.jpg)
លោក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទថ្លែងក្នុងពិធីបើកសិក្ខាសាលាប្រវត្តិសាស្ត្រយោធាស្តីពីនយោបាយឈ្នះ ឈ្នះ (គោលការណ៍ ដំណើរការ និងសមិទ្ធផល) «ចូលរួមចែករំលែកដើម្បីសន្តិភាព និងសុខដុមភាព» នៅថ្ងៃទី៧ ខែវិច្ឆិកា នៅទីស្តីការក្រសួងការពារជាតិ។ រូបថត ហ្វេសប៊ុក
ភ្នំពេញៈ លោក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ បានថ្លែងថា ការសិក្សាប្រវត្តិសាស្ត្រយោធា គឺជាការស្រាវជ្រាវអំពីប្រវត្តិសាស្ត្រការពារជាតិ សង្គ្រាម និងជម្លោះប្រដាប់អាវុធ ដោយធ្វើការវិភាគអំពីជ័យជម្នះ និងបរាជ័យតាមដំណាក់កាលនីមួយៗ ក៏ដូចជា អំពីក្រឹត្យក្រមនៃការកកើតចលនាប្រដាប់អាវុធសិល្បិ៍វិធីកងទ័ព និងការអភិវឌ្ឍកងទ័ព។
លោកថ្លែងដូច្នេះក្នុងពិធីបើកសិក្ខាសាលាប្រវត្តិសាស្ត្រយោធាស្តីពីនយោបាយឈ្នះ ឈ្នះ (គោលការណ៍ ដំណើរការ និងសមិទ្ធផល) «ចូលរួមចែករំលែកដើម្បីសន្តិភាព និងសុខដុមភាព» នៅថ្ងៃទី៧ ខែវិច្ឆិកា នៅទីស្តីការក្រសួងការពារជាតិ។
លោក ហ៊ុន ម៉ាណែត ដែលជាមេបញ្ជាការកងទ័ពជើងគោក ថ្លែងថា ប្រវត្តិសាស្រ្តយោធា គឺជាធនធានដ៏ចាំបាច់មួយសម្រាប់ការអភិវឌ្ឍគតិបណ្ឌិតជាយុទ្ធសាស្ត្រសម្រាប់ការដឹកនាំ។ តាមរយៈព្រឹត្តិការណ៍ប្រវត្តិសាស្រ្តនានាដែលកម្ពុជាបានរងឥទ្ធិពល ជាពិសេស ផលវិបាកនៃសង្រ្គាមរ៉ាំរ៉ៃ រហូតទទួលបាន «សន្តិភាពពេញលេញ» តាមរយៈនយោបាយ ឈ្នះ ឈ្នះ។
ហ្វេសប៊ុកកងទ័ពជើងគោកនៃកងយោធពលខេមរភូមិន្ទបានដកស្រង់សម្ដីលោកថា៖ «ប្រវត្តិសាស្រ្តយោធានៅកម្ពុជា គឺជាប្រភពនៃមេរៀនបទពិសោធដ៏សម្បូរបែប និងជាធនធានពុទ្ធិសម្រាប់ការកសាងដុះខាត់គតិបណ្ឌិតជាយុទ្ធសាស្ត្រ ដែលមានសារៈសំខាន់ចាំបាច់នាំឱ្យសម្រេចជោគជ័យក្នុងការបំពេញភារកិច្ចរបស់កងយោធពលខេមរភូមិន្ទ ទាំងក្នុងដំណាក់កាលបច្ចុប្បន្ន និងទៅអនាគត»។
លោក ហ៊ុន ម៉ាណែត ចាត់ទុកសិក្ខាសាលានេះ គឺជាការចូលរួមយ៉ាងសំខាន់ក្នុងការលើកកម្ពស់សមត្ថភាពរបស់នាយទាហាន និងកងយោធពលខេរមភូមិន្ទ តាមរយៈការស្វែងយល់អំពីប្រវត្តិសាស្ត្រយោធា និងការអនុវត្ត «នយោបាយឈ្នះ ឈ្នះ» ប្រកបដោយជោគជ័យរបស់ លោកនាយករដ្ឋមន្ត្រី ហ៊ុន សែន។
លោកបន្ថែមថា សិក្ខាសាលាលើកដំបូងនេះ នឹងដើរតួនាទីសំខាន់ក្នុងការបំពេញបន្ថែម បន្ទាប់ពីបានប្រមូលធាតុចូលជាច្រើនតាមរយៈលទ្ធផលនៃសិក្ខាសាលាប្រវត្តិសាស្ត្រយោធានៅថ្នាក់យោធភូមិភាគ៕
