ភ្នំពេញៈ កម្ពុជា និងចិន ឯកភាពពង្រឹងបន្ថែមទៀតនូវកិច្ចសហប្រតិបត្តិការមេគង្គ-ឡានឆាង និងកិច្ចសហប្រតិបត្តិការអាស៊ាន-ចិន ដើម្បីជំរុញការអភិវឌ្ឍសហគមន៍វាសនារួមមេគង្គ-ឡានឆាង និងភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-ចិនឱ្យកាន់តែជិតស្និទ្ធ។
រដ្ឋាភិបាលកម្ពុជា និងរដ្ឋាភិបាលចិនបានចេញសេចក្ដីប្រកាសរួមនាថ្ងៃទី ១១ ខែវិច្ឆិកា ដែលជាថ្ងៃបិទបញ្ចប់ដំណើរទស្សនកិច្ចរបស់លោក លី កេឈាង នាយករដ្ឋមន្ត្រីចិននៅរយៈពេល ៤ ថ្ងៃនៅកម្ពុជា។
សេចក្ដីប្រកាសរួមបញ្ជាក់ថា៖ «ភាគីទាំង ២ បានឯកភាពពង្រឹងបន្ថែមទៀតនូវកិច្ចសម្របសម្រួល និងកិច្ចសហប្រតិបត្តិការលើក្របខ័ណ្ឌពហុភាគី រួមមាន កិច្ចសហប្រតិបត្តិការមេគង្គ-ឡានឆាង និងកិច្ចសហប្រតិបត្តិការអាស៊ាន-ចិន រួមគ្នាជំរុញការអភិវឌ្ឍសហគមន៍វាសនារួមមេគង្គ-ឡានឆាង និងភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-ចិនឱ្យកាន់តែជិតស្និទ្ធ ដែលមានអត្ថន័យ ខ្លឹមសារ និងផលប្រយោជន៍ទៅវិញទៅមក»។
ចិនបានគាំទ្រកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានពាក់ព័ន្ធ និងបានកោតសរសើរកម្ពុជាថា បានដើរតួនាទីដ៏សកម្ម ក្នុងការលើកកម្ពស់ការអភិវឌ្ឍប្រកបដោយចីរភាព និងស្ថិរភាពយូរអង្វែងនៅក្នុងតំបន់ ខណៈកម្ពុជាបានអរគុណចិនក្នុងការធ្វើជាដៃគូដ៏រឹងមាំរបស់កម្ពុជា និងការគាំទ្រឥតងាករេចំពោះព្រឹត្តិការណ៍ដែលកម្ពុជាធ្វើជាម្ចាស់ផ្ទះ។
ភាគីទាំង ២ ជឿជាក់ថា ដោយសារកិច្ចប្រឹងប្រែងរួមគ្នានៃប្រទេសសមាជិកអាស៊ាន និងចិន ស្ថានភាពសមុទ្រចិនខាងត្បូងបានរក្សានូវស្ថិរភាពជារួម។ ភាគីទាំង ២ បានបញ្ជាក់ថា «សេចក្តីប្រកាសស្តីពីការប្រតិបត្តិរបស់បណ្តាភាគីនៅសមុទ្រចិនខាងត្បូង» បានដើរតួនាទីយ៉ាងសំខាន់ក្នុងការរក្សាសន្តិភាព និងស្ថិរភាពនៅសមុទ្រចិនខាងត្បូងអស់រយៈពេលជាង ២០ ឆ្នាំមក។
ភាគីទាំង ២ អំពាវនាវដល់ភាគីពាក់ព័ន្ធបន្តអនុវត្តឱ្យបានពេញលេញ និងប្រសិទ្ធភាពធ្វើឱ្យកាន់តែស៊ីជម្រៅនូវកិច្ចសហប្រតិបត្តិការផ្លូវសមុទ្រជាក់ស្តែង និងឈានទៅសម្រេចនូវក្រមប្រតិបត្តិសមុទ្រចិនខាងត្បូងឱ្យបានឆាប់ ដោយឈរលើមូលដ្ឋានឯកច្ឆន្ទទៅវិញទៅមក ដើម្បីកសាងសមុទ្រចិនខាងត្បូងទៅជាសមុទ្រសន្តិភាព មិត្តភាព និងកិច្ចសហប្រតិបត្តិការ៕