.jpg)
អគ្គលេខាធិការអង្គការសហប្រជាជាតិ (UN) លោក Antonio Guterres នឹងមកកាន់កម្ពុជានៅថ្ងៃទី ១០ ខែវិច្ឆិកា ដើម្បីចូលរួមកិច្ចប្រជុំកំពូលអាស៊ាន-UN។ នេះបើយោងតាមសេចក្តីប្រកាសព័ត៌មានប្រចាំថ្ងៃ នាថ្ងៃទី ៣ ខែវិច្ឆិកា របស់ការិយាល័យអ្នកនាំពាក្យរបស់អគ្គលេខាធិការ UN។
សេចក្តីប្រកាសព័ត៌មានបញ្ជាក់ថា៖ «នៅថ្ងៃទី ១០ ខែវិច្ឆិកា លោកអគ្គលេខាធិការនឹងធ្វើដំណើរទៅកាន់ទីក្រុងភ្នំពេញ ប្រទេសកម្ពុជាដែលលោកនឹងថ្លែងសុន្ទរកថាក្នុងកិច្ចប្រជុំកំពូលអាស៊ាន-UN ដោយផ្តោតលើនិន្នាការក្នុងតំបន់ និងពិភពលោក ភាពអាសន្នអាកាសធាតុ និងស្ថានភាពនៅក្នុងប្រទេសមីយ៉ាន់ម៉ា»។
កម្ពុជាដែលជាប្រធានអាស៊ានឆ្នាំនេះនឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធចាប់ពីថ្ងៃទី ១០-១៣ ខែវិច្ឆិកា នៅរាជធានីភ្នំពេញ។ មេដឹកនាំពិភពលោកជាច្រើនគ្រោងនឹងចូលរួមរួមទាំងប្រធានាធិបតីសហរដ្ឋអាមេរិក លោក Joe Biden ផងដែរ។
ដំណើរទស្សនកិច្ចមកទីក្រុងភ្នំពេញរបស់លោក Antonio Guterres គឺធ្វើឡើងបន្ទាប់ពីលោកចូលរួមសន្និសីទស្តីពីការប្រែប្រួលអាកាសធាតុរបស់អង្គការសហប្រជាជាតិឆ្នាំ ២០២២ (COP27) ដែលនឹងប្រព្រឹត្តទៅនៅទីក្រុង Sharm el-Sheikh ប្រទេសអេហ្ស៊ីប។
បន្ទាប់ពីមកកាន់ប្រទេសកម្ពុជាលោកនឹងធ្វើដំណើរទៅកាន់កោះបាលី ប្រទេសឥណ្ឌូនេស៊ី ដើម្បីចូលរួមកិច្ចប្រជុំកំពូលប្រចាំឆ្នាំរបស់បណ្តាប្រទេសអ្នកមានទាំង ២០ (G20) ដែលលោកនឹងថ្លែងសុន្ទរកថាក្នុងសម័យប្រជុំស្តីពីសន្តិសុខស្បៀង ថាមពល និងសុខភាព៕
