ភ្នំពេញៈ លោកនាយករដ្ឋមន្ត្រី ហ៊ុន សែន និងលោកប្រាយុធ ចាន-អូចា នាយករដ្ឋមន្ត្រីថៃបានឯកភាពគ្នាពង្រឹងការតភ្ជាប់គមនាគមន៍ទាំងផ្លូវគោកនិងផ្លូវដែកព្រមទាំងជំរុញកិច្ចសហប្រតិបត្តិការដោះមីននៅតាមព្រំដែននៃប្រទេសទាំង ២ ដើម្បីបញ្ចៀសគ្រោះថ្នាក់ចំពោះប្រជាជននៅតាមព្រំដែន។
ការឯកភាពនេះធ្វើឡើងក្នុងជំនួបរវាងមេដឹកនាំទាំង ២ កាលពីថ្ងៃទី ១០ ខែវិច្ឆិកា នៅវិមានសន្តិភាពរាជធានីភ្នំពេញ ក្នុងឱកាសដែលលោកចានអូចាមកចូលរួមក្នុងកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅកម្ពុជា។
នៅក្នុងជំនួបនេះមេដឹកនាំនៃប្រទេសទាំង ២ បានពិភាក្សាគ្នាអំពីបញ្ហាអាស៊ាន ការអភិវឌ្ឍធនធានមនុស្ស និងវិស័យអប់រំ វិស័យទេសចរណ៍ ពាណិជ្ជកម្ម សន្តិសុខ ការប្រែប្រួលអាកាសធាតុ និងសំណល់រឹងក្នុងសមុទ្រ ការតភ្ជាប់ និងបញ្ហានៃការដោះមីនជាដើម។
ហ្វេសប៊ុកលោក ហ៊ុន សែន បញ្ជាក់ក្រោយជំនួបថា៖ «ថ្នាក់ដឹកនាំប្រទេសទាំង ២ ក៏បានឯកភាពលើការពង្រឹងកិច្ចសហប្រតិបត្តិការ ការតភ្ជាប់គមនាគមន៍ទាំងផ្លូវគោក ផ្លូវដែក និងជំរុញកិច្ចសហប្រតិបត្តិការក្នុងការដោះមីនលើទីតាំងនៅតាមព្រំដែននៃប្រទេសទាំង ២ ដើម្បីជម្លៀសគ្រោះថ្នាក់ បង្កើតគ្រោះថ្នាក់ណាមួយចំពោះប្រជាជននៅតាមព្រំដែន»។
មេដឹកនាំទាំង ២ បានឯកភាពគ្នានៅក្នុងការរក្សាតួនាទីស្នូលនិងមជ្ឈភាពអាស៊ាន និងបានឯកភាពក្នុងការជំរុញកិច្ចសហប្រតិបត្តិការលើវិស័យអប់រំ បណ្ដុះបណ្ដាលធនធានមនុស្សសំដៅកសាងធនធានមនុស្ស ដើម្បីចូលរួមអភិវឌ្ឍប្រទេសស្របតាមការវិវត្តរបស់សង្គមនាពេលបច្ចុប្បន្ន។
មេដឹកនាំទាំង ២ ក៏បន្តជំរុញកិច្ចសហប្រតិបត្តិការលើវិស័យទេសចរណ៍តាមរយៈគោលការណ៍ប្រទេស២គោលដៅទេសចរ ១ និងការជំរុញកិច្ចសហប្រតិបត្តិការលើវិស័យពាណិជ្ជកម្មតាមរយៈការស្វែងរកសក្តានុពលលើការធ្វើពាណិជ្ជកម្មលើវិស័យផ្សេងៗទៀត ជាពិសេសលើវិស័យកសិកម្មដើម្បីបង្កើនទំហំពាណិជ្ជកម្មប្រទេសទាំង ២ ឱ្យបានដល់ ១៥ ពាន់លានដុល្លារសហរដ្ឋអាមេរិក។
ប្រភពដដែលបន្តថា មេដឹកនាំកំពូលនៃប្រទេសទាំង ២ ក៏ឯកភាពបន្តកិច្ចសហប្រតិបត្តិការលើវិស័យសន្តិសុខនៅតាមព្រំដែន បញ្ហាប្រែប្រួលអាកាសធាតុ និងសំណល់រឹងនៅក្នុងសមុទ្រ៕