ភ្នំពេញៈ អ្នកជំនាញលើកឡើងថា ការបង្កើតលេខាធិការដ្ឋាននៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) គឺជាតម្រូវការចាំបាច់មួយដើម្បីសម្រេចបាននូវការអនុវត្តប្រកបដោយប្រសិទ្ធភាព នៃកិច្ចព្រមព្រៀងនេះ ដោយសារកិច្ចព្រមព្រៀងនេះមានវិសាលភាពធំទូលាយ គុណភាពខ្ពស់ និងមានភាពគ្រប់ជ្រុងជ្រោយ។
អ្នកជំនាញលើកឡើងដូច្នេះក្នុងវេទិកាជាន់ខ្ពស់ស្ដីពីគម្រប់ខួប ១០ ឆ្នាំ នៃកិច្ចព្រមព្រៀង RCEP (អាសិប) ដែលរៀបចំដោយក្រសួងពាណិជ្ជកម្មកម្ពុជា កាលពីថ្ងៃទី ២-៣ ខែវិច្ឆិកា ក្រោមការគាំទ្រពីវិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា (ERIA) និងលេខាធិការដ្ឋានអាស៊ាន ក្រោមអធិបតីភាពលោកនាយករដ្ឋមន្ត្រី ហ៊ុន សែន។
សេចក្តីប្រកាសព័ត៌មានលទ្ធផលនៃវេទិកានេះបញ្ជាក់នាថ្ងៃទី ៤ ខែវិច្ឆិកាថា វេទិកានេះមានកិច្ចពិភាក្សាកម្រិតខ្ពស់ជាច្រើនវគ្គ ដែលវាគ្មិនជាថ្នាក់ដឹកនាំនៃប្រទេសក្នុងតំបន់ អ្នកស្រាវជ្រាវជាន់ខ្ពស់របស់ស្ថាប័នឯករាជ្យអន្តរជាតិ និងអ្នកជំនាញកិច្ចការអាសិបជាច្រើននាក់ បានធ្វើបទបង្ហាញ និងពិភាក្សាដេញដោលស៊ីជម្រៅជុំវិញការវិវត្ត និងខ្លឹមសារនៃកិច្ចព្រមព្រៀងនេះ។
ពាក់ព័ន្ធនឹងភាពជាអ្នកដឹកនាំក្នុងកិច្ចព្រមព្រៀងអាសិប វាគ្មិនបានបង្ហាញសុទិដ្ឋិនិយមថា អាស៊ាននឹងនៅតែរក្សាបាននូវគុណតម្លៃ និងមជ្ឈភាពរបស់ខ្លួន ដោយសារកិច្ចព្រមព្រៀងនេះនៅតែផ្ដល់ឱកាសដល់អាស៊ានក្នុងការសម្របសម្រួល និងធ្វើសុខុដុមនីយកម្ម រវាងកិច្ចព្រមព្រៀងពាណិជ្ជកម្មសេរីអាស៊ាន+១ ដែលអាស៊ានមានស្រាប់ជាមួយដៃគូពាណិជ្ជកម្មទាំង ៥ ដែលមានចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។
សេចក្តីប្រកាសព័ត៌មានបញ្ជាក់ថា៖ «មិនតែប៉ុណ្ណោះ កិច្ចព្រមព្រៀងនេះផ្តល់តម្លៃដល់សហគ្រិនធុនតូច និងមធ្យម និងការគិតគូរដល់បរិស្ថាន សំដៅជំរុញការអភិវឌ្ឍប្រកបដោយចីរភាពនិងផ្តល់របៀបវារៈបន្ថែមសម្រាប់វិស័យដទៃនៅពេលអនាគតផងដែរ»។
នៅក្នុងលក្ខខណ្ឌនៃសេរីភាវូបនីយកម្ម និងការបង្កើតវិធានពាណិជ្ជកម្មអន្តរជាតិ វាគ្មិនបានគូសបញ្ជាក់ថា កិច្ចព្រមព្រៀងអាសិបចាំបាច់ត្រូវពិនិត្យឡើងវិញ និងធ្វើបច្ចុប្បន្នកម្មនូវខ្លឹមសារនៃកិច្ចព្រមព្រៀង ដើម្បីបម្រើដល់ការបែងចែកកម្លាំងពលកម្មអន្តរជាតិប្រកបដោយថាមវន្តក្នុងតំបន់អាស៊ីបូព៌ាជាពិសេស៕