ភ្នំពេញៈ លោកនាយករដ្ឋមន្ត្រី ហ៊ុន សែន អំពាវនាវឱ្យហ្វីលីពីននាំចូលអង្ករ និងផលិតផលកសិកម្មផ្សេងៗទៀតពីកម្ពុជាឱ្យបានកាន់តែច្រើន និងជំរុញឱ្យហ្វីលីពីនវិនិយោគលើរោងម៉ាស៊ីនកិនស្រូវសម្រាប់ការនាំចេញទៅកាន់ប្រទេសហ្វីលីពីន។
នាថ្ងៃទី ១០ ខែវិច្ឆិកា លោក ហ៊ុន សែន បានជួបជាមួយលោក Ferdinand Romualdez Marcos Jr. ប្រធានាធិបតីហ្វីលីពីន ក្នុងឱកាសលោកមកចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ នៅរាជធានីភ្នំពេញ។
សេចក្តីប្រកាសព័ត៌មានក្រសួងការបរទេសកម្ពុជាបញ្ជាក់ក្រោយជំនួបនេះថា មេដឹកនាំទាំង ២ បានសម្តែងការពេញចិត្តចំពោះការវិវត្តនៃទំនាក់ទំនង និងកិច្ចសហប្រតិបត្តិការទ្វេភាគី ចាប់តាំងពីការបង្កើតទំនាក់ទំនងការទូត ក្នុងរយៈពេល ៦៥ ឆ្នាំ កន្លងមកនេះ។
ប្រភពដដែលបន្តថា លោក ហ៊ុន សែន និងលោក Marcos បានពិភាក្សាអំពីវិធានការដើម្បីពង្រីកបន្ថែមទៀតនូវកិច្ចសហប្រតិបត្តិការទ្វេភាគី ជាពិសេសលើវិស័យការពារជាតិ ពាណិជ្ជកម្ម ការវិនិយោគ ទេសចរណ៍ និងទំនាក់ទំនងរវាងប្រជាជននិងប្រជាជន។
មេដឹកនាំទាំង ២ បានលើកទឹកចិត្តឱ្យក្រសួង និងស្ថាប័នពាក់ព័ន្ធនៃប្រទេសទាំង ២ អនុវត្តឱ្យបានពេញលេញ និងមានប្រសិទ្ធភាពនូវឯកសារនានាដែលបានចុះហត្ថលេខារួច។ មេដឹកនាំទាំង ២ បានសម្ដែងការរីករាយចំពោះការកើនឡើងវិញនូវការផ្លាស់ប្តូរពាណិជ្ជកម្មទ្វេភាគី បន្ទាប់ពីវិបត្តិនៃជំងឺរាតត្បាតកូវីដ ១៩ ដោយចាំបាច់ត្រូវជំរុញភាពជាដៃគូនៃវិស័យរដ្ឋ និងឯកជន ទំហំពាណិជ្ជកម្ម និងការវិនិយោគទ្វេភាគីបន្ថែមទៀត។
សេចក្តីប្រកាសព័ត៌មានបញ្ជាក់ថា៖ «សម្ដេចតេជោនាយករដ្ឋមន្ត្រី បានអំពាវនាវឱ្យហ្វីលីពីននាំចូលអង្ករ និងផលិតផលកសិកម្មផ្សេងៗទៀតពីកម្ពុជាឱ្យបានកាន់តែច្រើន ជាពិសេសបានជំរុញឱ្យហ្វីលីពីនវិនិយោគលើវិស័យកសិកម្មរបស់កម្ពុជា ដូចជាក្នុងដំណើរការរោងម៉ាស៊ីនកិនស្រូវសម្រាប់ការនាំចេញទៅកាន់ប្រទេសហ្វីលីពីន ដើម្បីបំពេញតម្រូវការរបស់ប្រទេសនេះ»៕