កណ្តាលៈ លោក​ ស៊ុន ចាន់ថុល រដ្ឋមន្ត្រី​ក្រសួង​សាធារណការ​ និង​ដឹកជញ្ជូន អមដំណើរ​ដោយ​ថ្នាក់ដឹកនាំ​ក្រសួង​បាន​ចុះ​ត្រួតពិនិត្យ​ស្ពាន​ព្រែកតាមាក់ ក្នុងស្រុក​មុខកំពូល​ខេត្ត​កណ្តាល ដោយ​ប្រើ​រថយន្ត​បំពាក់​ឧបករណ៍​អង្កេត​ពិនិត្យ​ស្ពាន និង​ឧបករណ៍​បច្ចេកទេស​ទំនើប​ថ្មីៗ​មួយចំនួន ដែល​ក្រសួង​បាន​បញ្ជា​ទិញយក​មកប្រើប្រាស់ ដើម្បី​សម្រួល​លើ​ការងារ​ត្រួតពិនិត្យ និង​ថែទាំ​ស្ពាន​ឱ្យ​កាន់តែ​មាន​ភាពងាយស្រួល និង​សុវត្ថិភាព​។

បើតាម​ហ្វេសប៊ុក​ក្រសួង​សាធារណការ​ចុះផ្សាយ​នៅ​ថ្ងៃទី ​៣ ​វិច្ឆិកា​បាន​ឱ្យ​ដឹងថា ការដឹកនាំ​ក្រុម​ការងារ​បច្ចេកទេស​ចុះ​ពិនិត្យ​ស្ថានភាព​គុណភាព​ស្ពាន​ព្រែកតាមាក់ កាលពី​ថ្ងៃទី​ ២ ​វិច្ឆិកា របស់​លោក​ ស៊ុន ចាន់ថុល ​គឺ​បាន​ប្រើប្រាស់​រថយន្ត​បំពាក់​ឧបករណ៍​អង្កេត​ពិនិត្យ​ស្ពាន រ៉ូបូត ​ត្រួតពិនិត្យ​ខ្សែកាប​ស្ពាន និង​ឧបករណ៍​ត្រួតពិនិត្យ​លំញ័រ​ស្ពាន​ផងដែរ​។

ការចុះពិនិត្យ​នេះ​ធ្វើឡើង​ក្នុង​គោលបំណង​ដើម្បី​សិក្សា​ស្វែងយល់​ពី​ស្ថានភាព​ជាក់ស្ដែង​របស់​ស្ពាន​ព្រែកតាមាក់ ក៏ដូចជា​ដើម្បី​បង្ហាញ​ពី​របៀប​ប្រើប្រាស់​គ្រឿងចក្រ និង​ឧបករណ៍​បច្ចេកទេស​ថ្មីៗ​ជូន​ទៅ​កាន់​ថ្នាក់ដឹកនាំ​ក្រសួង និង​មន្ត្រី​បច្ចេកទេស​ពាក់ព័ន្ធ​សំដៅ​ពង្រឹង និង​ពង្រីក​បន្ថែម​លើ​សមត្ថភាព​ការងារ​ថែទាំ ហេដ្ឋារចនាសម្ព័ន្ធ​ស្ពាន​នៅ​ទូទាំង​ប្រទេស​។

ក្នុង​ដំណើរ​ចុះ​បំពេញ​ការងារ​នេះ លោក​ទេសរដ្ឋមន្ត្រី​បាន​ចុះទៅពិនិត្យ​ដោយផ្ទាល់​នូវ​សំណង់​បាត​ស្ពាន​ផ្នែក​ខាងក្រោម​នៃ​ស្ពាន​ព្រែកតាមាក់ តាមរយៈ​រថយន្ត​បំពាក់​ឧបករណ៍​អង្កេត​ពិនិត្យ​ស្ពាន​មួយ​នេះ ដើម្បី​ពិនិត្យ​ឱ្យ​ដឹងថា ស្ពាន​មាន​ស្នាម​ប្រេះស្រាំ និង​បញ្ហា​ខូច​ឬ​យ៉ាងណា​។

បន្ទាប់ពី​ការចុះពិនិត្យ​ដោយផ្ទាល់​រួចមក លោក​ ស៊ុន ចាន់ថុល បាន​លើកឡើង​ថា ការប្រើប្រាស់​រថយន្ត​បំពាក់​ឧបករណ៍​អង្កេត​ពិនិត្យ​ស្ពាន​នេះ​បាន​ផ្តល់​នូវ​ភាពងាយស្រួល និង​មាន​ភាពសុក្រឹត្យ​ជាង​ការចុះ​ពិនិត្យ​មើល​បាត​ស្ពាន​កាលពីពេល​កន្លងមក ដែល​ដោយ​គ្មាន​ឧបករណ៍​ប្រភេទ​នេះ​។

លោក​បញ្ជាក់​ថា រថយន្ត​ដែល​បំពាក់​ឧបករណ៍​អង្កេត​ពិនិត្យ​ស្ពាន​ប្រភេទ​នេះ មាន​លក្ខណៈ​ទំនើប​មាន​សមត្ថភាព​ខ្ពស់​អាច​ផ្ទុក​មនុស្ស​បាន​ប្រមាណ ​១០ ​នាក់​សម្រាប់​ការចុះទៅ​ពិនិត្យមើល​បាត​ស្ពាន​៕