.jpg)
លោកនាយករដ្ឋមន្ត្រី ហ៊ុន សែន (ស្ដាំ) និងលោក លី ខឺឈាង នាយករដ្ឋមន្ដ្រីចិន ក្នុងជំនួបនាថ្ងៃទី ៩ ខែវិច្ឆិកា។ រូបថត SPM
ភ្នំពេញៈ ចិនប្រកាសផ្តល់ទឹកប្រាក់ចំនួន ២០០ លានយ័ន (២៧ លានដុល្លារអាមេរិក) សម្រាប់ជួយកែលម្អជីវភាពប្រជាពលរដ្ឋកម្ពុជា ដើម្បីជួយដល់កម្ពុជាឱ្យទទួលបានការរីកចម្រើនថែមទៀត។
ការសន្យានេះធ្វើឡើងក្នុងជំនួបរវាងលោកនាយករដ្ឋមន្ត្រី ហ៊ុន សែន និងលោក លី ខឺឈាង (LI Keqiang) នាយករដ្ឋមន្ដ្រីចិន នាថ្ងៃទី ៩ ខែវិច្ឆិកា ក្នុងឱកាសលោកមកបំពេញទស្សនកិច្ចនៅកម្ពុជារយៈពេល ៤ ថ្ងៃ ចាប់ពីថ្ងៃទី៨-១១ ខែវិច្ឆិកា។
លោក លី ខឺឈាង ថ្លែងថា ទំនាក់ទំនងរវាងកម្ពុជានិងចិនគឺជាទំនាក់ទំនងដែលស៊ីជម្រៅលើគ្រប់វិស័យ ហើយលោកបានបង្ហាញសេចក្ដីរីករាយចំពោះទំនាក់ទំនងនេះ និងបានសម្ដែងការរីករាយយ៉ាងខ្លាំងដែលបានឃើញកម្ពុជាមានការអភិវឌ្ឍយ៉ាងឆាប់រហ័ស។
លោក អ៊ាង សុផល្លែត ជំនួយការផ្ទាល់លោកនាយករដ្ឋមន្ត្រី ហ៊ុន សែន ប្រាប់អ្នកសារព័ត៌មានក្រោយជំនួបនេះថា៖ «ជាមួយគ្នានេះផងដែរ ឯកឧត្តម លី ខឺឈាង បានមានប្រសាសន៍ថា ទោះបីជាយ៉ាងណាក៏ដោយ ចិននៅតែបន្តជួយដល់កម្ពុជាយើងឱ្យទទួលបានវឌ្ឍនភាពថែមទៀត ក្នុងនោះចិននឹងផ្តល់ជំនួយបន្ថែមដល់កម្ពុជាទៅលើវិស័យ ជារួមមាន ទី១ ទឹកប្រាក់ចំនួន ២០០ លានយ័ន សម្រាប់ជួយកែលម្អជីវភាពប្រជាពលរដ្ឋកម្ពុជា ជួយដល់ការស្ដារឡើងវិញនូវបេតិកភណ្ឌកម្ពុជា បង្កើនចំនួននិស្សិតកម្ពុជាទៅបន្តការសិក្សានៅប្រទេសចិន ជួយដល់សកម្មភាពដោះមីន ជួយដល់វិស័យសុខាភិបាល ជួយដល់ការរៀបចំការប្រកួតស៊ីហ្គេមនៅឆ្នាំខាងមុខ ក៏ដូចជាជួយដល់កីឡាករកីឡាការិនីកម្ពុជា ជួយដល់ការស្ថាបនាស្ពានឆ្លងទន្លេមេគង្គ ជួយដល់ការស្ថាបនាផ្លូវដែកតភ្ជាប់អំពីកម្ពុជា ថៃ ឡាវ និងប្រទេសចិន។
បើតាមលោក អ៊ាង សុផល្លែត លោកលី ខឺឈាង បញ្ជាក់ថា ចិននឹងជួយដល់កម្ពុជាលើវិស័យកសិកម្មធ្វើយ៉ាងណាឱ្យផលិតផលកសិផលកម្ពុជាមានគុណភាពអាចនាំចេញទៅប្រទេសចិនស្របតាមកូតាដែលបានប្រគល់ជូន ក៏ដូចជាមានគុណភាពសម្រាប់នាំចេញទៅប្រទេសក្រៅផងដែរ។
លោក ហ៊ុន សែន បានថ្លែងអំណរគុណចំពោះជំនួយបន្ថែមនិងការបញ្ជាក់នូវការផ្តល់ជំនួយដល់កម្ពុជារបស់ភាគីចិនក្នុងការជួយកម្ពុជាឱ្យមានការរីកចម្រើន និងមានវឌ្ឍនភាពកាន់តែខ្លាំងឡើងថែមទៀត។
លោកបានថ្លែងអំណរគុណដល់ភាគីចិនផងដែរដែលកន្លងមកបានធ្វើជាបង្អែកផ្តល់វ៉ាក់សាំងកូវីដ ១៩ ដល់កម្ពុជា ដែលធ្វើឱ្យកម្ពុជាបានឆ្លងផុតពីការរីករាលដាលជំងឺកូវីដ ១៩ បើកប្រទេសឡើងវិញ និងបើកសេដ្ឋកិច្ចឡើងវិញ។
លោក ហ៊ុន សែន បានសម្តែងការអបអរសាទរដល់ភាគីចិនចំពោះសមិទ្ធផលអភិវឌ្ឍន៍ «ដ៏ធំធេង» របស់បក្សកុម្មុយនីស្តចិន និងជូនពរភាគីចិនឱ្យបានសម្រេចបានការកសាង និងការអភិវឌ្ឍជាច្រើនថែមទៀត ជាពិសេសឈានទៅសម្រេចបានគោលដៅ ១០០ ឆ្នាំលើកទី២ ក្នុងការកសាងប្រទេស និងសង្គមនិយមបែបទំនើប។
លោកនាយករដ្ឋមន្ត្រី ហ៊ុន សែន និងលោក លី ខឺឈាង ក៏បានធ្វើជាអធិបតីក្នុងពិធីចុះហត្ថលេខាលើឯកសារចំនួន១៨ ដែលក្នុងនោះមានការផ្តល់ជំនួយលើគម្រោងអភិវឌ្ឍន៍នៅកម្ពុជា និងការរៀបចំសម្ពោធជានិមិត្តរូបដាក់ឱ្យប្រើប្រាស់ផ្លូវល្បឿនលឿនភ្នំពេញ-ព្រះសីហនុ ផងដែរ៕
