ភ្នំពេញៈ ប្រមុខដឹកនាំអាស៊ានបានអនុញ្ញាតជាគោលការណ៍ឱ្យប្រទេសទីម័រខាងកើតចូលរួមជាសមាជិកអាស៊ានទី ១១ ប៉ុន្តែមិនទាន់ចូលជាសមាជិកពេញសិទ្ធិនោះទេ ក្រោយពីថ្នាក់ដឹកនាំអាស៊ានបានជួបប្រជុំគ្នានៅទីក្រុងភ្នំពេញនាថ្ងៃទី ១១ ខែវិច្ឆិកា នាឱកាសកិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំកំពូលពាក់ព័ន្ធ។
សេចក្តីថ្លែងការណ៍របស់ថ្នាក់ដឹកនាំអាស៊ានបញ្ជាក់ថា ការឯកភាពនេះធ្វើឡើងបន្ទាប់ពីថ្នាក់ដឹកនាំអាស៊ានបានពិចារណាលើលទ្ធផលនៃបេសកកម្មស្វែងរកការពិតរបស់សសរស្តម្ភសហគមន៍សន្តិសុខនយោបាយអាស៊ាន សហគមន៍សេដ្ឋកិច្ចអាស៊ាន និងសហគមន៍សង្គម-វប្បធម៌អាស៊ាន។
សេចក្តីថ្លែងការណ៍បញ្ជាក់ថា៖ «ជាគោលការណ៍ ទីម័រឡេស្តេត្រូវបានអនុញ្ញាតឱ្យចូលរួមជាសមាជិកអាស៊ានទី ១១»។
ទីម័រខាងកើតត្រូវបានផ្តល់ឋានៈជាប្រទេសសង្កេតការណ៍ និងត្រូវបានអនុញ្ញាតឱ្យទីម័រឡេស្តេចូលរួមក្នុងកិច្ចប្រជុំអាស៊ានទាំងអស់រួមបញ្ចូលទាំងសម័យប្រជុំពេញអង្គនៃកិច្ចប្រជុំកំពូលអាស៊ាន។
ប្រមុខដឹកនាំអាស៊ានឯកភាពគ្នា «បង្កើតជាផែនទីបង្ហាញផ្លូវផ្អែកលើលក្ខណៈវិនិច្ឆ័យអព្យាក្រឹត្យ សម្រាប់ការចូលជាសមាជិកពេញសិទ្ធិរបស់ទីម័រឡេស្តេ រួមទាំងផ្អែកលើសមិទ្ធផលសំខាន់នានា ដែលកំណត់ដោយរបាយការណ៍នៃបេសកកម្មស្វែងរកការពិតទាំង ៣ សសរស្តម្ភរបស់អាស៊ាន»។
ក្រុមប្រឹក្សាសម្របសម្រួលអាស៊ានត្រូវបានប្រគល់ភារកិច្ចក្នុងការបង្កើតផែនទីបង្ហាញផ្លូវនេះ ហើយត្រូវដាក់ជូនថ្នាក់ដឹកនាំអាស៊ានទាំងអស់អនុម័ត ក្នុងឱកាសកិច្ចប្រជុំកំពូលអាស៊ានលើកទី ៤២ ។
សេចក្តីថ្លែងការណ៍បន្តថា ប្រទេសសមាជិកអាស៊ានទាំងអស់ និងដៃគូខាងក្រៅត្រូវផ្តល់ការគាំទ្រដោយពេញលេញចំពោះទីម័រខាងកើត ក្នុងការឈានទៅសម្រេចបាននូវសមិទ្ធផលដែលបានកំណត់ទាំងនោះ តាមរយៈការកសាងសមត្ថភាព និងផ្តល់ការគាំទ្រចាំបាច់នានាផ្សេងទៀត សម្រាប់ការចូលជាសមាជិកអាស៊ានពេញសិទ្ធិរបស់ទីម័រឡេស្តេ៕