ភ្នំពេញៈ កម្ពុជា-ចិន បានចុះហត្ថលេខា លើកិច្ចព្រមព្រៀងមួយចំនួន ដើម្បីពង្រឹងវិស័យសុខាភិបាលនៅកម្ពុជា ខណៈដែលលោកនាយករដ្ឋមន្ត្រី ហ៊ុន សែន បញ្ជាក់ថា វ៉ាក់សាំងបង្ការជំងឺកូវី ១៩ របស់រដ្ឋាភិបាលចិន គឺជាបង្អែកជួយឱ្យកម្ពុជាឆ្លងផុតពី វិបត្តិនៃការរីករាលដាលជំងឺកូវីដ ១៩ រហូតឈានដល់ការបើកប្រទេស និងសេដ្ឋកិច្ចឡើងវិញ។
ក្នុងជំនួបទ្វេភាគី រវាងលោកនាយករដ្ឋមន្ត្រី ហ៊ុន សែន និងលោកនាយករដ្ឋមន្ត្រីចិន លី កេឈាង ក្នុងពេលលោកបំពេញទស្សនកិច្ចជាផ្លូវការនៅកម្ពុជា ភាគីទាំង ២ បានចុះហត្ថលេខាលើឯកសារនៃកិច្ចព្រមព្រៀងរវាងកម្ពុជា-ចិនចំនួន ១៨ ច្បាប់កាលពីរសៀលថ្ងៃទី ៩ វិច្ឆិកា នៅវិមានសន្តិភាព។
សេចក្តីប្រកាសរបស់រដ្ឋាភិបាលឱ្យដឹងថា ការចុះហត្ថលេខាលើកិច្ចព្រមព្រៀងពាក់ព័ន្ធនឹងវិស័យសុខាភិបាលនៅកម្ពុជា មានចំនួន ២ ច្បាប់ ដែលពាក់ព័ន្ធនឹងវិញ្ញាបនបត្រប្រគល់ទទួលគម្រោងស្តីពីការបញ្ជូនអ្នកជំនាញវេជ្ជសាស្ត្របុរាណចិនប្រយុទ្ធនឹងជំងឺកូវីដ ១៩ មកកម្ពុជា និងកិច្ចព្រមព្រៀងស្តីពីការបង្កើតមជ្ឈមណ្ឌលឱសថបុរាណចិន កម្ពុជា-ចិន។
ក្រៅពីកិច្ចព្រមព្រៀងទាំង ២ នេះ លោកនាយករដ្ឋមន្ត្រី ហ៊ុន សែន បានថ្លែងថា ភាគីចិន បានធ្វើជាបង្អែក ក្នុងការផ្តល់វ៉ាក់សាំងកូវីដ ១៩ ដល់កម្ពុជា ដែលធ្វើឱ្យកម្ពុជាបានឆ្លងផុតពីការរីករាលដាលជំងឺកូវីដ ១៩ បើកប្រទេសឡើងវិញ និងបើកសេដ្ឋកិច្ចឡើងវិញ។
លោក ហ៊ុន សែន បញ្ជាក់ថា៖ «តាមរយៈដំណើរទស្សនកិច្ចរបស់ឯកឧត្តមនាយករដ្ឋមន្ត្រីចិននាពេលនេះ គឺបានពង្រឹងបន្ថែមទៀត នូវកិច្ចសហប្រតិបត្តិការ ការទំនាក់ទំនងជាទ្វេភាគី ជាពិសេសផ្តោតលើ [ការបង្កើន] ពាណិជ្ជកម្ម ពង្រឹងសេដ្ឋកិច្ច ការវិនិយោគ និងការអភិវឌ្ឍទៅលើវិស័យសំខាន់ៗជាច្រើនទៀត ដូចអ្វីដែលកម្ពុជា និងចិនបានចុះហត្ថលេខា លើឯកសារសំខាន់ៗ ចំនួន ១៨»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ធ្លាប់បានលើកឡើងថា ការបញ្ជូនក្រុមវេជ្ជសាស្ត្របុរាណចិនមកកាន់កម្ពុជា នឹងជួយលើកកម្ពស់កិច្ចសហប្រតិបត្តិការ រវាងប្រទេសទាំង ២ ក្នុងការទប់ស្កាត់ជំងឺកូវីដ ១៩ និងជួយជំរុញការអភិវឌ្ឍចំណងមិត្តភាព រវាងចិន និងកម្ពុជា។ លោកអះអាងថា ក្រុមវេជ្ជសាស្ត្រចិន មិនត្រឹមតែជួយកម្ពុជា ក្នុងការប្រយុទ្ធប្រឆាំងនឹងជំងឺកូវីដ ១៩ ប៉ុណ្ណោះទេ គឺថែមទាំងជួយជំរុញការអភិវឌ្ឍវិស័យឱសថបុរាណរបស់កម្ពុជាផងដែរ។
រដ្ឋាភិបាលចិនក៏ធ្លាប់បានអះអាងថា មជ្ឈមណ្ឌលឱសថបុរាណចិន កម្ពុជា-ចិន ដែលគ្រោងបង្កើតនៅកម្ពុជា នឹងផ្តល់ការបណ្តុះបណ្តាលជំនាញបន្ថែមដល់ក្រុមវេជ្ជបណ្ឌិតកម្ពុជា ហើយវានឹងបង្កើតជាមូលដ្ឋានក្នុងការបង្កាត់ពូជ សម្រាប់ឱសថ ដើម្បីជួយដល់អ្នកជំងឺក្នុងស្រុកផងដែរ។
កាលពីថ្ងៃទី ១៦ ខែមីនា ឆ្នាំ ២០២២ ក្រុមគ្រូពេទ្យជំនាញវេជ្ជសាស្ត្របុរាណចិនចំនួន ១២ នាក់ បានធ្វើដំណើរមកដល់កម្ពុជា ហើយពួកគេគឺជាក្រុមពេទ្យជំនាញវេជ្ជសាស្ត្របុរាណថ្នាក់ជាតិរបស់ចិនដំបូងគេ ដែលប្រទេសចិនចាត់បញ្ជូនទៅក្រៅប្រទេស។ នេះបើតាមការអះអាងរបស់ក្រសួងសុខាភិបាល។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា និយាយថា ការពង្រឹងវិស័យសម្រាប់កិច្ចសហប្រតិបត្តិការរបស់កម្ពុជា-ចិនពីវិស័យវិនិយោគ រហូតដល់វិស័យសុខាភិបាលនេះ គឺមិនមាន អ្វីដែលអាក្រក់ទេ។ ប៉ុន្តែលោកចង់ឱ្យភាគីម្ចាស់ប្រទេស គឺកម្ពុជា គួរពិនិត្យមើលឡើងវិញនូវអ្វីៗ ដែលមានកន្លងមក ជាពិសេស គឺចំណុចខ្វះខាត។
លោកបញ្ជាក់ថា៖ «ការវិនិយោគរបស់ចិនមកកម្ពុជា គឺមានផលប៉ះពាល់ដែលមិនល្អ ហើយក៏មានផលល្អខ្លះដែរ។ អ៊ីចឹងយើងគួរពិនិត្យមើល និងកែលម្អនីតិវិធី ឬក៏អ្វី ដែលជាអនុស្សាវរីយ៍ជាមួយគ្នា ដែលមិនល្អនៅឡើយ»។
លោកបន្តថា៖ «នៅពេលមានការសិក្សា ស្វែងយល់អំពីចំណុចខ្វះខាតទាក់ទងនឹងការវិនិយោគក្នុងពេលបច្ចុប្បន្ន វាបានផ្តល់ជាការតម្រង់ទិសសម្រាប់កិច្ចសហប្រតិបត្តិការបន្ថែមទៀត សម្រាប់វិស័យសុខាភិបាល។ បើសិនជាចំណុចខ្វះខាតទាំងអម្បាលម៉ានមិនត្រូវបានកែលម្អទេ យើងបារម្ភខ្លាចថា ទំនាក់ទំនងនេះ មានតែរូបភាពធំៗ ប៉ុន្តែគុណភាពអាចមានការខ្វះខាត»។
តាមសេក្តីជូនព័ត៌មានស្តីពីការសរុបស្ថានភាពជំងឺកូវីដ ១៩ នៅកម្ពុជា សម្រាប់ថ្ងៃទី ៩ ខែវិច្ឆិកា ឆ្នាំ ២០២២ បានបង្ហាញថា អត្រាឆ្លងថ្មី និងករណីស្លាប់ដោយសារជំងឺកូវីដ ១៩ នៅកម្ពុជា នៅតែមិនមាន ខណៈអ្នកជាសះស្បើយមានចំនួន ២ នាក់។
គិតត្រឹមខែមីនា កម្ពុជាបានទទួលជំនួយវ៉ាក់សាំងបង្ការកូវីដ ១៩ ពីប្រទេស ចិនជាង ២៨ លានដូស ហើយកម្ពុជាក្លាយជាប្រទេស ១ នៅលើពិភពលោក ដែលបានចាក់វ៉ាក់សាំងដល់ប្រជាពលរដ្ឋបានច្រើនលើសលប់។ ប្រជាពលរដ្ឋកម្ពុជា ដែលបានចាក់វ៉ាក់សាំង គឺមាន ៩៥,១២% បើធៀបនឹងចំនួនប្រជាជនសរុប ១៦ លាននាក់។ នេះបើយោងតាមរបាយការណ៍របស់គណៈកម្មការចំពោះកិច្ចចាក់វ៉ាក់សាំងកូវីដ ១៩ នៅថ្ងៃទី៩ វិច្ឆិកា ឆ្នាំ ២០២២៕