.jpg)
ភ្នំពេញៈ ព្រះមហាក្សត្រចេញព្រះរាជក្រឹត្យបញ្ចប់មុខតំណែងឯកអគ្គរាជទូតកម្ពុជា ប្រចាំនៅក្រៅប្រទេស ដែលចប់អាណត្តិចំនួន ១៣ នាក់ ដោយត្រូវវិលត្រឡប់ចូលប្រទេសកម្ពុជាវិញ។
យោងតាមព្រះរាជក្រឹត្យចុះថ្ងៃទី ៣ ខែវិច្ឆិកា បានឱ្យដឹងថា ឯកអគ្គរាជទូតទាំងនោះ រួមមាន លោក ចាន់ រតនា ឯកអគ្គរាជទូតកម្ពុជាប្រចាំអូស្ត្រាលី និងណូវែលសេឡង់ លោក ហុក សុភា ឯកអគ្គរាជទូតកម្ពុជាប្រចាំប្រ៊ុយណេ លោកស្រី បាន បូរ៉ុម ឯកអគ្គរាជទូតកម្ពុជាប្រចាំគុយបា នីការ៉ាហ្គា និងវ៉េណេស៊ុយអេឡា លោក ហ៊ុន ហាន ឯកអគ្គរាជទូតកម្ពុជាប្រចាំគូវ៉ែត និងអារ៉ាប់អេមីរ៉ាត កាតា និងបារ៉ែន លោក អ៊ុង ស៊ាន ឯកអគ្គរាជទូតកម្ពុជាប្រចាំឥណ្ឌា បង់ក្លាដែស ស្រីលង្កា ប៉ាគីស្ថាន អ៊ីរ៉ង់ និងនេប៉ាល់។
លោក ចឺយ វិចិត្ត ឯកអគ្គរាជទូតកម្ពុជាប្រចាំម៉ាឡេស៊ី លោក ឈូក ប៊ុណ្ណា ឯកអគ្គរាជទូតកម្ពុជាប្រចាំមីយ៉ាន់ម៉ា លោក អ៊ាត សីលា ឯកអគ្គរាជទូតកម្ពុជាប្រចាំរុស្ស៊ី និងលីទុយអានី លេតតូនី អេសតូនី បេឡារុស្ស និងអាមេនី លោក អ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃ លោក ចាយ ណាវុធ ឯកអគ្គរាជទូតកម្ពុជាប្រចាំវៀតណាម។
លោក អាន សុខខឿន ឯកអគ្គរាជទូតកម្ពុជាប្រចាំប្រទេសស្វ៊ីស និងជាប្រធានបេសកកម្មអចិន្ត្រៃយ៍ប្រចាំការិយាល័យអង្គការសហប្រជាជាតិ និងអង្គការអន្តរជាតិនានានៅទីក្រុងហ្សឺណែវ ប្រទេសស្វ៊ីស លោក កែ សុវណ្ណ ឯកអគ្គរាជទូតកម្ពុជាប្រចាំអង្គការសហប្រជាជាតិ និងកាណាដា និង លោក យៀប សំណាង ឯកអគ្គរាជទូតកម្ពុជាអមលេខាធិការដ្ឋានអាស៊ាននៅទីក្រុងហ្សាការតា ប្រទេសឥណ្ឌូនេស៊ី៕
