ភ្នំពេញៈ ធនាគារអភិវឌ្ឍន៍អាស៊ី (ADB) នាថ្ងៃទី ៧ ខែវិច្ឆិកា បានអនុម័តកម្ចីចំនួន ៧០ លានដុល្លារ ដល់ប្រទេសកម្ពុជា ដើម្បីគាំទ្ររដ្ឋាភិបាលធ្វើកំណែទម្រង់ស៊ីជម្រៅលើផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) សម្រាប់ការអប់រំនៅកម្រិតមធ្យមសិក្សាទុតិយភូមិ នៅទូទាំងប្រទេស។
ADB បញ្ជាក់ក្នុងសេចក្តីប្រកាសព័ត៌មាននាថ្ងៃទី ៧ ខែវិច្ឆិកាថា គម្រោងនេះ នឹងជួយកម្ពុជាអភិវឌ្ឍធនធានមនុស្សប្រកបដោយគុណភាពខ្ពស់ ជាពិសេសក្នុងវិស័យ STEM ខណៈដែលប្រទេសកម្ពុជាប្រាថ្នាចង់ប្រែក្លាយសេដ្ឋកិច្ចរបស់ខ្លួនទៅជាសេដ្ឋកិច្ចដែលជំរុញដោយបច្ចេកវិទ្យានិងចំណេះដឹង។
ADB បញ្ជាក់ថា៖ «គម្រោងនេះនឹងពង្រីកលទ្ធភាពទទួលបានការអប់រំកម្រិតមធ្យមសិក្សាទុតិយភូមិដែលផ្អែកលើស្តង់ដាលើកកម្ពស់ការអប់រំ STEM ដោយគុណភាព និងពង្រឹងសមត្ថភាពស្ថាប័នសម្រាប់ការធ្វើផែនការ ការគ្រប់គ្រង និងការផ្តល់ការអប់រំមធ្យមសិក្សាទុតិយភូមិ»។
លោកស្រី Lynnette Perez អ្នកឯកទេសជាន់ខ្ពស់ផ្នែកអប់រំរបស់ ADB សម្រាប់តំបន់អាស៊ីអាគ្នេយ៍ថ្លែងថា ដោយសារតម្រូវការខ្លាំងនៃជំនាញ STEM គម្រោងនេះនឹងជួយពង្រឹងប្រព័ន្ធអប់រំរបស់កម្ពុជាតាមរយៈការធ្វើឱ្យប្រសើរឡើងនូវការអប់រំ STEM បច្ចុប្បន្ន ដើម្បីតាមទាន់ការកើនឡើងនៃតម្រូវការសម្រាប់កម្លាំងពលកម្មដែលមានសមត្ថភាពខ្ពស់។
លោកស្រីថ្លែងថា៖ «ការងារនេះមានសារៈសំខាន់ណាស់សម្រាប់ប្រទេសកម្ពុជា ក្នុងការបំពេញជំនាញ ចំណេះដឹង និងសមត្ថភាពសតវត្សរ៍ទី២១ ទៅក្នុងការអប់រំ STEM របស់ខ្លួន។ វានឹងធ្វើឱ្យប្រសើរឡើងនូវជំនាញរបស់សិស្សក្នុងការគិតបែបវិភាគ ការដោះស្រាយបញ្ហា ការច្នៃប្រឌិត និងការសហការ ដែលទាំងនេះនឹងត្រូវការសម្រាប់សេដ្ឋកិច្ចផ្អែកលើចំណេះដឹង»។
ADB បញ្ជាក់ថា គម្រោងនេះនឹងដាក់ចេញនូវស្តង់ដាសម្រាប់ការអប់រំប្រកបដោយគុណភាពសម្រាប់អនុវិទ្យាល័យទាំងអស់ ធ្វើឱ្យប្រសើរឡើងនូវបរិក្ខារ ព្រមទាំងផ្តល់នូវបច្ចេកវិទ្យាអប់រំ និងឧបករណ៍ STEM សំខាន់ៗ សម្រាប់ប្រទេសកម្ពុជា។
ក្នុងចំណោមផែនការរបស់គម្រោង ក៏នឹងមានការធ្វើឱ្យប្រសើរឡើងនូវសម្ភារបរិក្ខារនៃសាលាមធ្យមសិក្សាទុតិយភូមិចំនួន ១៤ និងសាលាមធ្យមសិក្សាទុតិយភូមិទូទៅចំនួន ១០៣ ដោយបំប្លែងថ្នាក់រៀនចំនួន ៣ ក្នុងសាលានីមួយៗទៅជាថ្នាក់រៀនវិទ្យាសាស្ត្រចំនួន ២ និងបណ្ណាល័យចំនយន ១ ដែលមានបំពាក់ឧបករណ៍ សម្ភារបង្រៀន សៀវភៅ គ្រឿងសង្ហារិម និងធនធានបច្ចេកវិទ្យាអប់រំចាំបាច់។
ADB បន្តថា៖ «ដើម្បីបង្កើនជំនាញគរុកោសល្យ និងចំណេះទ្រឹស្តីរបស់គ្រូបង្រៀន និងពង្រឹងការផ្តល់ការអប់រំ STEM គម្រោងនឹងផ្តល់នូវការអភិវឌ្ឍវិជ្ជាជីវៈជាបន្តបន្ទាប់ក្នុងការបង្រៀនប្រកបដោយប្រសិទ្ធភាព និងប្រកបដោយភាពច្នៃប្រឌិតដល់គ្រូបង្រៀន STEM ចំនួន ៧៧៥ នាក់ ដែលមានស្ត្រីយ៉ាងតិច ៤០ ភាគរយ និងសាស្ត្រាចារ្យ STEM ចំនួន ២៥ នាក់ មកពីវិទ្យាស្ថានជាតិអប់រំ ដែលមានស្ត្រីយ៉ាងហោចណាស់ ៨០ ភាគរយ»។
មជ្ឈមណ្ឌលវិទ្យាសាស្ត្រ និងបច្ចេកវិទ្យាកម្ពុជា ដែលជាមជ្ឈមណ្ឌលកូនកាត់ស្ថិតនៅក្នុងទីក្រុងភ្នំពេញ និងកម្មវិធីឌីជីថលដ៏រឹងមាំ នឹងត្រូវបានបង្កើតឡើងសម្រាប់ការចូលប្រើប្រាស់ដោយសាលារៀន និងសហគមន៍ទូទាំងប្រទេស។
គម្រោងនេះនឹងផ្តល់ការអភិវឌ្ឍវិជ្ជាជីវៈជាបន្តបន្ទាប់ដល់នាយកវិទ្យាល័យចំនួន ១៥៥ ស្តីពីការដឹកនាំ និងការគ្រប់គ្រងសាលារៀន ការត្រួតពិនិត្យការបង្រៀន និងការកសាងភាពជាដៃគូ ដែលមានសិក្ខាកាម ៨០ភាគរយជាស្ត្រី។
គម្រោងនឹងពង្រឹងមុខងារវិភាគ និងផែនការទូទាំងប្រព័ន្ធ តាមរយៈការអភិវឌ្ឍសមត្ថភាព និងផ្តល់នូវការប្រមូលទិន្នន័យជាក់ស្តែងភ្លាមៗនៅកម្រិតសាលា ដែលអាចឱ្យអ្នកដឹកនាំសាលាប្រើប្រាស់ទិន្នន័យទាំងនោះ ដើម្បីកែលម្អការគ្រប់គ្រងសាលារៀន៕