សៀមរាបៈ ក្រុមការងារសម្អាតបរិស្ថានអនាម័យនៃអាជ្ញាធរជាតិអប្សរា បានប្រទះឃើញត្រីអារ៉ាប៉ៃម៉ា (Arapaima) ប្រវែងជាង ២ ម៉ែត្រ ទទឹងជិតកន្លះម៉ែត្រ ដែលជាប្រភេទត្រីទឹកសាប មានប្រភពមកពីតំបន់អាម៉ាហ្សូននៅអាមេរិកខាងត្បូងបានស្លាប់នៅក្នុងកសិន្ធប្រាសាទអង្គរវត្ត កាលពីថ្ងៃទី ៣ ខែវិច្ឆិកា។ នេះបើតាមការបញ្ជាក់របស់អាជ្ញាធរជាតិអប្សរា។
អាជ្ញាធរជាតិអប្សរាបានបញ្ជាក់ក្នុងសេចក្តីប្រកាសព័ត៌មាននាថ្ងៃ ៤ ខែវិច្ឆិកាថា ក្រុមការងារអាជ្ញាធរជាតិអប្សរាបានស្រង់យកត្រីនោះមកលើច្រាំងជូនអ្នកជំនាញខាងជលផលពិនិត្យ និងបានកប់នៅផ្នែកខាងជើង នៃកសិន្ធុប្រាសាទអង្គរវត្ត។
សេចក្តីប្រកាសព័ត៌មានបញ្ជាក់ថា៖ «តាមសេចក្តីសន្និដ្ឋានរបស់អ្នកជំនាញផ្នែកជលផល ត្រីនេះស្លាប់ដោយធម្មជាតិ ព្រោះពុំមានស្លាកស្នាមរឹតរួតនៃមង ឬប្រការអ្វីផ្សេងឡើយ។ ត្រីស្លាប់នេះ ជាប្រភេទត្រីដែលស៊ីត្រីតូចជាងខ្លួនជាអាហារ ហើយត្រូវបានមហាជនលួចយកលែងក្នុងកសិន្ធុប្រាសាទអង្គរវត្ត»។
នាពេលកន្លងមក អាជ្ញាធរជាតិអប្សរាធ្លាប់បានហាមឃាត់ការលែងត្រីក្នុងកសិន្ធុ ដែលពុំមែនជាប្រភេទត្រីក្នុងស្រុក ពីព្រោះសកម្មភាពនេះអាចនាំឱ្យមានការបាត់បង់ពូជត្រីធម្មជាតិក្នុងស្រុកផងដែរ៕