ភ្នំពេញៈ នៅមុន ១ ថ្ងៃ ដែលមេដឹកនាំប្រទេសអាស៊ាននឹងចាប់ផ្តើមប្រជុំពេញអង្គ មន្ត្រីការទូតកម្ពុជាបញ្ជាក់ថា អាស៊ានមានការគិតគូរវែងឆ្ងាយហើយក៏បានត្រៀមខ្លួនរួចជាស្រេច ដើម្បីឆ្លើយតបទៅនឹងបញ្ហាប្រឈមនៅក្នុងតំបន់ ក៏ដូចជាក្នុងពិភពលោក ដែលកំពុងកើតមានឡើង ដោយសហការគ្នាទៅវិញទៅមកដើម្បីជំរុញរាល់របៀបវារៈ នៃកិច្ចប្រជុំកំពូលអាស៊ានឱ្យទៅមុខ។
លោក គង់ ភោគ រដ្ឋលេខាធិការក្រសួងការបរទេស និងជាអ្នកនាំពាក្យនៃកិច្ចប្រជុំកំពូលអាស៊ានថ្លែងថា បញ្ហាដែលបានឡើងមកដល់កិច្ចប្រជុំកំពូលអាស៊ានតែងតែជាបញ្ហាលំបាក ប៉ុន្តែមកទល់ពេលនេះរាល់បញ្ហាប្រឈមទាំងអស់ក្នុងនាមកម្ពុជាជាប្រធានអាស៊ានគឺបានដាក់ចេញនូវគោលជំហរក៏ដូចជាការយល់ឃើញ រួមទាំងការផ្តល់ជាដំណោះស្រាយផងដែរ។
ក្នុងសន្និសីទសារព័ត៌មាននាព្រឹកថ្ងៃទី ១០ ខែវិច្ឆិកា លោកថ្លែងថា នៅពេលកម្ពុជាចាប់ផ្ដើមធ្វើជាប្រធានអាស៊ានភ្លាម គឺមានបញ្ហាប្រឈមមួយចំនួនរួចទៅហើយ ឧទាហរណ៍បញ្ហានៅមីយ៉ាន់ម៉ា និងបញ្ហាអ៊ុយក្រែនជាដើម។ ក្នុងពេលជាមួយគ្នានេះ ប្រទេសនានាកំពុងស្ថិតនៅក្នុងដំណាក់កាលនៃការងើបឡើងវិញចេញពីផលប៉ះពាល់នៃការរីករាលដាលជំងឺកូវីដ ១៩ ប៉ុន្តែដោយសារតែបញ្ហាសង្គ្រាមនៅអ៊ុយក្រែន និងបញ្ហាសកលមួយចំនួនទៀត វាបានបង្កនូវភាពមិនច្បាស់លាស់ទៅដល់កិច្ចខិតខំប្រឹងប្រែងក្នុងការងើបចេញពីវិបត្តិកូវីដ ១៩ នេះ។
លោក គង់ ភោគ ថ្លែងថា៖ «ប៉ុន្តែ ទោះបីយ៉ាងណាក៏ដោយ ខ្ញុំអាចនិយាយបានថា អាស៊ានគឺមានការគិតគូរវែងឆ្ងាយហើយក៏បានត្រៀមខ្លួនរួចជាស្រេចដើម្បីឆ្លើយតបទៅនឹងបញ្ហាប្រឈមទាំងអស់នោះ។ អ្វីដែលសំខាន់សម្រាប់យើងគឺធ្វើយ៉ាងណាយើងសហការគ្នាទៅវិញទៅមកដើម្បីជំរុញ រាល់របៀបវារៈ និងការងារអាទិភាពទាំងអស់នោះឱ្យទៅមុខ»។
អ្នកនាំពាក្យរូបនេះបន្ត ចំពេលដែលកម្ពុជារៀបចំកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ កាលពីខែសីហា គឺមានបញ្ហានៅច្រកសមុទ្រតៃវ៉ាន់ទៅទៀត។ ដោយឡែក បញ្ហាមួយចំនួនមានរយៈពេលយូរឆ្នាំ ឬទសវត្សរ៍រួចមកហើយ ឧទាហរណ៍ បញ្ហានុយក្លេអ៊ែរនៅឧបទ្វីបកូរ៉េ សមុទ្រចិនខាងត្បូង ជាដើម។ ប៉ុន្តែក្នុងពេលជាមួយគ្នា ក៏មានការងើបឡើងនូវបញ្ហាដែលមិនមែនជាសន្តិសុខប្រពៃណី ឧទាហរណ៍ បម្រែបម្រួលអាកាសធាតុ ជាដើម។
មន្ត្រីការទូតរូបនេះ បន្តថា៖ «ប៉ុន្តែជារួម ខ្ញុំអាចនិយាយបានថា រាល់បញ្ហាទាំងអស់នេះ កម្ពុជាក្នុងនាមជាប្រធានអាស៊ានបានសម្របសម្រួលកិច្ចខិតខំប្រឹងប្រែងរួមរវាងសមាជិកអាស៊ានដទៃទៀតដើម្បីធ្វើការឆ្លើយតប។ ពាក់ព័ន្ធជាមួយនឹងបញ្ហាអ៊ុយក្រែនក្នុងនាមយើងជាប្រធានអាស៊ានយើងបានចេញសេចក្ដីថ្លែងការណ៍ហូរហែដើម្បីរំលេចពីសារៈសំខាន់នៃការបញ្ចប់សង្គ្រាមនៅទីនោះពីផលប៉ះពាល់នៃអំពើហិង្សានិងការប៉ះទង្គិចគ្នាដោយប្រដាប់អាវុធ»។
លោក គង់ ភោគ រំឭកថា កម្ពុជាក៏បានចូលរួមចំណែកគាំទ្រដល់សេចក្តីសម្រេចរបស់អង្គការសហប្រជាជាតិ (អ.ស.ប) រហូតទៅដល់ចំនួន ៣ នៅឯអ.ស.ប ហើយកម្ពុជាក៏បានបង្ហាញអំពីការយល់ឃើញរបស់ខ្លួន ដែលថាបញ្ហានេះគឺត្រូវតែដោះស្រាយដោយសន្តិវិធី៕