ភ្នំពេញៈ ប្រមុខដឹកនាំអាស៊ានទទូចឱ្យគ្រប់ភាគីពាក់ព័ន្ធរបស់មីយ៉ាន់ម៉ាទាំងអស់បន្ធូរបន្ថយភាពតានតឹង ដោយអះអាងថាស្ថានការណ៍នៅមីយ៉ាន់ម៉ា នៅតែធ្ងន់ធ្ងរជាមួយនឹងការកើនឡើងនៃអំពើហិង្សា។
ប្រមុខដឹកនាំអាស៊ានបានពិចារណាថា ស្ថានការណ៍នៅមីយ៉ាន់ម៉ានៅតែមានភាពផុយស្រួយជាមួយនឹងការកើនឡើងនៃអំពើហិង្សា ដែលជាកង្វល់ចម្បងប៉ះពាល់មិនត្រឹមតែមីយ៉ាន់ម៉ាប៉ុណ្ណោះទេ ថែមទាំងដល់កិច្ចខិតខំប្រឹងប្រែងកសាងសហគមន៍អាស៊ានផងដែរនោះ។
សេចក្តីសម្រេចរបស់ប្រមុខដឹកនាំអាស៊ានដែលបានអនុម័តកាលពីថ្ងៃទី ១០ ខែវិច្ឆិកា ក្នុងឱកាសនៃកិច្ចប្រជុំកំពូលអាស៊ាននៅរាជធានីភ្នំពេញ បញ្ជាក់ថា អាស៊ានប្តេជ្ញាចិត្តជួយមីយ៉ាន់ម៉ាក្នុងការស្វែងរកដំណោះស្រាយដោយសន្តិវិធី និងយូរអង្វែងសម្រាប់វិបត្តិបច្ចុប្បន្ន។
សេចក្តីសម្រេចនេះលើកឡើងថា ជាមួយនឹងភាពជឿនលឿនតិចតួច ដែលសម្រេចបានក្នុងការអនុវត្តកិច្ចព្រមព្រៀងជាឯកច្ឆន្ទ (កង់សង់ស៊ីស) ៥ ចំណុចរបស់អាស៊ាន កងទ័ពជាតិមីយ៉ាន់ម៉ាមានតួនាទីក្នុងការអនុវត្តតាមការប្តេជ្ញាចិត្តចំពោះថ្នាក់ដឹកនាំអាស៊ាន។
សេចក្តីសម្រេចនេះបន្តថា៖ «ទទូចឱ្យគ្រប់ភាគីពាក់ព័ន្ធទាំងអស់បន្ធូរបន្ថយភាពតានតឹង និងអត់ធ្មត់ជាអតិបរមា ហើយគ្រប់ភាគីពាក់ព័ន្ធទាំងអស់ ដែលកាន់អាវុធ គួរតែទទួលខុសត្រូវដោយតម្លាភាព និងត្រូវបានថ្កោលទោសចំពោះអំពើហិង្សា ដោយកត់សម្គាល់ថា កងកម្លាំងប្រដាប់អាវុធមីយ៉ាន់ម៉ា គឺជាកម្លាំងយោធាដ៏ធំបំផុតតែមួយគត់នៅក្នុងមីយ៉ាន់ម៉ា»។
ប្រមុខដឹកនាំអាស៊ានអំពាវនាវដល់ភាគីទាំងអស់នៅមីយ៉ាន់ម៉ា ឱ្យសម្របសម្រួលដល់ការងាររបស់អគ្គលេខាធិការអាស៊ាន និងមជ្ឈមណ្ឌលសម្របសម្រួលអាស៊ានសម្រាប់ជំនួយមនុស្សធម៌ និងគ្រោះមហន្តរាយ (មជ្ឈមណ្ឌល AHA) ក្នុងការផ្តល់ជំនួយមនុស្សធម៌នៅមីយ៉ាន់ម៉ា ដល់ប្រជាជនទាំងអស់ ដែលកំពុងខ្វះខាត ដោយមិនមានការរើសអើង។
ប្រមុខដឹកនាំអាស៊ានបន្តលើកឡើងថា អគ្គលេខាធិការអាស៊ាន និងមជ្ឈមណ្ឌល AHA គួរតែត្រូវបានផ្តល់សិទ្ធិអំណាច ដោយទទួលបានស្វ័យភាពសមស្រប ដើម្បីសម្របសម្រួលដល់ការផ្តល់ជំនួយមនុស្សធម៌នៅមីយ៉ាន់ម៉ា។
ប្រមុខដឹកនាំអាស៊ានអះអាងថា អាស៊ាននឹងអំពាវនាវឱ្យអង្គការសហប្រជាជាតិ និងដៃគូខាងក្រៅរបស់ខ្លួន ឱ្យជួយគាំទ្រខ្លួននៅក្នុងកិច្ចខិតខំប្រឹងប្រែងរបស់អង្គការតំបន់មួយនេះក្នុងការអនុវត្តកង់សង់ស៊ីស៥ចំណុចនេះ ដោយអាស៊ានត្រូវពិចារណារិះរកវិធីសាស្ត្រផ្សេងទៀតដែលអាចគាំទ្រដល់ការអនុវត្តកង់សង់ស៊ីសនេះ៕