ភ្នំពេញៈ សារមន្ទីរជាតិកម្ពុជាប្រកាសថា នាយកដ្ឋានសិល្ប:សូនរូប និងសិល្ប:សិប្បកម្មនៃក្រសួងវប្បធម៌ និងវិចិត្រសិល្បៈ សហការជាមួយសារមន្ទីរជាតិកម្ពុជានឹងរៀបចំពិព័រណ៍មិនអចិន្ដ្រៃយ៍ «ពុទ្ធប្រវត្តិ៖ ពិព័រណ៍បណ្ណសារគំនូរបុរាណដែលបាត់បង់» រយៈពេល ២ សហ្តហ៍ ដើម្បីផ្សព្វផ្សាយបេតិកភណ្ឌវប្បធម៌ជាតិដែលបានបាត់បង់។
សារមន្ទីរជាតិកម្ពុជាបញ្ជាក់នៅលើហ្វេសប៊ុកនាថ្ងៃទី ៧ ខែវិច្ឆិកាថា ពិព័រណ៍នេះនឹងតាំងបង្ហាញចាប់ពីថ្ងៃទី ១៧ ដល់ថ្ងៃទី ៣០ ខែវិច្ឆិកា នៅសារមន្ទីរជាតិកម្ពុជា។
សារមន្ទីរជាតិកម្ពុជាបញ្ជាក់ថា៖ «ពិព័រណ៍នេះជាការរួមចំណែកផ្សព្វផ្សាយនូវបេតិកភណ្ឌវប្បធម៌ជាតិដែលបានបាត់បង់ដល់ស្រទាប់យុវជន ក៏ដូចជាសាធារណជនទូទៅឱ្យបានស្គាល់នូវគុណតម្លៃនៃស្នាដៃសិល្ប:គំនូរខ្មែរបុរាណ រួមទាំងសិប្បកម្មផ្សេងៗទៀតគ្រប់ទម្រង់ទាំងរូបី និងអរូបី»៕