ភ្នំពេញៈ លោក ហេង សំរិន ប្រធានរដ្ឋសភាកម្ពុជានឹងដឹកនាំគណៈប្រតិភូជាន់ខ្ពស់សភានៃបណ្តាប្រទេសជាសមាជិកអន្តរសភាអាស៊ាន (AIPA) ចូលរួមកិច្ចប្រជុំទល់មុខគ្នារវាងអាស៊ាន និង AIPA (អាយប៉ា) នាកិច្ចប្រជុំកំពូលអាស៊ានដែលនឹងប្រព្រឹត្តទៅនៅរសៀលថ្ងៃទី ១០ ខែវិច្ឆិកា នៅសណ្ឋាគារសុខាភ្នំពេញ រាជធានីភ្នំពេញ។
លោក ជាម យៀប អនុប្រធានទី១ នៃរដ្ឋសភា និងជាប្រធានគណៈប្រតិភូសភាកម្ពុជា នឹងចូលរួមផ្តល់នូវអនុសាសន៍ដោយផ្តោតសំខាន់លើបញ្ហាគន្លឹះដែលជាការប្រឈមរួមរបស់ប្រទេសជាសមាជិក AIPA និងអាស៊ាន នៅក្នុងកិច្ចប្រជុំរៀបចំសេចក្តីព្រាងសារ AIPA នាព្រឹកថ្ងៃទី ១០ ខែវិច្ឆិកា នៅសណ្ឋាគារកាំបូឌីយ៉ាណា រាជធានីភ្នំពេញ។
សេចក្តីប្រកាសព័ត៌មានរដ្ឋសភាបញ្ជាក់នាថ្ងៃទី ៤ ខែវិច្ឆិកា ថា៖ «គណៈប្រតិភូសភានៃបណ្តាប្រទេសជាសមាជិកអាយប៉ានឹងនាំយកនូវធាតុចូលដែលជាទស្សនៈរួមក្នុងនាមប្រទេសជាសមាជិកអាយប៉ាសម្រាប់ដាក់បញ្ចូលទៅក្នុងសារដែលនឹងត្រូវថ្លែងដោយសម្តេចអគ្គមហាពញាចក្រី ហេង សំរិនប្រធានរដ្ឋសភា និងជាប្រធានប្តូរវេនអន្តរសភាអាស៊ាន (អាយប៉ា) លើកទី៤៣ នៅចំពោះមុខថ្នាក់ដឹកនាំអាស៊ាន»។
កិច្ចប្រជុំទល់មុខគ្នារវាងអាស៊ាន និង AIPA ដែលបានរៀបចំឡើងនៅរាល់កិច្ចប្រជុំកំពូលអាស៊ាន គឺជាជំនួបផ្លូវការកម្រិតខ្ពស់បំផុតរបស់អាស៊ាន និង AIPA ដើម្បីពង្រឹង និងពង្រីកកិច្ចសហប្រតិបត្តិការរវាងស្ថាប័នទាំង២។
កិច្ចប្រជុំទល់មុខគ្នានេះធ្វើឡើងក៏ដើម្បីពិភាក្សាស៊ីជម្រៅលើកិច្ចការរបស់អាស៊ាននៅគ្រប់កម្រិត ក្នុងន័យឆ្ពោះទៅរកគោលបំណងរួមរបស់អាស៊ានគឺ សន្តិភាព ស្ថិរភាព និងគោលដៅអភិវឌ្ឍន៍ប្រកបដោយចីរភាព ជាមួយនឹងការពន្លឿន និងជំរុញឱ្យសម្រេចបាននូវសហគមន៍អាស៊ានមួយ និងត្រៀមខ្លួនសម្រាប់ការពង្រីកអាស៊ាននាពេលអនាគត។
កិច្ចប្រជុំរវាងថ្នាក់ដឹកនាំអាស៊ាន និង AIPA លើកទី១ ត្រូវបានចាប់ផ្តើមអនុវត្តន៍ជាលើកដំបូង នាំកិច្ចប្រជុំកំពូលអាស៊ានលើកទី១៤ នៅឆ្នាំ ២០០៩ នៅខេត្តហ៊ួហ៊ីន ប្រទេសថៃ ក្រោមគំនិតផ្តួចផ្តើមរបស់សភាប្រទេសសមាជិកAIPA និងអាស៊ាន។
ចាប់ពីពេលនោះមក កិច្ចប្រជុំនេះ បានប្រព្រឹត្តទៅចំនួន ១០ លើករួចមកហើយ ដែលលើកចុងក្រោយនៅឆ្នាំ ២០២០ ធ្វើឡើងនៅទីក្រុងហាណូយ ប្រទេសវៀតណាម តាមប្រព័ន្ធនិម្មិត។ ឆ្នាំនេះជាកិច្ចប្រជុំលើកទី១១ ដែលសភាកម្ពុជាបានទទួលរៀបចំ និងដឹកនាំកិច្ចប្រជុំទល់មុខគ្នារវាងអាស៊ាន និង AIPA នេះ៕