ភ្នំពេញៈ លោក នាយករដ្ឋមន្ត្រី ហ៊ុន សែន បានសូមការអធ្យាស្រ័យពីលោកជំទាវភរិយាប្រមុខរដ្ឋ ប្រមុខរដ្ឋាភិបាលនៃប្រទេសនានាដែលនឹងអញ្ជើញមកកម្ពុជានាប៉ុន្មានថ្ងៃខាងមុខ ដែលភរិយារបស់លោកមិនអាចចេញទៅទទួលបាន ដោយសារតែលោកស្រី ប៊ុន រ៉ានី ហ៊ុនសែនស្ថិតក្នុងរយៈពេលនៃការព្យាបាល។ នេះបើតាមហ្វេសប៊ុករបស់លោកនាយករដ្ឋមន្ត្រីនៅថ្ងៃអាទិត្យទី ៦ ខែវិច្ឆិកានេះ។
លោកនាយករដ្ឋមន្ត្រីបានបញ្ជាក់ថា៖ «ពិតជាមានការងឿងឆ្ងល់ច្រើនអំពីការអវត្តមានភរិយាខ្ញុំក្នុងពិធីធំៗរយៈពេលកន្លងមក និងការប្រជុំអាស៊ាននាពេលខាងមុខ។ ភរិយាខ្ញុំមានបញ្ហាសុខភាពទាក់ទងដល់ឆ្អឹងខ្នង ដែលគ្រូពេទ្យតម្រូវឱ្យគាត់មិនអាចអង្គុយយូរបាន»។
អ្នកគាំទ្រ ដែលមានទាំងពលរដ្ឋធម្មតា មន្ត្រីរដ្ឋាភិបាល និងថ្នាក់ដឹកនាំតាមបណ្តាខេត្តផ្សេងៗជាដើមបានខមិន (comment) ជូនពរលោកស្រី ប៊ុន រ៉ានី ហ៊ុនសែន ឱ្យឆាប់ជាសះស្បើយពីជំងឺ និងមានសុខភាពល្អ៕