ភ្នំពេញៈ លោក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញបានដាក់បញ្ជាដល់កម្លាំងនគរបាលក្រោមឱវាទគ្រប់ផ្នែក និងគ្រប់ជំនាញចាប់ផ្តើមពង្រឹងសន្តិសុខ ក្នុងរាជធានីភ្នំពេញ ធានាឱ្យបាននូវសេចក្តីសុខសុវត្ថិភាពជាដាច់ខាត និងក៏បានអំពាវនាវដល់ប្រជាពលរដ្ឋចូលរួមថែរក្សាសណ្តាប់ធ្នាប់ សុវត្ថិភាពសង្គមឱ្យបានល្អ ដើម្បីកិត្តិយសមុខមាត់របស់ប្រទេស និងប្រជាជនកម្ពុជា នៅគ្រាដែលកម្ពុជាធ្វើជាម្ចាស់ផ្ទះ រៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ដែលមានវត្តមានថ្នាក់នាំកំពូលៗនៅលើពិភពលោកអញ្ជើញចូលរួម ក្នុងកិច្ចប្រជុំដ៏មានសារៈសំខាន់នាពេលប៉ុន្មានថ្ងៃខាងមុខនេះ។
ការដាក់បទបញ្ជាបានធ្វើឡើង នារសៀលថ្ងៃទី ៣ ខែវិច្ឆិកា ឆ្នាំ ២០២២ នៅស្នងការដ្ឋាននគរបាលរាជធានីភ្នំពេញ ក្នុងកិច្ចប្រជុំផ្សព្វផ្សាយផែនការការពារសន្តិសុខ សណ្តាប់ធ្នាប់ និងសុវត្ថិភាព ក្នុងឱកាសកិច្ចប្រជុំកំពូលអាស៊ាន លើកទី ៤០ និងលើកទី ៤១ និងកិច្ចប្រជុំពាក់ព័ន្ធឆ្នាំ ២០២២ ដល់ស្នងការរង នាយការិយាល័យជំនាញទាំង ៣៣ និងលោកអធិការនគរបាលខណ្ឌទាំង ១៤ នៅគ្រាដែលកិច្ចប្រជុំកំពូលអាស៊ានគ្រោងនឹងចាប់ផ្តើមធ្វើឡើងចាប់ពីថ្ងៃទី ៨ រហូតដល់ថ្ងៃទី ១៣ ខែវិច្ឆិកា ឆ្នាំ ២០២២ ។
បើយោងតាមការចុះផ្សាយរបស់អគ្គស្នងការដ្ឋាននគរបាលជាតិនៅថ្ងៃទី ៤ ខែវិច្ឆិកានេះ លោកឧត្តមសេនីយ៍ឯក ស ថេត ក៏បានដាក់បទបញ្ជាបន្ថែមទៀត ឱ្យកងកម្លាំងនគរបាលរាជធានីភ្នំពេញត្រូវទទួលខុសត្រូវខ្ពស់លើការងារចំពោះមុខដែលថ្នាក់លើប្រគល់ជូនក្នុងនោះត្រូវប្រមូលកម្លាំង ឧបករណ៍សម្ភារឱ្យបានគ្រប់គ្រាន់តាមផែនការការពារ ដើម្បីប្រើប្រាស់ឱ្យអស់លទ្ធភាព ជំរុញពង្រឹងយកចិត្តទុកដាក់លើការត្រួតពិនិត្យអាវុធជាតិផ្ទុះនៅពេលយប់ ការងារចុះល្បាតនៅតាមមូលដ្ឋាន ការក្តាប់ព័ត៌មានផ្សេងៗ ការចុះធ្វើការងាររដ្ឋបាល ជំរុញការត្រួតពិនិត្យពង្រឹងការពារឱ្យបានតឹងរ៉ឹងលើតម្រាយផ្លូវរបស់គណៈប្រតិភូជាតិ អន្តរជាតិ ឆ្លងកាត់ និងកន្លែងស្នាក់នៅរបស់គណៈប្រតិភូ និងកន្លែងគោលដៅកិច្ចប្រជុំជាដើមនោះ។
បើយោងតាមអ្នកនាំពាក្យរបស់អគ្គស្នងការដ្ឋាននគរបាលជាតិ លោក ឧត្តមសេនីយ៍ឯក ឆាយ គឹមខឿន ប្រាប់អ្នកសារព័ត៌មានឱ្យដឹងថា នឹងមានការប្រើប្រាស់កម្លាំងការពារប្រមាណជាង ១ ម៉ឺននាក់ មកពីអង្គភាពចំនួន ១៤ ស្ថាប័នដែលពាក់ព័ន្ធរួមទាំងមានការប្រើប្រាស់រថយន្តការពារគ្រាប់ និងមានទាំងផ្លូវអាកាស ផ្លូវទឹក ផងដែរ៕