ភ្នំពេញៈ លោកនាយករដ្ឋមន្ត្រី ហ៊ុន សែន ថ្លែងថា ការថែរក្សាឯកភាព សាមគ្គីភាព និងមជ្ឈភាពរបស់អាស៊ានគឺជាអាទិភាពចម្បងបំផុត ដើម្បីធានាឱ្យតំបន់អាស៊ានមានចីរភាព និងភាពធន់សម្រាប់ព្រឹត្តិការណ៍ដែលអាចកើតមាននាពេលអនាគត។
លោកថ្លែងថា ខណៈអាស៊ានធ្វើដំណើរទៅមុខ អាស៊ានក៏មិនត្រូវភ្លេចនូវអតីតកាល និងគុណតម្លៃ ដែលអាស៊ានបានកសាង និងថែរក្សានោះទេ។ លោកជឿជាក់ថា បាវចនារបស់អាស៊ាន «អាស៊ាន ចក្ខុវិស័យតែមួយ អត្តសញ្ញាណតែមួយ និងសហគមន៍តែមួយ» នៅតែមានគុណតម្លៃពិតប្រាកដនាពេលនេះ។
លោក ហ៊ុន សែន ថ្លែងដូច្នេះក្នុងពិធីបើកកិច្ចប្រជុំកំពូលអាស៊ានលើកទី៤០ និង ៤១ និង កិច្ចប្រជុំកំពូលពាក់ព័ន្ធ នៅរាជធានីភ្នំពេញនាថ្ងៃទី ១១ ខែវិច្ឆិកា។
លោកអំពាវនាវដល់រដ្ឋជាសមាជិកអាស៊ានផ្តោតលើគោលបំណងរួមនៃការអភិវឌ្ឍរួមគ្នា ដើម្បីសន្តិភាព ស្ថិរភាព និងឧត្តមភាពនៃតំបន់អាស៊ាន ដោយលោកបញ្ជាក់ថាទំនាក់ទំនងរបស់រដ្ឋជាសមាជិកទាំងអស់មិនកើតឡើងដោយចៃដន្យនោះទេ ប៉ុន្តែតាមរយៈការប្រឹងប្រែង ការប្តេជ្ញាចិត្ត និងការព្យាយាមជាច្រើនឆ្នាំ។
លោក ហ៊ុន សែន ថ្លែងថា៖ «យើងត្រូវថែរក្សា និងដឹងគុណដល់អ្វីៗ ដែលយើងបានកសាង។ ដូចនេះ ការថែរក្សាឯកភាព សាមគ្គីភាព និងមជ្ឈភាពរបស់យើងគឺជាអាទិភាពចម្បងបំផុត ដើម្បីធានាឱ្យតំបន់យើងមានចីរភាព និងភាពធន់ សម្រាប់ព្រឹត្តិការណ៍ដែលអាចកើតមាន នាពេលអនាគត។
លោកបន្តថា ការរាតត្បាតនៃកូវីដ ១៩ បានកើតមានជិត ៣ ឆ្នាំហើយ ចាប់តាំងពីដើមឆ្នាំ ២០២០ មក។ ជាមួយនឹងការព្យាយាម និងកិច្ចខិតខំប្រឹងប្រែងរបស់សមាជិកអាស៊ាននីមួយៗ និងអាស៊ានជារួម អាស៊ានអាចប្រកាសដោយមោទនភាពថា អាស៊ានបានយកឈ្នះលើការ គំរាមកំហែងជាសកលនេះ ហើយបានចាប់ផ្តើមដំណើរការស្តារឡើងវិញនូវសកម្មភាពសង្គម-សេដ្ឋកិច្ច។
លោក ហ៊ុន សែន បានលើកឡើងពីការវាយតម្លៃ និងព្យាករណ៍របស់ការិយាល័យស្រាវជ្រាវសេដ្ឋកិច្ចអាស៊ានបូក៣ (AMRO) កាលពីខែតុលា កន្លងទៅនេះថា រដ្ឋសមាជិកអាស៊ាននីមួយៗនឹងទទួលបាននូវកំណើនសេដ្ឋកិច្ចវិជ្ជមាន ហើយតំបន់អាស៊ានទាំងមូល នឹងអាចសម្រេចបានកំណើនក្នុងអត្រា ៥,៣ភាគរយ និង ៤,៩ ភាគរយ ក្នុងឆ្នាំ ២០២២ និង ២០២៣ រៀងគ្នា ដែលជាអត្រាខ្ពស់ បើប្រៀបធៀបទៅនឹងតំបន់ផ្សេងទៀតនៃសកលលោក។
លោកបញ្ជាក់ថា អាស៊ានកំពុងសប្បាយរីករាយជាមួយនឹងផ្លែផ្កាពីការខិតខំរបស់ខ្លួនលើវិថីឆ្ពោះទៅកាន់កំណើនប្រកបដោយចីរភាពនេះ តែក៏លោកជំរុញដល់សមាជិកអាស៊ានត្រូវតែប្រុងប្រយ័ត្នជានិច្ច ពីព្រោះស្ថានភាពសង្គមសេដ្ឋកិច្ចអាស៊ាន និងទូទាំងសកលលោក នៅមានភាពផុយស្រួយ និងបែកខ្ញែកគ្នានៅឡើយ។
លោក ហ៊ុន សែន ថ្លែងថា៖ «យើងកំពុងស្ថិតនៅលើចំណុចប្រសព្វដ៏ស្រពេចស្រពិលបំផុត ដែលជីវិតមនុស្សរាប់លាននាក់ក្នុងតំបន់ពឹងផ្អែកលើឧត្តមគតិ និងចក្ខុវិស័យវែងឆ្ងាយ គោលនយោបាយ និងការសម្រេចចិត្តត្រឹមត្រូវ និងអភិក្រម ដូចជាការយល់ឃើញពីស្ថាប័នអន្តរជាតិ និងតំបន់ ថាតើតំបន់អាស៊ានអាចឆ្លងកាត់បញ្ហាប្រឈម និងកសាងសហគមន៍កាន់តែរឹងមាំសម្រាប់គ្រប់ៗគ្នាបានយ៉ាងដូចម្តេច ?»។
អាស៊ាននឹងដាក់ចេញនូវសេចក្តីថ្លែងការណ៍របស់ថ្នាក់ដឹកនាំអាស៊ាន ស្តីពីខួបលើកទី៥៥ នៃការបង្កើតអាស៊ាន ដែលនឹងត្រូវបានបំពេញបន្ថែមដោយសេចក្តីថ្លែងការណ៍២ផ្សេងទៀត គឺសេចក្តីថ្លែងការណ៍ចក្ខុវិស័យរបស់ថ្នាក់ដឹកនាំអាស៊ានស្តីពី «អាស៊ានរួមគ្នាធ្វើ៖ ដោះស្រាយបញ្ហាប្រឈមទាំងអស់គ្នា» និងសេចក្តីថ្លែងការណ៍របស់ថ្នាក់ដឹកនាំអាស៊ាន ស្តីពីរបៀបវារៈនៃការតភ្ជាប់អាស៊ាន ក្រោយឆ្នាំ ២០២៥ ដែលនឹងត្រូវបានអនុម័ត នាពេលកិច្ចប្រជុំកំពូលនៃបណ្តាថ្នាក់ដឹកនាំអាស៊ានក្នុងថ្ងៃនេះ៕