.jpg)
ផ្លូវល្បឿនលឿនភ្នំពេញ-ក្រុងព្រះសីហនុ។ រូបថត ក្រសួងសាធារណការ
ភ្នំពេញៈ រដ្ឋាភិបាលកម្ពុជា និងក្រុមហ៊ុនសាជីវកម្មស្ពាន និងថ្នល់ចិន (CRBC) បានចុះហត្ថលេខាលើកិច្ចព្រមព្រៀងក្របខ័ណ្ឌលើគម្រោងសាងសង់ផ្លូវល្បឿនលឿនទី ២ តភ្ជាប់ពីរាជធានីភ្នំពេញទៅក្រុងបាវិតដែលគ្រោងចំណាយថវិកាសាងសង់ជាង ១ ៦០០ លានដុល្លារ។
នៅថ្ងៃទី ១០ វិច្ឆិកាលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ចូន បានអញ្ជើញជាអធិបតី ក្នុងពិធីចុះហត្ថលេខាលើកិច្ចព្រមព្រៀងក្របខ័ណ្ឌ (FA) សម្រាប់គម្រោងសាងសង់ផ្លូវល្បឿនលឿនតភ្ជាប់ពីភ្នំពេញ ទៅក្រុងបាវិត រវាងរាជរដ្ឋាភិបាលកម្ពុជា និងក្រុមហ៊ុនសាជីវកម្មស្ពាន និងថ្នល់ចិន (CRBC) នៅទីស្តីការក្រសួង។
ក្នុងឱកាសនោះ លោក ស៊ុន ចាន់ថុល ថ្លែងថា ផ្លូវល្បឿនលឿនខ្សែទី ២ ដែលតភ្ជាប់ពីភ្នំពេញទៅបាវិតនេះនឹងបើកការដ្ឋានសាងសង់នៅក្នុងឆ្នាំ ២០២៣ ហើយគ្រោងនឹងបញ្ចប់ការសាងសង់ទាំងស្រុងនៅចុងឆ្នាំ ២០២៦ ឬដើមឆ្នាំ ២០២៧ ហើយគម្រោងមួយនេះ នឹងប្រើប្រាស់ថវិកាសាងសង់ចំនួន ១ ៦៣៨ លានដុល្លារ។ លោកថា៖ «ផ្លូវនេះមានចម្ងាយ ១៣៨ គីឡូម៉ែត្រ និងត្រូវធ្វើស្ពានឆ្លងទន្លេមេគង្គដ៏វែងមួយ ដែលគិតទាំងស្ពាន និងផ្លូវប្រហែលជា ៥ គីឡូម៉ែត្រ ហើយថវិកាដែលគ្រោងបណ្តាក់ទុនប្រមាណ ១ ៦៣៨ លានដុល្លារ ដែលមានទំហំតិចជាងផ្លូវល្បឿនលឿនទៅក្រុងព្រះសីហនុ។ តែប្រវែងផ្លូវក៏ខ្លីជាងផ្លូវល្បឿនលឿន ក្រុងព្រះសីហនុផងដែរ»។
លោក ស៊ុន ចាន់ថុល បានឱ្យដឹងទៀតថា ផ្លូវល្បឿនលឿនភ្នំពេញ-បាវិត និងធ្វើឱ្យបានរួចរាល់ដំណាលគ្នានឹងផ្លូវល្បឿន-លឿនពីក្រុងហូជីមិញ មកម៉ុកបៃ ដើម្បីធ្វើការតភ្ជាប់ជាមួយផ្លូវល្បឿនលឿនរបស់កម្ពុជា។ លោកបានចាត់ទុក ផ្លូវល្បឿនលឿនទី ២ នេះគឺមានសារៈសំខាន់ណាស់ក្នុងការតភ្ជាប់ពីប្រទេសចិន មកភូមា មកថៃ មកកម្ពុជា និងតទៅប្រទេសវៀតណាម តាមរយៈផ្លូវអាស៊ានលេខ ១។
លោកបញ្ជាក់បន្ថែមថា៖ «ចំពោះទីតាំងដែលយើងដាក់បង្ហាញឱ្យឃើញជាមួយគ្នា គឺមិនខុសគ្នាប៉ុន្មានទេ គឺផ្លូវល្បឿនលឿនវៀតណាមរត់មកតាមផ្លូវលេខ ២២ របស់គាត់ តភ្ជាប់ផ្លូវល្បឿនលឿនរបស់យើងត្រង់ចំណុចបង្គោលគីឡូម៉ែត្រលេខ ១៦៤។ យើងរៀបចំជាលាយលក្ខណ៍អក្សរដើម្បីរៀបចំប្លង់ឱ្យបានត្រឹមត្រូវបន្ថែមទៀត»។
កម្ពុជាកំពុងតែចាប់ផ្តើមពង្រីកផ្លូវអាស៊ានលេខ ១ របស់ខ្លួន ពី ២ គន្លងទៅ ៤ គន្លង ពីក្រុងប៉ោយប៉ែតមកភ្នំពេញ និងតភ្ជាប់ពីភ្នំពេញទៅបាវិត តាមផ្លូវល្បឿនលឿនខ្សែទី ២ នេះ ដើម្បីធ្វើឱ្យទំនាក់ទំនងទំនិញនិងអ្នកដំណើរតាំងពីចិន រហូតដល់វៀតណាម អាចឆ្លងកាត់បាន។ នេះបើតាមលោកស៊ុន ចាន់ថុល។
នៅក្នុងពិធីចុះហត្ថលេខានៅថ្ងៃទី ១០ វិច្ឆិកា ២០២២ លោក Chen Fenjian ប្រធានក្រុមហ៊ុនមេ របស់ក្រុមហ៊ុន (CRBC) បានថ្លែងអំណរគុណដល់កម្ពុជា ដែលបានជួយគាំទ្រ ដល់ក្រុមហ៊ុននិងឈានដល់ការចុះហត្ថលេខាសម្រាប់គម្រោងផ្លូវល្បឿនលឿនតភ្ជាប់ពីភ្នំពេញទៅបាវិតដែលជាគម្រោងតភ្ជាប់ដ៏ធំពីភ្នំពេញទៅកាន់ច្រកព្រំដែនប្រទេសវៀតណាមនិងតភ្ជាប់ទៅកាន់ផ្លូវល្បឿនរបស់វៀតណាមឆ្ពោះទៅកាន់ទីក្រុងហូជីមិញដែលជាផ្នែកមួយនៃផ្លូវល្បឿនលឿនរបស់អាស៊ាន។
គម្រោងផ្លូវល្បឿនលឿនខាងលើនេះនឹងជួយជំរុញការអភិវឌ្ឍសេដ្ឋកិច្ចសង្គម ក្នុងខេត្តកណ្តាល ខេត្តព្រៃវែង និងខេត្តស្វាយរៀង ជាពិសេសក៏នឹងជួយលើកកម្ពស់សកម្មភាពពាណិជ្ជកម្ម កម្ពុជា និងវៀតណាម តាមរយៈលំហូរចរាចរណ៍ និងទំនិញឆ្លងកាត់ប្រទេសទាំង ២ ផងដែរ។
បើតាម លោក Chen ក្រុមហ៊ុន CRBC បានជោគជ័យលើគម្រោងសាងសង់ផ្លូវល្បឿនលឿនភ្នំពេញ ក្រុងព្រះសីហនុ តាមរយៈទទួលបានការគាំទ្រពីក្រសួងសាធារណការ និងដឹកជញ្ជូនកម្ពុជា ដោយផ្លូវនេះ បានសម្ពោធដាក់ឱ្យដំណើរការក្រោមអធិបតីភាពលោកនាយករដ្ឋមន្ត្រីនៃប្រទេសទាំង ២ កាលពីថ្ងៃទី ៩ វិច្ឆកា។
លោកបញ្ជាក់ថា ក្រុមហ៊ុននឹងបន្តសាងសង់ផ្លូវល្បឿនលឿនទី២ របស់កម្ពុជា ភ្នំពេញ-បាវិត តាមរយៈកិច្ចព្រមព្រៀងថ្មីនៅថ្ងៃទី ១០ វិច្ឆកានេះ។ លោកថ្លែងថា៖ «យើងសង្ឃឹមថា គម្រោងសាងសង់ផ្លូវល្បឿនលឿនភ្នំពេញបាវិត នឹងបញ្ចប់ទៅតាមការគ្រោងទុក និងបន្តកិច្ចព្រមព្រៀងផ្សេងទៀត នៅពេលខាងមុខ ដើម្បីឱ្យដំណើរការសាងសង់ឱ្យមានភាពរលូន ដោយឈរលើទំព័រថ្មីនៃកិច្ចសហប្រតិបត្តិការ និងមិត្តភាពនៃប្រទេសទាំង ២»។
ទន្ទឹមនឹងការប្រកាសគម្រោងផ្លូវល្បឿនលឿនទី២ នេះ ក្រសួងសាធារណការក៏បានឱ្យដឹងដែរថា ក្នុងរយៈពេល ៩ ថ្ងៃ នៃការបើកឱ្យដំណើរការជាផ្លូវការនូវផ្លូវល្បឿនលឿនភ្នំពេញ-ក្រុងព្រះសីហនុគឺមានយានយន្តប្រមាណ ១០ ម៉ឺនគ្រឿងបានធ្វើចរាចរណ៍។
លោក ហ៊ាង សុធាយុត្តិ អ្នកនាំពាក្យក្រសួងសាធារណការ បានប្រាប់ភ្នំពេញប៉ុស្តិ៍នៅថ្ងៃទី ១០ វិច្ឆិកាថា តួលេខនៃការប្រើប្រាស់ផ្លូវល្បឿនលឿន ចាប់ពីថ្ងៃទី ១ ដល់ថ្ងៃទី ៩ វិច្ឆិកា គឺមានជាង ១០ ម៉ឺនគ្រឿង។ បើប្រៀបធៀបតួលេខនេះ ទៅនឹងរយៈពេលដូចគ្នាកាលពីខែតុលា គឺឃើញថា មានការកើនឡើងបើទោះបីជាការប្រើប្រាស់ផ្លូវល្បឿនលឿនចាប់ផ្តើមគិតថ្លៃសេវាក៏ដោយ។
លោកបញ្ជាក់ថា៖ «ចំពោះបញ្ហាគ្រោះថ្នាក់ចរាចរណ៍វិញ មិនមានអ្វីគួរជាទីកត់សម្គាល់នោះទេ គឺក្នុងពេលនេះ មានតែករណីឆេះរថយន្តរហូតខ្ទេចនៅលើដងផ្លូវនោះ ព្រោះរថយន្តនេះ យើងរកឃើញថា បានខកខានត្រួតពិនិត្យលក្ខណៈបច្ចេកទេសត្រឹមត្រូវទៀងទាត់»។
ផ្លូវល្បឿនលឿនភ្នំពេញ-ក្រុងព្រះសីហនុ ជាផ្លូវល្បឿនលឿនថ្មី និងដំបូងបំផុត ក្នុងប្រវត្តិសាស្ត្រកម្ពុជា តភ្ជាប់ពីរាជធានីភ្នំពេញ ទៅកាន់ទីក្រុងទេសចរណ៍ និងកំពង់ផែសមុទ្រធំបំផុត នៅក្រុងព្រះសីហនុ មានប្រវែងសរុប ១៨៧,០៥ គីឡូម៉ែត្រ ត្រូវបានបើកការដ្ឋានសាងសង់កាលពីថ្ងៃទី ២២ ខែមីនា ឆ្នាំ ២០១៩ តភ្ជាប់ពីសង្កាត់ សំរោងក្រោម ខណ្ឌពោធិ៍សែនជ័យ រាជធានីភ្នំពេញ ទៅដល់សង្កាត់លេខ ៣ ក្រុងព្រះសីហនុ ដោយឆ្លងកាត់ខេត្តកណ្តាល កំពង់ស្ពឺ និងខេត្តកោះកុង។
ផ្លូវល្បឿនលឿនភ្នំពេញ-ក្រុងព្រះសីហនុ ត្រូវបានបែងចែកជា ៣ គន្លងទៅ និង ៣ គន្លងមក ដែលក្នុងនោះរួមមាន៖ គន្លងផ្លូវសម្រាប់ចរាចរណ៍ធម្មតា គន្លងផ្លូវសម្រាប់វ៉ាជែង និងគន្លងផ្លូវសម្រាប់ឈប់បន្ទាន់ ដោយមានការកំណត់ល្បឿនក្នុងការបើកបរ ទៅតាមប្រភេទយានយន្ត ចន្លោះពី ៦០ គីឡូម៉ែត្រ ដល់ ១២០ គីឡូម៉ែត្រ ក្នុង ១ ម៉ោង៕
