.jpg)
ប្រជាពលរដ្ឋរង់ចាំធ្វើតេស្ដរហ័សកូវីដ ១៩ នៅសាលាចតុមុខ កាលពីឆ្នាំ ២០២១។ ហេង ជីវ័ន
ភ្នំពេញៈ គម្រោងសិក្សាមួយស្តីពីការយល់ដឹងពីការប្រើប្រាស់តេស្តរហ័សរកជំងឺកូវីដ ១៩ ក្នុងចំណោមប្រជាជនកម្ពុជា ដែលរៀបចំដោយសាកលវិទ្យាល័យវិទ្យាសាស្ត្រសុខាភិបាលបាន បង្ហាញថា ៣០% នៃអ្នកផ្ទុកមេរោគអេដស៍ និងប្រជាជនទូទៅ ក្នុងទីក្រុងភ្នំពេញ បានឆ្លងកាត់ការធ្វើតេស្តរហ័ស អង់ទីហ្ស៊ែនរកជំងឺកូវីដ ១៩ ក្នុងរយៈពេល ៦ ខែកន្លងមក។
ការប្រមូលនេះធ្វើឡើងនៅក្នុងមូលដ្ឋានខណ្ឌបឹងកេងកង, ទួលគោក ៧មករា ចំការមន ច្បារអំពៅ មានជ័យ ជ្រោយចង្វារ ព្រែកព្នៅ និងឫស្សីកែវ។
យោងតាមសេចក្តីប្រកាសព័ត៌មានរបស់ក្រសួងសុខាភិបាល កាលពីថ្ងៃទី ២ ខែវិច្ឆិកា បានឱ្យដឹងថា ការសិក្សានេះត្រូវបានធ្វើឡើងដោយក្រុមការងារស្រាវជ្រាវ ដែលមានការចូលរួមពីសាកលវិទ្យាល័យ វិទ្យាសាស្ត្រសុខាភិបាលនៃប្រទេសកម្ពុជា និងសាកលវិទ្យាល័យ New South Wales នៃប្រទេសអូស្ត្រាលី ដោយបានរកឃើញលទ្ធផលសំខាន់ៗ មួយចំនួនពីការយល់ដឹងពីការប្រើប្រាស់តេស្តរហ័សរកជំងឺកូវីដ ១៩ ក្នុងចំណោមអ្នកផ្ទុកមេរោគអេដស៍ និងប្រជាជនទូទៅ។
លទ្ធផលនៃការសិក្សានេះបានបញ្ជាក់ថា៖ «៣០% នៃអ្នកផ្ទុកមេរោគអេដស៍ និងប្រជាជនទូទៅ ក្នុងទីក្រុងភ្នំពេញ បានឆ្លងកាត់ការធ្វើតេស្តរហ័សដែលមានអ្នកផ្ទុកមេរោគអេដស៍ចំនួន ២៨០ នាក់ ហើយនិងប្រជាជនទូទៅចំនួន ២៨០ នាក់ ត្រូវបានអញ្ជើញឱ្យចូលរួម ក្នុងការអង្កេតបែបបរិមាណ»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានក្រុមប្រឹក្សាភិបាលសាកលវិទ្យាល័យវិទ្យាសាស្ត្រសុខាភិបាល បានថ្លែងនៅក្នុងសិក្ខាសាលាផ្សព្វផ្សាយលទ្ធផលស្រាវជ្រាវនៃគម្រោងសិក្សានេះថា ការងារស្រាវជ្រាវនេះ ពិតជាមានសារៈសំខាន់ណាស់។
លោកថ្លែងថា៖ «លទ្ធផលនៃការសិក្សាស្រាវជ្រាវនេះ នឹងក្លាយជាធាតុចូលយ៉ាងសំខាន់ សម្រាប់ក្រសួងសុខាភិបាល ក្នុងការបង្កើតជាយុទ្ធសាស្ត្រ ដើម្បីធ្វើឱ្យការប្រើប្រាស់តេស្តរហ័សរកជំងឺកូវីដ ១៩ ក្នុងប្រទេសកម្ពុជាយើងកាន់តែប្រសើរឡើង និងកាន់តែទូលំទូលាយ សមស្រប និងត្រឹមត្រូវតាមបទនិយាមស្តង់ដារបស់តេស្តរហ័ស»។
លទ្ធផលសិក្សាស្រាវជ្រាវនេះ ក៏បានបង្ហាញផងដែរថា មានតែ ២០% នៃអ្នកចូលរួមការសិក្សា ដែលធ្លាប់ទិញតេស្តរហ័ស អង់ទីហ្ស៊ែនរកជំងឺកូវីដ ១៩ យល់ថា តេស្តរហ័សនេះមានតម្លៃថោក ខណៈដែលអ្នកចូលរួមការសិក្សាប្រហែលជាពី ៤០-៥០% ទទួលបានតេស្តរហ័សរកជំងឺកូវីដ ១៩ ដោយមិនបង់ប្រាក់កម្រៃ ពីកន្លែងធ្វើការរបស់គាត់។
សេចក្តីប្រកាសថា៖ «តម្លៃថោក និងការណែនាំពីឱសថការី គឺជាកត្តាចម្បងដែលជំរុញឱ្យប្រជាពលរដ្ឋបានធ្វើការជ្រើសរើសតេស្តរហ័សអង់ទីហ្ស៊ែន រកជំងឺកូវីដ ១៩បើយោងតាមចម្លើយផ្តល់ដោយអ្នកចូលរួមការសិក្សារបស់យើង»។
លោក ម៉ម ប៊ុនហេង ក៏បានបង្ហាញដែរថា នេះជាជ័យជម្នះមួយរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំង នឹងជំងឺកូវីដ ១៩ដោយបានដាក់ចេញវិធានការផ្សេងៗទាន់ពេលវេលា និងមានប្រសិទ្ធភាពរហូតកម្ពុជាអាចបើកប្រទេសឡើងវិញទាំងស្រុង និងស្តារនូវខឿនសេដ្ឋកិច្ចជាតិបានឡើងវិញផងដែរ។លោកថា៖ «ប្រទេសកម្ពុជាបានឈរនៅចំណាត់ថ្នាក់លេខ ៤ ក្នុងសន្ទស្សន៍នៃការងើបឡើងវិញរួចផុតពីការចម្លងនៃវីរុសកូវីដ ១៩ របស់ Nikkei និងក្នុង ៤ ខែជាប់ៗគ្នាចុងក្រោយនេះ៕
