ភ្នំពេញៈ បទល្មើសជលផលក្នុង តំបន់ជុំវិញបឹងទន្លេសាបនៅតែ បន្តកើតមាន បើទោះបីជាមានការបង្ក្រាបយ៉ាងតឹងរ៉ឹងយ៉ាងណាក៏ដោយ ពិសេសបទល្មើសហ៊ុមសម្រាស់ដែលប្រើរបាំងស្បៃមុង សាច់អួន និងឧបករណ៍ឆក់ ដែលច្បាប់ហាមឃាត់នៅតែបន្តកើតមាន នៅតាមតំបន់ព្រៃរនាមលិចទឹក។
លោកអ៊ឹង ទ្រី អ្នកនាំពាក្យរដ្ឋបាលជលផល ប្រាប់ភ្នំពេញប៉ុស្តិ៍ថា ក្នុងរយៈពេល ១០ ខែ នៃឆ្នាំ ២០២២ នេះ កម្លាំងសមត្ថកិច្ចចម្រុះថ្នាក់ជាតិ សហការជាមួយកម្លាំងសមត្ថកិច្ចចម្រុះថ្នាក់ខេត្តជុំវិញបឹងទន្លេសាប បានបង្ក្រាបរឹបអូសវត្ថុតាងនៃបទល្មើស រួមមាន ឧបករណ៍អួនអូសទឹកសាប ៤០ វង់ ម៉ាញ់ ១៤ វង់ ឆក់ត្រជាក់ និងក្តៅ ១ ៣០៤ គ្រឿង ឈិបយន្ត ២១-គ្រឿង អួនហ៊ុម ១៧ វង់ របាំងស្បៃមុងនិងសាច់អួន ៦៤០ ០២០ ម៉ែត្រ លូនិងលប ៦ ១៨៣ មាត់ បង្គោល ចម្រឹង (ឈើ និងឫស្សី) ៣៣៦- ៧៥៦ដើម កាណូត ១១១ គ្រឿង និងម៉ាស៊ីន (សម្រាប់អូសទាញសាច់អួននិងម៉ាញ់) ៤៨ គ្រឿង។
លោកបញ្ជាក់ថា៖ «ទន្ទឹមនឹងនេះ សមត្ថកិច្ចយើងបានបង្ក្រាបចាប់ជនសង្ស័យក្នុងបទល្មើសជាក់ស្ដែងចំនួន ៥៨ នាក់បញ្ជូនទៅតុលាការ។ ក្នុងនោះជនសង្ស័យ ២៦ នាក់ត្រូវបានតុលាការសម្រេច ឃុំខ្លួន ដោយផ្ដន្ទាទោសដាក់ពន្ធនាគារក្នុងម្នាក់ៗពី ១ ឆ្នាំទៅ ៣ ឆ្នាំ ដោយចោទប្រកាន់តាមប្បញ្ញត្តិមាត្រា ៨៩ នៃច្បាប់ជលផល»។
បើតាមលោកអ៊ឹង ទ្រី ខេត្តពោធិ៍សាត់ ត្រូវបានគេកត់សម្គាល់ ឃើញមានភាពសកម្ម ក្នុងការចុះ បង្ក្រាបបទល្មើសនេសាទបានច្រើនជាងគេ ចាប់តាំងពីមានបទបញ្ជារបស់លោកនាយករដ្ឋមន្ត្រីហ៊ុន សែន កាលពីថ្ងៃទី ២៣ ខែមីនា ឆ្នាំ ២០២២។ គិតត្រឹមដំណាច់ខែតុលា ឆ្នាំ ២០២២ បានបង្ក្រាបចាប់រឹបអូសវត្ថុតាងឧបករណ៍នេសាទល្មើសច្បាប់ រួមមាន ឧបករណ៍ឆក់ត្រជាក់ និងក្តៅ ៥២៦ គ្រឿង របាំងស្បៃមុង និងសាច់អួនសរុប ៨៤ ០២៧ ម៉ែត្រ លូនិងលប សរុប ១ ៦៣៥ មាត់ បង្គោលចម្រឹង ៥៥ ៤១៨ ដើម កាណូត ៥ គ្រឿង និងចាប់បញ្ជូនជនសង្ស័យទៅតុលាការ ចំនួន ២០ នាក់ ក្នុងនោះ ១៤ នាក់ត្រូវបានតុលាការសម្រេចផ្ដន្ទាទោសដាក់ពន្ធនាគារ។
បន្ទាប់មក គឺខេត្តសៀមរាប ដែលបានបង្ក្រាបរឹបអូសវត្ថុតាង ឧបករណ៍នេសាទល្មើសច្បាប់ ដូចជា អួនអូសទឹកសាប ២៧ វង់ ម៉ាញ់ ១២ វង់ ឆក់ត្រជាក់ និងក្តៅ ៨០ គ្រឿង ឈិបយន្ត ១៧ គ្រឿង អួនហ៊ុម ៨ វង់ របាំងស្បៃមុង និងសាច់អួន សរុប ១៣៣ ៤៥៦ ម៉ែត្រ លូ និងលប ៤៧២ មាត់ បង្គោលចម្រឹង ៦៨ ៥៣៧ ដើម កាណូត ៥៣ គ្រឿង ម៉ាស៊ីនសម្រាប់អូសយាំងកាវ ២០ គ្រឿង និងចាប់បញ្ជូន ជនសង្ស័យទៅតុលាការ ២៣ នាក់ ក្នុងនោះ ៦ នាក់ត្រូវបានតុលាការផ្ដន្ទាទោសដាក់ពន្ធនាគារ។
ចំណែកខេត្តកំពង់ឆ្នាំង និងខេត្តកំពង់ធំ ក៏មានភាពសកម្មផងដែរ ដោយគិតត្រឹមថ្ងៃទី ២៦ ខែតុលា ឆ្នាំ ២០២២ ដូចគ្នា ខេត្តកំពង់ឆ្នាំង បានបង្ក្រាបរឹបអូស វត្ថុតាង ឧបករណ៍នេសាទល្មើស ឆក់ត្រជាក់ និងក្តៅ ៥២៦ គ្រឿង របាំងស្បៃមុងនិងសាច់អួនសរុប ៨៤ ០២៧ ម៉ែត្រ លូ និងលប ១ ៦៣៥ មាត់ បង្គោលចម្រឹងចំនួន ៥៥ ៤១៨ ដើម កាណូត ៥ គ្រឿង និងចាប់បញ្ជូនជនសង្ស័យទៅតុលាការ ១០ នាក់ ក្នុងនោះ ៤ នាក់ ត្រូវបានតុលាការសម្រេចផ្ដន្ទាទោសដាក់ពន្ធនាគារ។
ខេត្តកំពង់ធំ បានបង្ក្រាបរឹបអូស វត្ថុតាងល្មើសច្បាប់ ដូចជា អួនអូសទឹកសាប ១ វង់ ម៉ាញ់ ១ វង់ ឆក់ត្រជាក់ និងក្តៅ ១៥ គ្រឿង អួនហ៊ុម ៣ វង់ របាំងស្បៃមុង និងសាច់អួន ១៧៥ ៩៧១ ម៉ែត្រ លូនិងលប ៣ ០៧៨ មាត់ បង្គោលចម្រឹងជិត ១៥ ម៉ឺនដើម កាណូត ៣៤ គ្រឿង ម៉ាស៊ីន ១៩ គ្រឿង និងចាប់បញ្ជូនជនសង្ស័យ ៥ នាក់ទៅតុលាការ ក្នុងនោះ ៣ នាក់ត្រូវបានតុលាការសម្រេចឃុំខ្លួនក្នុងពន្ធនាគារ។
ដោយឡែកខេត្តបាត់ដំបង និងខេត្តបន្ទាយមានជ័យ ត្រូវបានគេកត់សម្គាល់ថា ពុំសូវមានបទល្មើសនេសាទកើតមានជាដុំកំភួន ទេ ដោយសារមានការចូលរួម យ៉ាងផុសផុលពីអាជ្ញាធរ និងប្រជាសហគមន៍មូលដ្ឋាន ក្នុងការរាយការណ៍និងបង្ក្រាបដោយផ្ទាល់។ ទោះជាយ៉ាងណា ក្នុងរយៈពេល ១០ ខែ នៃឆ្នាំ ២០២២ នេះ នៅខេត្តបាត់ដំបង មានការបង្ក្រាបចាប់រឹបអូសវត្ថុតាងនៃបទល្មើសនេសាទ រួមមាន ម៉ាញ់ចំនួន ១ វង់ ឧបករណ៍ឆក់ក្តៅ និងត្រជាក់ ៦៧៥ គ្រឿង របាំងសាច់អួន និងស្បៃមុង ៧០ ៤៩០ ម៉ែត្រ លូ និងលប ១០៣ មាត់ បង្គោលចម្រឹង ៣២ ៣០០ ដើម កាណូត ២ គ្រឿង និងម៉ាស៊ីនសម្រាប់អូសយ៉ាំងកាវ ២ គ្រឿង។ នៅខេត្តបន្ទាយមានជ័យ បានបង្ក្រាបរឹបអូសវត្ថុតាងនៃបទល្មើស ដូចជាឧបករណ៍ឆក់ ៤ គ្រឿង របាំងស្បៃមុងនិងសាច់អួន ១៤០០ ម៉ែត្រ លូនិងលប ១៤៨ មាត់ និងបង្គោលចម្រឹង ៤៥៩ ដើម។
លោកជួង សុភា នាយខណ្ឌជលផលខេត្តបាត់ដំបង និយាយថា បើទោះជាមានការបង្ក្រាបយ៉ាងតឹងរ៉ឹង និងជាប់ជាប្រចាំក្ដី បទល្មើសនេសាទ នៅតែកើតមាន ជាអន្លើ ដែលទាមទារឱ្យមានការចូលរួមទប់ស្កាត់បទល្មើសនេះ ពីគ្រប់ភាគីពាក់ព័ន្ធ ពិសេសពីអាជ្ញាធរ និងប្រជាសហគមន៍ក្នុងមូលដ្ឋានដោយផ្ទាល់។
លោកបញ្ជាក់ថា៖ «បើគ្មានការចូលរួមផ្ដល់សេចក្ដីរាយការណ៍ អំពីសកម្មភាព នៃជនប្រព្រឹត្តបទល្មើស ក៏ដូចជាទីតាំង ដែលមានកើតបទល្មើសពីអាជ្ញាធរ និងប្រជាពលរដ្ឋក្នុងមូលដ្ឋានទាន់ពេលវេលានោះទេ សមត្ថកិច្ចជំនាញយើងក៏មិនអាចកំណត់មុខសញ្ញា និងចុះបង្ក្រាបបទល្មើស បានដោយជោគជ័យឡើយ។ បើបទល្មើសជលផលកើតមានកាន់តែច្រើន ធនធានមច្ឆជាតិរបស់យើងក៏នឹងត្រូវបាត់បង់ផងដែរ»។
បើតាមលោកជួង សុភា រដូវកាលត្រីប្រហុក អាចនឹងមកដល់ក្នុងដើមខែធ្នូខាងមុខនេះ បើពុំមាន ការប្រែប្រួលអាកាសធាតុ៕