅក្នុងព្រះបរមរាជវាំង ព្រមទាំងនឹងជួបដាច់ដោយឡែកពីគ្នាចំពោះលោក សាយ ឈុំ ប្រធានព្រឹទ្ធសភា និងលោក ហេង សំរិន ប្រធានរដ្ឋសភាកម្ពុជា។
លោកនាយករដ្ឋមន្ត្រី ហ៊ុន សែន និងលោកផាម មិញជិញ នឹងមានជំនួបទ្វេភាគីនៅវិមានសន្តិភាព រាជធានីភ្នំពេញ ដោយផ្តោតលើការពិភាក្សាអំពីការពង្រឹង និងពង្រីកកិច្ចសហប្រតិបត្តិការទ្វេភាគី ក៏ដូចជាបញ្ហាតំបន់ និងអន្តរជាតិមួយចំនួនដែលជាកង្វល់រួម។ នៅក្រោយជំនួប នាយករដ្ឋមន្ត្រីទាំង២នឹងធ្វើជាអធិបតីក្នុងពិធីចុះហត្ថលេខាលើឯកសារកិច្ចសហប្រតិបត្តិការទ្វេភាគីមួយចំនួន។
ប្រភពដដែលបន្តថា លោក ផាម មិញជិញ នឹងដាក់កម្រងផ្កាគោរពវិញ្ញាណក្ខន្ធនៅវិមានឯករាជ្យ មណ្ឌបព្រះបរមរូបព្រះករុណា ព្រះបាទសម្ដេចព្រះនរោត្ដម សីហនុ«ព្រះបរមរតនកោដ្ឋ» អតីតព្រះមហាក្សត្រកម្ពុជានិងវិមានមិត្តភាពកម្ពុជា-វៀតណាម។
សេចក្តីប្រកាសព័ត៌មានបញ្ជាក់ថា៖ «ដំណើរទស្សនកិច្ចរបស់ឯកឧត្តមនាយករដ្ឋមន្ត្រីវៀតណាម ស្របនឹងការប្រារព្ធខួបអនុស្សាវរីយ៍លើកទី ៥៥ នៃការបង្កើតទំនាក់ទំនងការទូតរវាងប្រទេសទាំង២ ដែលត្រូវបានកំណត់ជា«ឆ្នាំមិត្តភាពកម្ពុជា-វៀតណាម»។
ជាមួយគ្នានេះដែរ លោក Justin Trudeau បានប្រកាសកាលពីថ្ងៃទី២ ខែវិច្ឆិកា ថា លោកនឹងមកចូលរួមក្នុងកិច្ចប្រជុំកំពូលអាស៊ាននៅរាជធានីភ្នំពេញរយៈពេល២ថ្ងៃនៅថ្ងៃទី១២-១៣ ខែវិច្ឆិកា។
លោកបានបញ្ជាក់នៅលើគេហទំព័រខុទ្ទកាល័យនាយករដ្ឋមន្ត្រីថា ក្នុងអំឡុងពេលកិច្ចប្រជុំអាស៊ាន លោកTrudeau នឹងដោះស្រាយបញ្ហាប្រឈមក្នុងតំបន់ និងសកលជាមួយសមភាគីក្នុងអាស៊ាន និងតំបន់ឥណ្ឌូប៉ាស៊ីហ្វិកដែលបើកចំហ។
លោកនឹងចូលរួមក្នុងកិច្ចប្រជុំកំពូលរំឭកខួបអនុស្សាវរីយ៍អាស៊ាន-កាណាដា ដើម្បីប្រារព្ធខួបលើកទី៤៥នៃទំនាក់ទំនងសន្ទនាអាស៊ាន-កាណាដា។ ក្រោមប្រធានបទនៃកិច្ចប្រជុំកំពូលអាស៊ាន «ដោះស្រាយបញ្ហាប្រឈមរួមគ្នា»លោកTrudeau នឹងលើកកម្ពស់សន្តិភាព និងស្ថិរភាពក្នុងតំបន់ ពាណិជ្ជកម្មផ្អែកលើច្បាប់ កំណើនសេដ្ឋកិច្ចដែលផ្តល់ផលប្រយោជន៍ដល់មនុស្សគ្រប់រូប និងទំនាក់ទំនងដ៏រឹងមាំរវាងប្រជាជន។
ដូចគ្នាជាមួយលោក ហ៊ុន សែន ដែរនោះ បន្ទាប់ពីកិច្ចប្រជុំកំពូលអាស៊ាន លោកក៏នឹងធ្វើដំណើរទៅចូលរួមកិច្ចប្រជុំកំពូលនៃបណ្តាប្រទេសអ្នកមានទាំង២០ (G20) នៅប្រទេសឥណ្ឌូនេស៊ី។ បន្ទាប់ពីកិច្ចប្រជុំG20 លោកនឹងបន្តដំណើរទៅចូលរួមកិច្ចប្រជុំកំពូលសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅប្រទេសថៃ នៅក្នុងខែវិច្ឆិកាដដែលនេះ។
តំបន់ឥណ្ឌូប៉ាស៊ីហ្វិក គឺជាមជ្ឈមណ្ឌលរីកលូតលាស់សម្រាប់ពាណិជ្ជកម្ម និងការវិនិយោគ ដែលជំរុញទីផ្សារបើកចំហ បង្កើតការងារ និងជំរុញកំណើនសេដ្ឋកិច្ច។ ក្នុងអំឡុងពេលកិច្ចប្រជុំនៅអាស៊ី លោកTrudeau នឹងបង្ហាញពីភាពជាដៃគូដ៏រឹងមាំរបស់ប្រទេសកាណាដាក្នុងការជួយធ្វើឱ្យសេដ្ឋកិច្ចពិភពលោករីកចម្រើន ដើម្បីផ្តល់ផលប្រយោជន៍ដល់ប្រជាជននៃភាគីទាំង២របស់ប៉ាស៊ីហ្វិក។
លោកTrudeauថ្លែងថា៖ «នៅពេលដែលពិភពលោកធ្វើការរួមគ្នាលើបញ្ហាប្រឈមរួមគ្នា យើងនឹងធ្វើឱ្យជីវិតប្រជាជនកាន់តែប្រសើរឡើង។ ខ្ញុំរង់ចាំជួបជាមួយមេដឹកនាំពិភពលោក រួមទាំងសមភាគីរបស់ខ្ញុំមកពីតំបន់ឥណ្ឌូប៉ាស៊ីហ្វិក ដើម្បីបន្តបង្កើតការងារ និងជំរុញកំណើនសេដ្ឋកិច្ចដែលផ្តល់អត្ថប្រយោជន៍ដល់មនុស្សគ្រប់គ្នា»។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជាប្រាប់ភ្នំពេញប៉ុស្តិ៍នាថ្ងៃទី៣ ខែវិច្ឆិកា ថា វៀតណាមជាប្រទេសជិតខាងរបស់កម្ពុជា ដែលមានទំនាក់ទំនងល្អជាមួយគ្នា ហើយមានទំនាក់ទំនងទាំងនយោបាយសេដ្ឋកិច្ចការទូតជាមួយគ្នាច្រើន។ ម្យ៉ាងទៀត លោក ផាម មិញជិញ ក៏ត្រូវចូលរួមនៅក្នុងកិច្ចប្រជុំកំពូលអាស៊ានផងដែរ។
លោកថ្លែងថា៖ «អ៊ីចឹង ជួនពេលជាមួយគ្នានេះនាយករដ្ឋមន្ត្រីវៀតណាមក៏មកបំពេញទស្សនកិច្ចផ្លូវរដ្ឋដែលជាការបំពេញទស្សនកិច្ចក្នុងនាមជាប្រទេសរាប់អានគ្នាជិតស្និទ្ធល្អនៅក្នុងភូមិផងរបងជាមួយគ្នានេះ មិនមានបញ្ហាអ្វីគួរឲ្យភ្ញាក់ផ្អើលទេ»។
លោក យង់ ពៅ បន្តថា តួនាទីរបស់កម្ពុជាកាន់តែមានសារៈសំខាន់ នៅក្នុងអង្គការតំបន់អាស៊ាននេះ ហើយការចូលរួមរបស់បណ្ដាប្រទេសដៃគូ ដូចជាការចូលរួមរបស់លោកTrudeau ជាដើម គឺជាការចូលរួមក្នុងវេទិកាកិច្ចប្រជុំអាស៊ាននិងប្រទេសដៃគូដែលអង្គការតំបន់បានបង្ហាញថា អង្គការតំបន់អាស៊ានកាន់តែមានគុណតម្លៃទៅលើការចូលរួមដោះស្រាយទៅលើកិច្ចការតំបន់និងកិច្ចការពិភពលោកសំខាន់ៗ។
លោកថ្លែងថា៖ «ដូច្នេះបានបង្ហាញបន្ថែមទៀតថា អាស៊ានពេលនេះមិនមែនអាស៊ានដូចសម័យសង្គ្រាមត្រជាក់ ដែលគ្រាន់តែជាអង្គការតំបន់សម្រាប់បែងចែកនូវមនោគមន៍យោបាយទេ តែអាស៊ានបច្ចុប្បន្ននេះគឺជាអង្គការមួយពេញលក្ខណៈ មានធម្មនុញ្ញរបស់ខ្លួនហើយកាន់តែមានសារៈសំខាន់ ចូលរួមនៅក្នុងការដោះស្រាយបញ្ហាធំៗ ក្ដៅៗ លើពិភពលោក»៕