ភ្នំពេញៈ លោកនាយករដ្ឋមន្ត្រី ហ៊ុន សែន ដែលជាប្រធានអាស៊ានឆ្នាំនេះនឹងដឹកនាំកិច្ចប្រជុំកំពូលអាស៊ានលើកទី ៤០ លើកទី ៤១ កិច្ចប្រជុំកំពូលពាក់ព័ន្ធក្នុងក្របខ័ណ្ឌអាស៊ាន និងកិច្ចសន្ទនាអាស៊ានជាសកលលើកទី ២ រយៈពេល ៤ ថ្ងៃ ចាប់ពីថ្ងៃទី ១០ ដល់ទី ១៣ ខែវិច្ឆិកា នៅរាជធានីភ្នំពេញ។
សេចក្តីប្រកាសព័ត៌មានក្រសួងការបរទេសបញ្ជាក់នាថ្ងៃទី ៤ ខែវិច្ឆិកា ថា មន្ត្រីដែលអមលោក ហ៊ុន សែន រួមមាន លោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និង លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ព្រមទាំងមន្ត្រីជាន់ខ្ពស់នៃរាជរដ្ឋាភិបាលមួយចំនួនផងដែរ។
ព្រឹត្តិការណ៍ថ្នាក់កំពូលនេះ រួមមានកិច្ចប្រជុំកំពូលអាស៊ានលើកទី ៤០ និងលើកទី ៤១ កិច្ចប្រជុំកំពូលអាស៊ាន-ចិន លើកទី ២៥ កិច្ចប្រជុំកំពូលអាស៊ាន-ជប៉ុន លើកទី ២៥ កិច្ចប្រជុំកំពូលអាស៊ាន-សាធារណរដ្ឋកូរ៉េ លើកទី ២៣ កិច្ចប្រជុំកំពូលអាស៊ានបូក ៣ លើកទី ២៥ កិច្ចប្រជុំកំពូលរំឭកខួប ៣០ ឆ្នាំនៃទំនាក់ទំនងដៃគូសន្ទនាអាស៊ាន-ឥណ្ឌា កិច្ចប្រជុំកំពូលអាស៊ាន-សហរដ្ឋអាមេរិក លើកទី ១០ កិច្ចប្រជុំកំពូលអាស៊ាន-អូស្ត្រាលី លើកទី ២ កិច្ចប្រជុំកំពូលរំព្ញកខួបនៃទំនាក់ទំនងអាស៊ាន-កាណាដា កិច្ចប្រជុំកំពូលអាស៊ាន-អង្គការសហប្រជាជាតិ និងកិច្ចប្រជុំកំពូលអាស៊ីបូព៌ាលើកទី ១៧ ។
សេចក្តីប្រកាសព័ត៌មានបន្តថា នៅមុនពេលចាប់ផ្តើមកិច្ចប្រជុំកំពូលប្រមុខរដ្ឋ និងប្រមុខរាជរដ្ឋាភិបាលអាស៊ាននឹងជួបសវនាការជាមួយព្រះមហាក្សត្រកម្ពុជានៅក្នុងព្រះបរមរាជវាំង។ លោក ហ៊ុន សែន រួមជាមួយប្រមុខរដ្ឋ និងប្រមុខរាជរដ្ឋាភិបាលអាស៊ានដទៃទៀត នឹងចូលរួមកម្មវិធីជំនួបដោយឡែកពីគ្នាជាមួយតំណាងនៃអន្តរសភាអាស៊ាន តំណាងនៃយុវជនអាស៊ាន និងតំណាងនៃក្រុមប្រឹក្សាអ្នកប្រឹក្សាធុរកិច្ចអាស៊ាន។
សេចក្តីប្រកាសព័ត៌មានបញ្ជាក់ថា៖ «ថ្នាក់ដឹកនាំក៏នឹងចូលរួមក្នុងកិច្ចសន្ទនាអាស៊ានជាសកលលើកទី ២ ស្តីពីការស្តារឡើងវិញក្រោយជំងឺកូវីដ ១៩ ដែលនឹងមានការអញ្ជើញចូលរួមពីប្រធានអង្គការអន្តរជាតិសំខាន់ៗមួយចំនួនផងដែរ។ ថ្នាក់ដឹកនាំនៃដៃគូសន្ទនាអាស៊ានមួយចំនួន ក៏រំពឹងថានឹងចូលរួមក្នុងកិច្ចសន្ទនានេះផងដែរ»។
នៅក្នុងពិធីបិទកិច្ចប្រជុំកំពូលអាស៊ាន លោក ហ៊ុន សែន នឹងប្រគល់ញញួរប្រធានអាស៊ានជូន លោក ចូកូ វីដូដូ ប្រធានាធិបតីឥណ្ឌូនេស៊ីជាប្រធានអាស៊ានប្តូរវេននៅឆ្នាំក្រោយ។
នៅរវាងកិច្ចប្រជុំដែលបានគ្រោងលោកនាយករដ្ឋមន្ត្រី ហ៊ុន សែន ក៏នឹងមានជំនួបទ្វេភាគីជាមួយប្រមុខប្រតិភូមួយចំនួនផងដែរ។
ក្នុងការត្រៀមរៀបចំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ លោក ប្រាក់ សុខុន នឹងដឹកនាំកិច្ចប្រជុំក្រុមប្រឹក្សាសហគមន៍ នយោបាយសន្តិសុខអាស៊ាន លើកទី ២៥ និងកិច្ចប្រជុំក្រុមប្រឹក្សាសម្របសម្រួលអាស៊ានលើកទី ៣១ ។
លោក ប្រាក់ សុខុន ក៏នឹងធ្វើជាអធិបតីក្នុងពិធីចុះហត្ថលេខាលើលិខិតុបករណ៍នៃការចូលជាភាគីនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍ (TAC) ដោយប្រទេសអ៊ុយក្រែន និងអេស្ប៉ាញ។ លោក ក៏រំពឹងថានឹងមានជំនួបទ្វេភាគីជាមួយរដ្ឋមន្ត្រីការបរទេស និងឥស្សរជនមួយចំនួនផងដែរ៕