ភ្នំពេញៈ កម្ពុជាដែលកំពុងធ្វើជាប្រធានអាស៊ានបានសម្រេចសមិទ្ធផលត្រួសត្រាយផ្លូវឱ្យប្រទេសចំនួន ៧ ទៀតចូលជាដៃគូសន្ទនា និងសហប្រតិបត្តិការ ដើម្បីការរីកចម្រើនរួមគ្នា។ យោងតាមលោក គង់ ភោគ អ្នកនាំពាក្យនៃកិច្ចប្រជុំកំពូលអាស៊ាន ថ្លែងនៅក្នុងសន្និសីទកាសែតនៅថ្ងៃទី ១០ ខែវិច្ឆិកា។
លោកបានថ្លែងថា៖ «កម្ពុជារីករាយដែលអាចនាំឱ្យអាស៊ានពង្រីកកិច្ចសន្ទនាជាមួយបណ្ដាប្រទេសនានានៅលើសកលលោក។ និយាយទៅយើងគួរតែមានមោទនភាពដែរ ដែលកម្ពុជាសម្រេចបានកិច្ចការដ៏មានសារៈសំខាន់នេះ (ការពង្រីកសមាជិកសន្ធិសញ្ញាមិត្តភាព TAC)»។
ប្រទេសទាំង ៧ ដែលក្លាយជាដៃគូសន្ទនាថ្មីជាមួយអាស៊ាននោះរួមមាន ព្រះរាជាណាចក្រ-ដាណឺម៉ាក សាធារណរដ្ឋក្រិក ព្រះរាជាណាចក្រហូឡង់ ប្រទេសអូម៉ង់ រដ្ឋកាតា និងអារ៉ាប់រួមអេមីរ៉ាត់ អេស្ប៉ាញ និងអ៊ុយក្រែន។ ប្រទេសទាំង ៧ នេះ ចូលជាដៃគូសន្ទនាជាមួយអាស៊ាន តាមរយៈការចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍ (TAC) ដែលមានសមាជិកជាង ៥០ ប្រទេសរួចទៅហើយនោះ។
លោក គង់ ភោគ បានថ្លែងថា៖ «(អាស៊ាន) យើងបើកទ្វារទទួលទាំងអស់ ចំពោះប្រទេសណា ដែលចង់សហការក៏ដូចជាចង់មកតំបន់ ដើម្បីកសាងទំនាក់ទំនង ឬមួយក៏ស្វែងរកឱកាសរីកចម្រើនរួមគ្នា។ ខ្ញុំគិតថា នេះជាចំណុចខ្លាំងរបស់យើង ដែលធ្វើឱ្យអាស៊ានក្លាយជាទីប្រជុំទម្ងន់ នៅក្នុងការរីកចម្រើននៅក្នុងសកលលោកបច្ចុប្បន្ន»។
សន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ហៅកាត់ថា TAC ត្រូវបានបង្កើតឡើងក្នុងឆ្នាំ ១៩៧៦ និងបង្កប់នូវគោលការណ៍ជាសកលនៃការរួមរស់ដោយសន្តិភាព និងកិច្ចសហប្រតិបត្តិការមិត្តភាពក្នុងចំណោមរដ្ឋនៅក្នុងតំបន់អាស៊ីអាគ្នេយ៍។ ជំហានដំបូង នៅពេលខាងមុខរដ្ឋទាំងនោះ អាចក្លាយជាដៃគូសន្ទនាតាមវិស័យរបស់អាស៊ាន និងរហូតដល់ក្លាយជាដៃគូយុទ្ធសាស្ត្រគ្រប់ជ្រុងជ្រោយជាមួយអាស៊ាន។
នៅថ្ងៃទី ១០ ខែវិច្ឆិកា រដ្ឋមន្ត្រីការបរទេស និងអគ្គលេខាធិការអាស៊ានបានធ្វើជាសាក្សីក្នុងការចុះហត្ថលេខាលើលិខិតុបករណ៍នៃការចូលជាសមាជិក TAC ដោយអ៊ុយក្រែន និងអេស្ប៉ាញ។ ខណៈដែលសមាជិក ៥ ផ្សេងទៀតបានចូលជាសមាជិកផ្លូវការរបស់ TAC តាំងពីកិច្ចប្រជុំរដ្ឋមន្ត្រីការបរទេសអាស៊ាននៅភ្នំពេញកាលពីខែកក្កដា ឆ្នាំ ២០២២៕