.jpg)
រួបចម្លាក់តោថ្មចំនួន ២ ដែលយកពីកំពង់ទឹករបស់ស្ពានហាលចូលប្រាសាទអង្គរវត្ត តាំងពីឆ្នាំ ១៩៩៧ ត្រូវបានយកទៅដាក់នៅទីតាំងដើមវិញហើយកាលពីថ្ងៃទី ៤ ខែវិច្ឆិកា ឆ្នាំ ២០២២ កន្លងទៅ។ រូបភាព អាជ្ញាធរជាតិអប្សរា
រួបចម្លាក់តោថ្មចំនួន ២ ដែលយកពីកំពង់ទឹករបស់ស្ពានហាលចូលប្រាសាទអង្គរវត្ត តាំងពីឆ្នាំ ១៩៩៧ ត្រូវបានយកទៅដាក់នៅទីតាំងដើមវិញហើយកាលពីថ្ងៃទី ៤ ខែវិច្ឆិកា ឆ្នាំ ២០២២ កន្លងទៅ បន្ទាប់ពីការជួសជុលត្រូវបានបិទបញ្ចប់ជាស្ថាពរ។ នេះបើតាមការឱ្យដឹងពីអាជ្ញាធរជាតិអប្សរា។
បើតាមអាជ្ញាធរជាតិអប្សរា ចម្លាក់តោដែលមានកម្ពស់ជាង ២ ម៉ែត្រ និងមានទម្ងន់ជិត ៣ តោន ត្រូវបានយកទៅរក្សាទុកនៅអភិរក្សដ្ឋានអង្គរ ដើម្បីជួសជុល។
លោក ឡុង ណារី ប្រធានក្រុមការងារអភិរក្សថ្មនៃនាយកដ្ឋានអភិរក្សប្រាសាទ និងបុរាណវិទ្យាមានប្រសាសន៍ថា ក្រុមការងាររបស់លោកចាប់ផ្តើមជួសជុលចម្លាក់ទាំងនេះពីខែមេសា ឆ្នាំ ២០២២ រហូតដល់ពេលនេះរយៈពេល ៦ ខែ។ ដំបូង ក្រុមការងារបានរៀបចំធ្វើឯកសារ និងប្រមូលបំណែកតូចធំរបស់ចម្លាក់ដើមមកផ្គុំគ្នា។ មកដល់ពេលនេះ ចម្លាក់តោទាំងគូ មានភាពរឹងមាំឡើងវិញហើយ ដោយបានបំពេញនូវកន្លែងខូចខាតនឹងបានបង់ថ្មមួយចំនួនដូចជា ជើងទម្រ ជើង ដងខ្លួន និងផ្នែកផ្សេងៗរបស់តោដែលចាំបាច់ សម្រាប់ធានាភាពយូរអង្វែងរបស់តោចៀសវាងការខូចខាតបន្តទៀត។
លោក ឡុង ណារី បានលើកឡើងថា ចម្លាក់តោថ្មនេះ មុនការជួសជុលមានសភាពទ្រុឌទ្រោម បែកបាក់រូបរាងជាអន្លើ នៅផ្នែកជើងទម្រ ជើង ទ្រូង និងផ្នែកខាងក្រោយជាដើម។ នៅសម័យបារាំង ចម្លាក់តោនេះត្រូវបានជួសជុលដោយប្រើស៊ីម៉ងត៍ និងដែកបិទភ្ជាប់ ដើម្បីឱ្យមានលំនឹងអាចឈរបានប៉ុណ្ណោះ ប៉ុន្តែក្រោយមក វាក៏បានបែកបាក់ជាបន្តបន្ទាប់តាមអាយុកាលស៊ីម៉ងត៍។
លោកបញ្ជាក់ថា ក្នុងការជួសជុល ក្រុមការងារក៏បានប្រើបច្ចេកទេសជួសជុលសមស្របទៅតាមបទដ្ឋានដែលអាចធានាបាននូវលក្ខណៈដើម និងសុវត្ថិភាពយូរអង្វែងនៃចម្លាក់។ រីឯបច្ចេកទេស និងការជួសជុលក៏ត្រូវបានទទួលស្គាល់ដោយអ្នកជំនាញការអាដហុក។
ដោយឡែក ដំណើរការដឹកជញ្ជូនរូបចម្លាក់តោថ្មទាំង ២ ទៅកាន់ទីតាំងដើមនៅថ្ងៃទី ៤ ខែវិច្ឆិកា ក្រុមការងារនៃគម្រោងជួសជុលស្ពានហាលអង្គរវត្តជិត ២០ នាក់ ដោយប្រើដងស្ទូច ដើម្បីលើកដាក់លើរថយន្តអស់រយៈពេល ១ ម៉ោង។ ក្រុមការងារក៏បានរៀបចំពិធីសាសនាសែនព្រេនតាមទំនៀមទម្លាប់ពីបុរាណផងដែរ នៅពេលយករូបចម្លាក់តោថ្មទាំង ២ ទៅដាក់នៅទីតាំងស្ពានហាលមុខប្រាសាទអង្គរវត្ត ដើម្បីសូមសេចក្ដីសុខ។
មន្ដ្រីនៃអាជ្ញាធរជាតិអប្សរាគូសបញ្ជាក់ថា វត្តមានរូបចម្លាក់តោថ្មទាំង ២ នៅទីតាំងដើមវិញ នឹងរួមចំណែកលើកតម្លៃកំពង់ទឹកឡើងវិញ ក៏ដូចជាជួយទាក់ទាញភ្ញៀវទេសចរ ក្រោយបើកដំណើរការឱ្យចរាចរណ៍ឡើងវិញ៕
