ភ្នំពេញៈ ឯកអគ្គរដ្ឋទូតគុយវ៉ែតថ្មីប្រចាំកម្ពុជា លោក Mohamad S SHS Alhajri សន្យាជំរុញការអនុវត្តលើរាល់កិច្ចព្រមព្រៀងផ្ដល់ការងារដល់ពលករកម្ពុជាដែលមានបំណងចង់ទៅធ្វើការនៅប្រទេសគុយវ៉ែត និងការធ្វើពាណិជ្ជកម្មស្បៀងអាហាររវាងប្រទេសទាំង ២ ។
ក្នុងជំនួបជាមួយលោកនាយករដ្ឋមន្ត្រី ហ៊ុន សែន នាថ្ងៃទី ៤ ខែវិច្ឆិកា នៅវិមានសន្តិភាព រាជធានីភ្នំពេញ ឯកអគ្គរដ្ឋទូតគុយវ៉ែតថ្មីរូបនេះបានប្តេជ្ញានឹងខិតខំប្រឹងប្រែង ដើម្បីឱ្យចំណងមិត្តភាព និងកិច្ចសហប្រតិបត្តិការរវាងប្រទេសទាំង ២ កាន់តែរឹងមាំ។
ហ្វេសប៊ុកលោកនាយករដ្ឋមន្ត្រីបញ្ជាក់ក្រោយជំនួបនេះថា៖ «ឯកឧត្តមនឹងជំរុញការអនុវត្តលើរាល់កិច្ចព្រមព្រៀងដែលប្រទេសទាំង ២ មានកន្លងមក។ ក្នុងនោះមានទាំងកិច្ចព្រមព្រៀងលើការហោះហើរត្រង់រវាងប្រទេសទាំង ២ ការផ្ដល់ការងារដល់ពលករកម្ពុជាដែលមានបំណងចង់ទៅធ្វើការនៅប្រទេសគុយវ៉ែត និងការធ្វើពាណិជ្ជកម្មស្បៀងអាហាររវាងប្រទេសទាំង ២»។
លោក ហ៊ុន សែន បានស្វាគមន៍ចំពោះការប្តេជ្ញាចិត្តក្នុងការពង្រីកពង្រឹងមិត្តភាព និងកិច្ចសហប្រតិបត្តិការរវាងប្រទេសទាំង ២ ជាមួយនឹងការប្តេជ្ញាចិត្តជំរុញការអនុវត្តលើកិច្ចព្រមព្រៀងជាមួយគ្នាដែលបានចុះហត្ថលេខាហើយនោះ។
លោកបានផ្ដល់អនុសាសន៍ដល់លោក Mohamad ថា គប្បីពិនិត្យមើលលើវិស័យដទៃទៀត ដែលប្រទេសទាំង ២ អាចសហការគ្នាបាន ពីព្រោះប្រទេសគុយវ៉ែតមានថាមពល ចំណែកឯកម្ពុជាវិញមានស្បៀងអាហារ ដែលលោកគិតថា វិស័យទាំង ២ នេះអាចជំរុញលើវិស័យពាណិជ្ជកម្មបាន ដើម្បីធ្វើយ៉ាងណាឱ្យមានលក្ខណៈបំពេញឱ្យគ្នាទៅវិញទៅមកផងដែរនាពេលខាងមុខ៕