ភ្នំពេញៈ ប្រមុខការទូតកម្ពុជា-អ៊ុយក្រែន បានមើលឃើញពីកំណើននៃទំនាក់ទំនងជាមិត្តភាពរវាងប្រទេសទាំង ២ ក្រោយពីមានជំនួបកម្រិតខ្ពស់សំខាន់ៗនាពេលថ្មីៗនេះ។
នាថ្ងៃទី ១០ ខែវិច្ឆិកា លោក ប្រាក់ សុខុន រដ្ឋមន្ត្រីការបរទេសកម្ពុជា បានជួបជាមួយលោក ឌីមីត្រូ គូលេបា (Dmytro Kuleba) រដ្ឋមន្ត្រីការបរទេសអ៊ុយក្រែនក្នុងឱកាសលោកមកចូលរួមកិច្ចប្រជុំកំពូលអាស៊ាន លើកទី ៤០ និង ៤១ និងកិច្ចប្រជុំកំពូលពាក់ព័ន្ធ នៅរាជធានីភ្នំពេញ។
សេចក្តីប្រកាសព័ត៌មានក្រសួងការបរទេសកម្ពុជាបញ្ជាក់ក្រោយជំនួបនេះថា៖ «ឯកឧត្ដមរដ្ឋមន្ត្រីទាំង ២ បានកត់សម្គាល់អំពីកំណើននៃទំនាក់ទំនងជាមិត្តភាពកម្ពុជា-អ៊ុយក្រែន ដែលបានឆ្លុះបញ្ចាំងតាមរយៈជំនួបកម្រិតខ្ពស់សំខាន់ៗនាពេលថ្មីៗនេះ ការឯកភាពគ្នាលើការតែងតាំងនិងផ្លាស់ប្តូរឯកអគ្គរាជ/រដ្ឋទូតទៅវិញទៅមកក្នុងពេលឆាប់ៗ និងការព្រមព្រៀងក្នុងការបង្កើតឱ្យមានកិច្ចពិគ្រោះយោបល់ទ្វេភាគីរវាងក្រសួងការបរទេសទាំង ២ »។
លោក ប្រាក់ សុខុន បានអបអរសាទរអ៊ុយក្រែន ដែលបានចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍ (TAC) នាថ្ងៃទី ១០ ខែវិច្ឆិកា ក្នុងអំឡុងពេលនៃកិច្ចប្រជុំកំពូលអាស៊ាននេះ។
លោកលើកឡើងថា ជំនួបតាមទូរស័ព្ទនាពេលថ្មីៗនេះរវាងលោកនាយករដ្ឋមន្ត្រ ហ៊ុន សែន និងលោក វ៉ូឡូឌីមៀ ហ្សេលឡិនស្គី ប្រធានាធិបតីអ៊ុយក្រែន កាលពីថ្ងៃទី ១ ខែវិច្ឆិកា គឺទទួលបានលទ្ធផលផ្លែផ្កា។
លោក ប្រាក់ សុខុន បានបញ្ជាក់ជាថ្មីនូវជំហរជាគោលការណ៍របស់កម្ពុជាចំពោះសង្គ្រាមនៅអ៊ុយក្រែន និងសង្ឃឹមថា ដំណោះស្រាយដោយសន្តិភាពដើម្បីបញ្ចប់សង្គ្រាមនេះ នឹងអាចកើតមានក្នុងពេលឆាប់ៗ ដើម្បីអ៊ុក្រែនទទួលបានសន្តិភាព និងស្ថិរភាព និងការអភិវឌ្ឍ។
ប្រមុខការទូតកម្ពុជារូបនេះក៏បានបញ្ជាក់ពីការត្រៀមខ្លួនរបស់កម្ពុជាក្នុងការបណ្តុះបណ្តាលអ្នកដោះមីនអ៊ុយក្រែន ដោយសហការជាមួយប្រទេសជប៉ុនផងដែរ។
បើតាមសេចក្តីប្រកាសព័ត៌មាន លោក ឌីមីត្រូ គូលេបា បានអបអរសាទរលោក ប្រាក់ សុខុន ចំពោះភាពជោគជ័យរបស់កម្ពុជាក្នុងនាមជាប្រធានអាស៊ាន និងជូនពរកម្ពុជាទទួលជោគជ័យក្នុងការរៀបចំកិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំកំពូលពាក់ព័ន្ធ។
ប្រភពដដែលបន្តថា លោក ឌីមីត្រូ គូលេបា បានអរគុណកម្ពុជាចំពោះការប្រកាន់យកជំហរប្រកបដោយគោលការណ៍ចំពោះសង្គ្រាមនៅអ៊ុយក្រែន ភាពសប្បុរសក្នុងការជួយអ្នកដោះមីនរបស់អ៊ុយក្រែន និងកិច្ចខិតខំប្រឹងប្រែងរបស់កម្ពុជាដែលអាចធ្វើឱ្យអ៊ុយក្រែនចូលជាសមាជិកសន្ធិសញ្ញា TAC៕