.jpg)
ទិដ្ឋភាពគ្រោះថ្នាក់ចរាចរណ៍។ រូបថត Yousos Apdoulrashim
ភ្នំពេញៈ អគ្គស្នងការដ្ឋាននគរបាលជាតិបានឱ្យដឹងថា រយៈពេល ៣ ថ្ងៃ នៃព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ មានមនុស្សស្លាប់ដោយសារគ្រោះថ្នាក់ចរាចរណ៍ចំនួន ១៦ ានាក់ មានការថយចុះ ៦ នាក់ បើធៀបនឹងរយៈពេលដូចគ្នាកាលពីឆ្នាំមុន។
របាយការណ៍គ្រោះថ្នាក់ចរាចរណ៍ផ្លូវគោករបស់អគ្គស្នងការដ្ឋាននគរបាលជាតិ ដែល ភ្នំពេញ ប៉ុស្តិ៍ ទទួលបានកាលពីរសៀលថ្ងៃទី ៩ ខែវិច្ឆិកា បានឱ្យដឹងថា គិតចាប់ពីថ្ងៃទី ៧ ដល់ថ្ងៃទី ៩ ខែវិច្ឆិកា ឆ្នាំ ២០២២ មានគ្រោះថ្នាក់ចរាចរណ៍ចំនួន ២៧ លើក បានកើតឡើងទូទាំងប្រទេស និងមានអ្នកស្លាប់ចំនួន ១៦ នាក់ ហើយរបួសសរុបចំនួន ៤៤ នាក់ ក្នុងនោះរបួសធ្ងន់ចំនួន ៣១ នាក់។
លោក ហេង ចាន់ធារី ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានប្រាប់ ភ្នំពេញ ប៉ុស្តិ៍ នៅថ្ងៃទី ៩ ខែវិច្ឆិកាថា បើធៀបនឹងឆ្នាំមុន ចំនួនគ្រោះថ្នាក់ចរាចរណ៍សរុបមានការថយចុះ ៨ លើក ឬស្មើ ១៨ ភាគរយ។ លោកបន្តថា ចំពោះចំនួនអ្នកស្លាប់វិញ គឺមានការថយចុះចំនួន ៦ នាក់ ឬស្មើនឹង ២៧ ភាគរយ បើធៀបនឹងរយៈពេលដូចគ្នានឹងឆ្នាំមុន ដែលមានអ្នកស្លាប់ដោយគ្រោះថ្នាក់ចរាចរណ៍ដល់ទៅ២២ នាក់។
ចំពោះអ្នករងរបួសសរុបវិញ លោកបានឱ្យដឹងទៀតថា គឺមាន ៤៤ នាក់ ដូចទៅនឹងតួលេខឆ្នាំមុន ក្នុងរយៈពេល ៣ ថ្ងៃ នៃការប្រារព្វព្រះរាជពិធីបុណ្យអុំទូក អកអំបុក បណ្ដែតប្រទីប និងសំពះព្រះខែ ហើយអ្នករងរបួសធ្ងន់មានចំនួន ៣១ នាក់ និងស្រាលចំនួន ១៣ នាក់។
លោក បានបញ្ជាក់ថា៖«មូលហេតុគ្រោះថ្នាក់ ដោយសារតែល្បឿន មាន ៨ លើក មិនគោរពសិទ្ធិមាន ៧ លើក មិនប្រកាន់ស្តាំមាន ៤ លើក ប្រជែងគ្រោះថ្នាក់មាន ៤ លើក កត្តាយានយន្តមាន៣លើក និងបត់គ្រោះថ្នាក់មាន ១លើក។ អ្នកស្លាប់ដោយគ្រោះថ្នាក់នេះ ភាគច្រើនជាអ្នកបើកបរម៉ូតូ មាន ១២ នាក់ ហើយអ្នកថ្មើរជើងចំនួន ៣ នាក់ និងអ្នកធ្វើដំណើរតាមរថយន្តតូចម្នាក់»។
ជាមួយនឹងគ្រោះថ្នាក់ចរាចរណ៍រយៈពេល៣ថ្ងៃនេះ លោក ហេង ចាន់ធារី បានគត់សម្គាល់ឃើញថា អ្នកមិនពាក់មួកសុវត្ថិភាព មានអត្រាស្លាប់ដល់ ៩ នាក់ ក្នុងចំណោមអ្នកស្លាប់ចំនួន ១៦ នាក់ ហើយអ្នករងរបួសដោយមិនពាក់មួកសុវត្ថិភាពទាំងស្រាល និងធ្ងន់មានជិត ២០ នាក់។
តាមរបាយការណ៍របស់ក្រសួងសាធារណការ និងដឹកជញ្ចូន បានឱ្យដឹងថា គ្រោះថ្នាក់ចរាចរណ៍ក្នុងឆមាសទី១ នៃឆ្នាំ ២០២២ បានថយចុះចំនួន ៥៦២ លើក ស្មើចំនួន ២៦ ភាគរយ (១ ៦០៩ / ២ ១៧១ លើក)។ ចំណែកអ្នកស្លាប់បានថយចុះ ៩១ នាក់ ឬស្មើ៩ភាគរយ (៩៤២/១ ០៣៣ នាក់) និងអ្នករបួសថយចុះ៩៩២ នាក់ ស្មើនឹង ៣១% (២ ២៣៥/ ៣ ២២៧ នាក់) ធៀបនឹងគ្រោះថ្នាក់ចរាចរណ៍ក្នុងរយៈពេលដូចគ្នា កាលពីឆ្នាំ ២០១៩ ជាអំឡុងពេលដែលមិនទាន់មានជំងឺកូវីដ ១៩។
លោក គឹម បញ្ញា នាយកអង្គការមូលនិធិបង្ការរបួសអាស៊ី (AIP) ប្រចាំប្រទេសកម្ពុជា ធ្លាប់លើកឡើងថា បញ្ហាគ្រោះថ្នាក់ចរាចរណ៍មានអ្នកស្លាប់ និងរបួសនេះ ជាសញ្ញាមួយទាមទារឱ្យមានការយកចិត្តទុកដាក់ក្នុងការឆ្លើយតបឱ្យបានខ្លាំងបន្ថែមទៀត។
លោកបានបញ្ជាក់ថា៖ «វិធានការដែលយើងនឹងអនុវត្ត គឺមានសារៈសំខាន់នៅក្នុងការឆ្លើយតបចំពោះលំហូរនៃចរាចរណ៍ដែលមានការកើនឡើងចំពោះកំណើននៃយានយន្តរៀងរាល់ខែឆ្នាំ។ អ៊ីចឹងជាទស្សនៈរបស់ខ្ញុំគឺអត់មានអីក្រៅពីការបន្តរឹតបន្ដឹងការអនុវត្តច្បាប់ស្តីពីចរាចរណ៍ផ្លូវគោកឱ្យបានកាន់តែទូលំទូលាយ កាន់តែម៉ឺងម៉ាត់ ជាប់លាប់ ហើយធ្វើទាំងថ្ងៃទាំងយប់ប្រកបដោយតម្លាភាព»។
ជាមួយគ្នានេះ លោកក៏បានលើកទឹកចិត្តឱ្យប្រជាពលរដ្ឋ ក៏ដូចជា ស្ថានប័នអង្គភាពនានា ទាំងរដ្ឋាភិបាល និងមិនមែនរដ្ឋាភិបាលឱ្យចូលរួមចំណែកបន្ថែមលើវិធានការដែលនឹងអនុវត្តដោយរដ្ឋាភិបាល និងដៃគូពាក់ព័ន្ធធ្វើយ៉ាងណាដើរតួនាទីក្នុងនាមជាពលរដ្ឋ ជាអង្គភាព ឬស្ថាប័នមួយ រួមចំណែកក្នុងការកាត់បន្ថយការស្លាប់ និងរងរបួសដោយសារគ្រោះថ្នាក់ចរាចរណ៍ផងដែរ។
លោកបានបន្ថែមថា៖ «គួរមានការផ្សព្វផ្សាយ ការដាស់តឿនក្រើនរំឭកដោយមាតាបិតា បងប្អូនសាច់ញាតិ ជាពិសេសយើងចាប់ផ្តើមពីឥរិយាបថងាយៗ ឧទាហរណ៍ ពេលឃើញចេញទៅក្រៅអត់ពាក់មួក គឺតម្រូវត្រូវតែឱ្យកូនចៅខ្លួនពាក់មួក។ ដោយឡែកអង្គភាពស្ថាប័នគួរមានការផ្សព្វផ្សាយ ឃ្លីបវីដេអូ ឯកសារចូលក្នុង group ការងារ បង្កើតបទបញ្ជាផ្ទៃក្នុង អ៊ីចឹងទៅ»។
ដើម្បីអនុវត្តឱ្យសម្រេចបានតាមទិសដៅការងារ គ.ស.ច.គ. បានដាក់ចេញនូវទិសដៅការងារសម្រាប់ ឆមាសទី២ ឆ្នាំ ២០២២ ដោយបន្តជំរុញយ៉ាងសកម្មអនុវត្តផែនការសកម្មភាពស្តីពីការរឹតបន្តឹងអនុវត្តច្បាប់ស្តីពីចរាចរណ៍ផ្លូវគោក នៅក្រមខ័ណ្ឌទូទាំងប្រទេសសំដៅបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក ឱ្យមាននិរន្តរភាព និងប្រសិទ្ធភាព ប្រកបដោយភាពម៉ឺងម៉ាត់ដាច់ខាត ត្រឹមត្រូវ ស្មើភាព និងមិនរើសអើង។
គ.ស.ច.គ. ក៏បានប្រកាសដាក់គោលដៅក្នុងការបន្តពង្រឹងយន្តការតាមដាន ប្រតិកម្មរបស់សាធារណជន ដើម្បីធ្វើការបកស្រាយឆ្លើយតបទាន់ពេលវេលា សំដៅកាត់បន្ថយ ទស្សនៈភាន់ច្រឡំពីសាធារណជន និងបន្សាបឥទ្ធិពលព័ត៌មានក្លែងក្លាយ ដែលបំពុលបរិយាកាស សន្តិសុខ និងសណ្តាប់ធ្នាប់សង្គម ព្រមទាំងបង្កើនការផ្សព្វផ្សាយ និងអនុវត្តផែនការសកម្មភាពជាតិទសវត្សរ៍សុវត្ថិភាពចរាចរណ៍ផ្លូវគោក ឆ្នាំ ២០២១ - ២០៣០ និងធ្វើយុទ្ធនាការអប់រំផ្សព្វផ្សាយ ស្តីពីសុវត្ថិភាពចរាចរណ៍នៅក្នុងរាជធានី-ខេត្តផងដែរ៕
