ភ្នំពេញៈ លោកនាយករដ្ឋមន្ត្រី ហ៊ុន សែន និងនាយករដ្ឋមន្ត្រីឡាវ លោក ផាន់ខាំ វិផាវ៉ាន់ (Phankham Viphavanh) បានឯកភាពគ្នាជំរុញកិច្ចសហប្រតិបត្តិការលើវិស័យពាណិជ្ជកម្ម ទេសចរណ៍ ថាមពល និងការតភ្ជាប់ឱ្យកាន់តែស៊ីជម្រៅថែមទៀត ដោយមេដឹកនាំនៃប្រទេសទាំង ២ ចាត់ទុកវិស័យទាំងនេះជាកត្តាជំរុញកំណើនពាណិជ្ជកម្មរវាងប្រទេសទាំង ២។
កាលពីល្ងាចថ្ងៃទី ១០ ខែវិច្ឆិកា លោក ហ៊ុន សែន បានជួបជាមួយលោក ផាន់ខាំ វិផាវ៉ាន់ (Phankham Viphavanh) ក្នុងឱកាសលោកមកចូលរួមកិច្ចប្រជុំកំពូលអាស៊ាននៅរាជធានីភ្នំពេញ។
ហ្វេសប៊ុកលោក ហ៊ុន សែន បញ្ជាក់ក្រោយជំនួបនេះថា មេដឹកនាំទាំង ២ បានពិភាក្សាគ្នាអំពីកិច្ចសហប្រតិបត្តិការរវាងប្រទេសទាំង ២ និងបញ្ហាអាស៊ាន ព្រមទាំងបានវាយតម្លៃខ្ពស់ចំពោះកិច្ចសហប្រតិបត្តិការរវាងប្រទេសទាំង ២កន្លងមក។
ហ្វេសប៊ុកដដែលបញ្ជាក់ថា៖ «[មេដឹកនាំទាំង ២] បានឯកភាពគ្នាជំរុញកិច្ចសហប្រតិបត្តិការ ឱ្យកាន់តែស៊ីជម្រៅថែមទៀតលើវិស័យពាណិជ្ជកម្ម វិស័យទេសចរណ៍ ថាមពល និងការតភ្ជាប់ ដែលជាកត្តាជំរុញកំណើនពាណិជ្ជកម្មរវាងប្រទេសទាំង ២»។
លោក ហ៊ុន សែន និងលោក វិផាវ៉ាន់ បានឯកភាពគ្នាថានឹងបន្តសហការគ្នា ដើម្បីរក្សាសាមគ្គីភាព និងមជ្ឈភាពអាស៊ាន៕