ភ្នំពេញៈ លោកនាយករដ្ឋមន្ត្រី ហ៊ុន សែន អំពាវនាវដល់អាជ្ញាធរ និងសមត្ថកិច្ចយកចិត្តទុកដាក់ខ្ពស់ក្នុងការថែរក្សាសន្តិសុខ និងសណ្តាប់ធ្នាប់ឱ្យបានល្អ ដើម្បីឱ្យប្រជាពលរដ្ឋ និងទេសចរបរទេសបានសប្បាយរីករាយនៅក្នុងពិធីបុណ្យអុំទូកតាមបណ្តាខេត្តនានា។
លោក ហ៊ុន សែន កាលពីយប់ថ្ងៃទី៧ ខែវិច្ឆិកា បានបង្ហោះសារក្នុងហ្វេសប៊ុកដើម្បីអបអសាទរពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលប្រារព្ធឡើងពីថ្ងៃទី ៧-៩ ខែវិច្ឆិកា។
លោកសរសេរថា រាជរដ្ឋាភិបាលកម្ពុជា បានសម្រេចផ្អាកប្រារព្ធពិធីបុណ្យអុំទូក នៅក្នុងរាជធានីភ្នំពេញឆ្នាំនេះ ដោយសារកម្ពុជាត្រូវរៀបចំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ និងការទទួលដំណើរទស្សនកិច្ចមេដឹកនាំមកពីបណ្ដាប្រទេសនានា ជាច្រើន។ ប៉ុន្តែរាជរដ្ឋាភិបាលបានអនុញ្ញាតឱ្យបណ្ដាខេត្តនានារៀបចំប្រារព្ធពិធីបុណ្យនេះ នៅតាមខេត្តរៀងៗខ្លួន។
លោក ហ៊ុន សែន សរសេរថា៖ «សូមអាជ្ញាធរ និងសមត្ថកិច្ចគ្រប់ជាន់ថ្នាក់យកចិត្តទុកដាក់ខ្ពស់ ក្នុងការថែរក្សាសន្តិសុខសណ្តាប់ធ្នាប់ឱ្យបានល្អ ដើម្បីឱ្យប្រជាពលរដ្ឋ និងទេសចរបរទេស មានឱកាសបានសប្បាយរីករាយនៅក្នុងពិធីបុណ្យអុំទូកតាមបណ្តាខេត្តនានា»។
កិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនឹងចាប់ផ្តើមដំណើរការពីថ្ងៃទី៨ ដល់ថ្ងៃទី១៣ ខែវិច្ឆិកា នៅរាជធានីភ្នំពេញ៕