.jpg)
ប្រធានាធិបតីប្រទេសអ៊ុយក្រែន លោក វ៉ូឡូឌីមៀ ហ្ស៊ែលឡិនស្គី។ រូបថត AFP
ភ្នំពេញៈ អ៊ុយក្រែននឹងចុះហត្ថលេខាចូលជាភាគីនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍ (TAC) ក្នុងអំឡុងពេលនៃកិច្ចប្រជុំកំពូលអាស៊ាននៅរាជធានីភ្នំពេញនៅក្នុងសប្តាហ៍ក្រោយ ក្រោមអធិបតីភាពលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា។
សេចក្តីប្រកាសព័ត៌មានក្រសួងការបរទេសកម្ពុជាបញ្ជាក់នាថ្ងៃទី ៤ ខែវិច្ឆិកា នេះថា៖ «ឯកឧត្តមឧបនាយករដ្ឋមន្ត្រី [លោក ប្រាក់ សុខុន ] ក៏នឹងអញ្ជើញជាអធិបតីក្នុងពិធីចុះហត្ថលេខាលើលិខិតុបករណ៍នៃការចូលជាភាគីនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍ (TAC) ដោយប្រទេសអ៊ុយក្រែន និងអេស្ប៉ាញ»។
នៅមុនការចាប់ផ្តើមកិច្ចប្រជុំកំពូលអាស៊ានប្រមាណ ១ សប្តាហ៍ លោកនាយករដ្ឋមន្ត្រី ហ៊ុន សែន និងលោក វ៉ូឡូឌីមៀ ហ្ស៊ែលឡិនស្គី (Volodymyr Zelensky) ប្រធានាធិបតីប្រទេសអ៊ុយក្រែន បានជួបសន្ទនាតាមទូរសព្ទ។
នៅក្នុងជំនួបនោះ លោក Zelensky បានថ្លែងនូវអំណរអរគុណចំពោះសេចក្តីថ្លែងការណ៍ទាំង ៣ របស់អាស៊ានដែលគាំទ្រដល់អ៊ុយក្រែន និងកិច្ចខិតខំប្រឹងប្រែងរបស់កម្ពុជាចំពោះសំណើអ៊ុយក្រែនសុំចូលជាភាគី TAC នេះ។
លោក ហ៊ុន សែន បញ្ជាក់ប្រាប់លោក Zelensky ថា កម្ពុជានឹងបន្តធ្វើការងារជាមួយប្រទេសសមាជិកអាស៊ានផ្សេងទៀត ដើម្បីឆ្លើយតបនឹងបំណងរបស់អ៊ុយក្រែនក្នុងការចូលជាដៃគូសន្ទនាតាមវិស័យរបស់អាស៊ាន៕
