.jpg)
លោក ស ខេង រដ្ឋមន្ត្រីក្រសួងមហាផ្ទៃ ក្នុងជំនួបជាមួយ លោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា។ រូបភាព ក្រសួងមហាផ្ទៃ
ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃបានចាត់ទុកវត្តមានរបស់ លោក Joe Biden ប្រធានាធិបតីសហរដ្ឋអាមេរិក ក្នុងកិច្ចប្រជុំកំពូលអាស៊ានខាងមុខនេះ ថាជាការលើកកម្ពស់នូវទំនាក់ទំនង និងកិច្ចសហប្រតិបត្តិការរវាងប្រទេសទាំង ២ ហើយលោកជឿជាក់ថា កិច្ចសហប្រតិបត្តិការ និងទំនាក់ទំនងរវាងប្រទេសទាំង ២ នឹងបន្តរីកចម្រើន។
លោកលើកឡើងដូច្នេះក្នុងជំនួបជាមួយ លោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា នាថ្ងៃទី ៤ ខែវិច្ឆិកា។
លោក ស ខេង ថ្លែងថា នាពេលឆាប់ៗដ៏ខ្លីខាងមុខ ថ្នាក់ដឹកនាំ មន្ត្រីរាជការ និងប្រជាជនកម្ពុជានឹងទទួលស្វាគមន៍បណ្ដាថ្នាក់ដឹកនាំក្នុងតំបន់ និងអន្តរជាតិដែលនឹងមកចូលរួមកិច្ចប្រជុំកំពូលអាស៊ាននៅកម្ពុជា ក្នុងនោះក៏មានវត្តមានលោក Joe Biden ផងដែរ។
សេចក្តីប្រកាសព័ត៌មានក្រសួងមហាផ្ទៃបញ្ជាក់ក្រោយជំនួបថា៖ «សម្ដេចក្រឡាហោមបានចាត់ទុកវត្តមានរបស់ឯកឧត្តមប្រធានាធិបតី ថា មិនត្រឹមតែជាការផ្តល់តម្លៃលើទំនាក់ទំនងរវាងកម្ពុជា និងអាស៊ានរវាងសហរដ្ឋអាមេរិក និងអាស៊ានប៉ុណ្ណោះទេ ក៏ប៉ុន្តែក៏ជាការផ្តល់តម្លៃ និងជាការលើកកម្ពស់នូវទំនាក់ទំនង និងកិច្ចសហប្រតិបត្តិការរវាងសហរដ្ឋអាមេរិក និងកម្ពុជាផងដែរ។
សេចក្តីប្រកាសព័ត៌មានបន្តថា៖ «សម្ដេចសង្ឃឹមជឿជាក់ថា កិច្ចសហប្រតិបត្តិការ និងទំនាក់ទំនងរវាងប្រទេសទាំងពីរនឹងបន្តរីកចម្រើនឥតឈប់ឈរ»។
ប្រភពដដែលបញ្ជាក់ថា លោក Murphy បានចូលរួមអបអរសាទរចំពោះកម្ពុជាក្នុងតួនាទីជាប្រធានអាស៊ាន ហើយលោកក៏រំពឹងថា នឹងចូលរួមនៅក្នុង «ព្រឹត្តិការណ៍ដ៏មានសារៈសំខាន់» នៅពេលខាងមុខនេះផងដែរ។
សេចក្តីប្រកាសព័ត៌មានបន្ថែមថា លោក Murphy បានថ្លែងអំណរគុណដល់អាជ្ញាធរកម្ពុជា និងគ្រប់ស្ថាប័នពាក់ព័ន្ធ ដែលបានជួយសម្របសម្រួលដល់សំណើផ្សេងៗក្នុងការសម្រួលដំណើរទស្សនកិច្ចរបស់ថ្នាក់ដឹកនាំសហរដ្ឋអាមេរិកមកកាន់កម្ពុជា ដើម្បីចូលរួមកិច្ចប្រជុំកំពូលអាស៊ានខាងមុខនេះ។
លោក Joe Biden គ្រោងនឹងមកកម្ពុជា នៅថ្ងៃទី ១២ និងថ្ងៃទី ១៣ ខែវិច្ឆិកា ខាងមុខនេះ ដើម្បីចូលរួមក្នុងកិច្ចប្រជុំកំពូលប្រចាំឆ្នាំរវាងសហរដ្ឋអាមេរិក និងអាស៊ាន និងកិច្ចប្រជុំកំពូលអាស៊ីបូព៌ានៅរាជធានីភ្នំពេញ៕
