.jpg)
សៀមរាបៈ មន្ទីរពេទ្យកុមារអង្គរ ខេត្តសៀមរាប បានរៃអង្គាសថវិកាចំនួនជិត ១០ ម៉ឺនដុល្លារសហរដ្ឋអាមេរិក បន្ទាប់ពីដំណើរការយុទ្ធនាការ «ជួយសង្គ្រោះជីវិតកុមារពីជំងឺមហារីក» រយៈពេល ២ សប្តាហ៍ ខណៈគោលដៅនៃយុទ្ធនាការស្វែងរកថវិកានេះគឺមានចំនួន ៣០ ម៉ឺនដុល្លារសហរដ្ឋអាមេរិក រហូតដល់ជិតពាក់កណ្តាលខែធ្នូ។ នេះបើយោងតាមមន្ទីរពេទ្យកុមារអង្គរ។
មន្ទីរពេទ្យកុមារអង្គរបញ្ជាក់លើហ្វេសប៊ុកនាថ្ងៃទី ៧ ខែវិច្ឆិកា ថាៈ «យុទ្ធនាការជួយសង្គ្រោះជីវិតកុមារពីជំងឺមហារីក បានដំណើរការអស់រយៈពេល ២ សប្តាហ៍កន្លងទៅហើយ ដោយមានគោលបំណងលើកកម្ពស់ការយល់ដឹង និងស្វែងរកថវិកាសម្រាប់កុមារ ដែលមានជំងឺមហារីកនៅក្នុងមន្ទីរពេទ្យកុមារអង្គរ»។
មន្ទីរពេទ្យកុមារអង្គរអំពាវនាវដល់សប្បុរសជនបន្តគាំទ្រតាមរយៈការបរិច្ចាគបន្ថែមទៀតមកកាន់យុទ្ធនាការនេះ ដែលមានរយៈពេលរហូតដល់ថ្ងៃទី ១២ ខែធ្នូ ឆ្នាំ ២០២២ ដើម្បីជួយដល់ការពិនិត្យ ព្យាបាល និងថែទាំជំងឺមហារីកនៅក្នុងមន្ទីរពេទ្យកុមារអង្គរ។
កាលពីថ្ងៃទី ២៤ ខែតុលា មន្ទីរពេទ្យកុមារអង្គរបានប្រកាសបើកយុទ្ធនាការរៃអង្គាសដ៏ធំមួយ មានឈ្មោះថា «ជួយសង្គ្រោះជីវិតកុមារពីជំងឺមហារីក» និងអំពាវនាវដល់សាធារណជនចូលរួមសិក្សា និងស្វែងយល់បន្ថែមអំពីជំងឺមហារីក និងការប៉ះពាល់របស់ជំងឺមហារីកមកលើកុមារ និងក្រុមគ្រួសាររបស់ពួកគេ៕
