.jpg)
រូបភាព ក្រសួងរ៉ែ និងថាមពល
ភ្នំពេញៈ ក្នុងនាមជាប្រធានថាមពលអាស៊ាន កម្ពុជាកាលពីថ្ងៃទី ៤ ខែវិច្ឆិកា បានធ្វើជាម្ចាស់ផ្ទះនៃវេទិកាតុមូលថាមពលស្អាតអាស៊ានបូក ៣ លើកទី ៥ ដើម្បីបង្កើនថាមពលកកើតឡើងវិញស្របតាមគន្លងអន្តរកាលកាបូនទាបអាស៊ាន។
វេទិកានេះដឹកនាំដោយលោក វិចទ័រ ហ្សូនា អនុរដ្ឋលេខាធិការក្រសួងរ៉ែ និងថាមពល និងជាឧត្តមមន្ត្រីថាមពលអាស៊ាន តាមប្រព័ន្ធអនឡាញ (Online) ដោយមានការចូលរួមពីតំណាងក្រសួងស្ថាប័នពាក់ព័ន្ធថ្នាក់ជាតិ បណ្តាប្រទេសជាសមាជិកអាស៊ាន មជ្ឈមណ្ឌលថាមពលអាស៊ាន និងដៃគូអភិវឌ្ឍន៍ពាក់ព័ន្ធ។
ក្រសួងរ៉ែ និងថាមពលបានបញ្ជាក់ក្នុងហ្វេសប៊ុកនាថ្ងៃទី ៤ ខែវិច្ឆិកា ថា របៀបវារៈនៃវេទិកានេះផ្តោតលើការចែករំលែកអំពីគោលនយោបាយ និងការអភិវឌ្ឍថាមពលរបស់អាស៊ានបូក ៣ និងការបង្ហាញអំពីលទ្ធផលនៃការសិក្សាស្រាវជ្រាវថាមពលស្អាត និងការចូលរួមចំណែករបស់ថាមពលកកើតឡើងវិញទៅក្នុងសេដ្ឋកិច្ច សង្គមនិងបរិស្ថាន។
វេទិកានេះក៏មានជជែកដេញដោលអំពីការរៀបចំគោលនយោបាយរបស់ប្រទេសសមាជិកអាស៊ានឆ្ពោះទៅរកការអភិវឌ្ឍកាបូនទាប និងជជែកដេញដោលស្តីពីផែនការអន្តរកាលរបស់ប្រទេសសមាជិកអាស៊ាន៕
