.jpg)
ឯកអគ្គរាជទូតអូស្ត្រាលីប្រចាំកម្ពុជា លោក Pablo Kang (កណ្ដាល)។
ភ្នំពេញៈ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្ដិ និងឯកអគ្គរាជទូតអូស្ត្រាលីប្រចាំកម្ពុជា លោក Pablo Kang បានប្រកាសពីការប្ដេជ្ញាចិត្តក្នុងការបន្តជំរុញឱ្យកិច្ចសហប្រតិបត្តិការសេដ្ឋកិច្ចរវាងប្រទេសកម្ពុជា និងអូស្ត្រាលីឱ្យកាន់តែល្អប្រសើរឡើងថែមទៀត។
ភាគីទាំង ២ បានប្តេជ្ញាចិត្តដូច្នេះក្នុងជំនួបនាថ្ងៃទី ៤ ខែវិច្ឆិកា នៅទីស្ដីការក្រសួងពាណិជ្ជកម្ម និងបានផ្លាស់ប្ដូរយោបល់លើវឌ្ឍនភាពការបញ្ចប់ការចរចាដំឡើងកម្រិតនៃកិច្ចព្រមព្រៀងពាណិជ្ជកម្មសេរីអាស៊ាន-អូស្ត្រាលី-នូវែលសេឡង់ (AANZFTA)។
ភាគីទាំង ២ ក៏បានពិភាក្សាអំពីការត្រៀមរៀបចំកិច្ចប្រជុំពិសេសថ្នាក់រដ្ឋមន្ត្រីសេដ្ឋកិច្ចអាស៊ាន-អូស្ត្រាលី-នូវែលសេឡង់ ព្រមទាំងសកម្មភាពកិច្ចសហប្រតិបត្តិការលើការអភិវឌ្ឍសេដ្ឋកិច្ចក្រោមជំនួយបច្ចេកទេសរបស់អូស្ត្រាលី។
ហ្វេសប៊ុកក្រសួងពាណិជ្ជកម្មបញ្ជាក់នាថ្ងៃទី ៥ ខែវិច្ឆិកាថា៖ «ភាគីទាំង ២ បានសម្ដែងការពេញចិត្តចំពោះវឌ្ឍនភាពនៃកិច្ចសហប្រតិបត្តិការសេដ្ឋកិច្ចរវាងប្រទេសទាំង ២ ព្រមទាំងបានសម្ដែងនូវការប្ដេជ្ញាចិត្តបន្តជំរុញឱ្យកិច្ចសហប្រតិបត្តិការល្អនេះឱ្យកាន់តែល្អប្រសើរឡើងថែមទៀត»។
ហ្វេសប៊ុកដដែលបញ្ជាក់ ថា លោក Pablo Kang បានលើកឡើងពីកិច្ចសហការល្អរវាងប្រទេសកម្ពុជា និងអូស្ត្រាលី និងបានកោតសរសើរអំពីភាពជោគជ័យរបស់កម្ពុជាក្នុងការប្រយុទ្ធប្រឆាំងនឹងការរីករាលដាលនៃជំងឺកូវីដ១៩ ផងដែរ។
ប្រភពដដែលបន្តថា នៅក្នុងជំនួបនេះ ភាគីទាំង ២ បានពិភាក្សាគ្នាអំពីទស្សនទានល្អៗចំពោះវឌ្ឍនភាពនៃការចរចាដំឡើងកម្រិតកិច្ចព្រមព្រៀង AANZFTA ដែលស្ថិតក្រោមភាពជាប្រធានអាស៊ានរបស់កម្ពុជា ដោយបានទទួលវឌ្ឍនភាពគួរឱ្យកត់សម្គាល់ នឹងឈានដល់ការបញ្ចប់ជាដុំកំភួនលើការចរចាដំឡើងកម្រិតនៃកិច្ចព្រមព្រៀងនេះនាពេលខាងមុខ។
ភាគីទាំង ២ ក៏បានពិភាក្សាគ្នាអំពីការរៀបចំកិច្ចប្រជុំពិសេសថ្នាក់រដ្ឋមន្ត្រីសេដ្ឋកិច្ចអាស៊ាន-អូស្ត្រាលី-នូវែលសេឡង់ នៅអំឡុងពេលកិច្ចប្រជុំរដ្ឋមន្ត្រីក្រុមប្រឹក្សាសហគមន៍សេដ្ឋកិច្ចអាស៊ានលើកទី២១ នាពេលខាងមុខ នៅរាជធានីភ្នំពេញ៕
