.jpg)
លោក ឌិត ទីណា និងឯកអគ្គរដ្ឋទូតចិនប្រចាំកម្ពុជាកាលពីថ្ងៃទី ២៧ ខែតុលា។ ហេង ជីវ័ន
ភ្នំពេញៈ លោក ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា កម្ពុជាមានបំណងបង្កើនកិច្ចសហប្រតិបត្តិការកាន់តែជិតស្និទ្ធក្នុងវិស័យកសិកម្មជាមួយប្រទេសចិនក្នុងរយៈពេលប៉ុន្មានឆ្នាំខាងមុខ ដើម្បីផលប្រយោជន៍ទៅវិញទៅមក។
នេះបើយោងតាមខ្លឹមសារបទសម្ភាសដែលលោករដ្ឋមន្ដ្រីរូបនេះផ្ដល់ឱ្យសារព័ត៌មាន Xinhua ចុះផ្សាយនៅទី ៩ ខែវិច្ឆិកា ខណៈលោកនាយករដ្ឋមន្ដ្រីចិន លី កឺឈាង កំពុងមានវត្តមាននៅកម្ពុជា ដើម្បីចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ។
តាមរយៈបទសម្ភាសនេះលោក ឌិត ទីណា បានលើកឡើងថាកម្ពុជា និងចិនមានកិច្ចសហប្រតិបត្តិការលើវិស័យកសិកម្មដ៏រឹងមាំ។ ផលិតផលកសិកម្មរបស់កម្ពុជាជាច្រើនមុខកំពុងមានវត្តមាន និងទទួលបានការនិយមគាំទ្រនៅលើទីផ្សារប្រទេសចិន ក្នុងនោះមានដូចជា អង្ករ ផ្លែចេកស្រស់ ផ្លែស្វាយស្រស់ និងកសិផលចុងក្រោយបង្អស់គឺផ្លែមៀនស្រស់ ដែលទើបត្រូវបានអនុញ្ញាតឱ្យនាំចេញទៅកាន់ទីផ្សារប្រទេសចិនថ្មីៗនេះ។
លោក ឌិត ទីណា បានបញ្ជាក់ថា៖ «ខ្ញុំមានទំនុកចិត្តថាប្រទេសកម្ពុជា និងចិន អាចពង្រីកទំនាក់ទំនងនៅក្នុងវិស័យកសិកម្មឱ្យកាន់តែច្រើន និងទូលំទូលាយ នៅក្នុងរយៈពេលប៉ុន្មានឆ្នាំខាងមុខទៀតតាមរយៈការស្វែងយល់ពីតម្រូវការទីផ្សាររបស់ប្រទេសចិន និងលទ្ធភាពរបស់កម្ពុជាក្នុងការផ្គត់ផ្គង់នូវតម្រូវការទាំងនោះ ក៏ដូចជា ការផ្លាស់ប្ដូរវប្បធម៌រវាងប្រទេសទាំង ២ ជាដើម»។
លោករដ្ឋមន្ត្រីបន្ដថា សម្រាប់និស្សិតគួរតែមានឱកាសសម្រាប់កម្មវិធីផ្លាស់ប្តូរ និងអាហារូបករណ៍ទៅសាកលវិទ្យាល័យកំពូលៗរបស់ប្រទេសចិន ដើម្បីសិក្សាចំណេះដឹងកសិកម្មថ្មីៗ។ មិនត្រឹមតែប៉ុណ្ណោះ វាជារឿងកាន់តែប្រសើរថែមមួយកម្រិតទៀត ប្រសិនបើមន្ដ្រីកសិកម្មកម្ពុជាមានឱកាសធ្វើទស្សនកិច្ចទៅកាន់នាយកដ្ឋានពាក់ព័ន្ធក្នុងវិស័យកសិកម្មនៅប្រទេសចិន។
ដោយឡែកក្នុងវិស័យពាណិជ្ជកម្មវិញ ឱកាសនៃការចូលរួមតាំងពិព័រណ៍ពាណិជ្ជកម្ម និងចូលរួមក្នុងកិច្ចប្រជុំធុរកិច្ចរវាងពាណិជ្ជករ និងពាណិជ្ជករ (B2B) តាមរយៈសភាពាណិជ្ជកម្មផ្សេងៗគឺជារឿងដ៏ល្អ ដើម្បីអនុញ្ញាតឱ្យពាណិជ្ជករនៃប្រទេសទាំង ២ ស្វែងរកជម្រើសថ្មី សម្រាប់ការធ្វើពាណិជ្ជកម្ម និងស្វែងយល់ពីតម្រូវការទីផ្សារព្រមទាំងតម្រូវការនៃអ្នកប្រើប្រាស់ដោយផ្ទាល់។ នេះបើតាមលោករដ្ឋមន្ដ្រី ឌិត ទីណា។
ជាមួយគ្នានេះ លោករដ្ឋមន្ដ្រីក៏បានលើកទឹកចិត្តក៏ដូចជាជំរុញឱ្យមានដំណើរទស្សនកិច្ចសិក្សា សម្រាប់កសិករខ្មែរ ដើម្បីស្វែងយល់ និងទាញយកចំណេះដឹងដ៏ច្រើនពីវិស័យកសិកម្មជឿនលឿននៃប្រទេសចិនផងដែរ។
ចំពោះការនាំចេញកសិផលរបស់កម្ពុជាទៅចិន លោក ឌិត ទីណា បានថ្លែងថា ចាប់ពីឆ្នាំ ២០១៩ ដល់ចុងខែមិថុនា ឆ្នាំ ២០២២ កម្ពុជាបាននាំចេញសរុបចំនួន ២,៤ លានតោនដែលមានតម្លៃសរុបចំនួន ១,៩៤ ពាន់លានដុល្លារអាមេរិក។ បើតាមលោក ឌិត ទីណា ទិន្នន័យនេះបញ្ជាក់ថា ទីផ្សារចិន នៅតែមានសក្ដានុពលច្រើនក្នុងការស្រូបយកផលិតផលកសិកម្មកម្ពុជាកាន់តែច្រើន ហើយថា ប្រទេសទាំង ២ មិនទាន់បានប្រើប្រាស់សក្តានុពលអតិបរមាក្នុងវិស័យនេះនៅឡើយទេ។
លោកបានថ្លែងថា៖ «ខ្ញុំសូមលើកទឹកចិត្តដល់ភាគីពាក់ព័ន្ធទាំងអស់នៃប្រទេសទាំង ២ ជំរុញកិច្ចសហប្រតិបត្តិការឱ្យកាន់តែជិតស្និទ្ធ ដើម្បីស្វែងរកមធ្យោបាយថ្មីៗកាន់តែប្រសើរ និងមានប្រសិទ្ធភាពបន្ថែមទៀត ដើម្បីឆ្លើយតបទៅនឹងសក្តានុពលដែលយើងមាន»។
លោករដ្ឋមន្ដ្រីបញ្ជាក់ថា កម្ពុជាអាចធានាបាននូវគុណភាពផលិតផលសមស្របតាមតម្រូវការ និងភូតគាមអនាម័យរបស់ប្រទេសចិនដោយបានអះអាងថា ផលិតផលកសិកម្មកម្ពុជាជាច្រើនត្រូវបានដាំដុះតាមបែបសរីរាង្គ និងសមនឹងតម្រូវការរបស់អតិថិជនចិន។ ទន្ទឹមនឹងនោះ លោករដ្ឋមន្ត្រីបានបង្ហាញពីបំណងចង់ឃើញការវិនិយោគរបស់ចិនបន្ថែមទៀតក្នុងវិស័យកសិកម្ម ដោយលោកថា សហគ្រាសចិនមានបទពិសោធច្រើនក្នុងវិស័យនេះ។
លោកបានថ្លែងថា៖ «កម្ពុជាបានត្រៀមខ្លួនរួចជាស្រេចក្នុងការជំរុញកិច្ចសហប្រតិបត្តិការបន្ថែមទៀតជាមួយប្រទេសចិន សម្រាប់ការវិនិយោគថ្មីៗនៅក្នុងវិស័យកសិកម្ម ដើម្បីបម្រើផលប្រយោជន៍ទៅវិញទៅមករបស់ប្រជាជននៃប្រទេសទាំង ២ និងជំរុញទំហំពាណិជ្ជកម្មទ្វេភាគីរបស់យើងឡើងដល់កម្រិតខ្ពស់ថ្មីមួយ»។
នៅក្នុងខ្លឹមសារកិច្ចសម្ភាសន៍ដដែល លោក ឌិត ទីណា ក៏បានលើកឡើងពីអត្ថប្រយោជន៍នៃកិច្ចព្រមព្រៀងពាណិជ្ជកម្ម ភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) សម្រាប់ការអភិវឌ្ឍវិស័យកសិកម្មកម្ពុជាផងដែរ។
លោករដ្ឋមន្ត្រីបានមានប្រសាសន៍ថា RCEP និង CCFTA គឺជាកិច្ចព្រមព្រៀងពាណិជ្ជកម្មសេរីដែលផ្ដល់ប្រយោជន៍ដល់គ្នាទៅវិញទៅមក។ សម្រាប់រូបលោក កិច្ចព្រមព្រៀងពាណិជ្ជកម្មសេរីទាំង ២ មិនត្រឹមតែរួមចំណែកជួយដល់កំណើននៃវិស័យកសិកម្មប៉ុណ្ណោះទេ ប៉ុន្តែក៏ជួយដល់សុខុមាលភាព និងវិបុលភាពដល់កសិករផងដែរ៕
