ភ្នំពេញៈ ប្រធានាធិបតីចិន លោក ស៊ី ជីនពីង បានដាក់សំណើ ៥ ចំណុចទៅកាន់អាស៊ាន ដើម្បីពង្រឹងទំនាក់ទំនងអាស៊ាន-ចិន ដោយក្នុងនោះចិនសន្យាផ្តល់ទឹកប្រាក់ ១,៥ ប៊ីលានដុល្លារអាមេរិក សម្រាប់គម្រោងវិនិយោគសម្រាប់ការអភិវឌ្ឍរយៈពេល ៣ ឆ្នាំ។
ការដាក់សំណើទាំង ៥ នេះធ្វើឡើងក្នុងកិច្ចប្រជុំកំពូលអាស៊ាន-ចិន លើកទី ២៥ នាថ្ងៃទី ១១ ខែវិច្ឆិកា ដោយមានវត្តមានលោក លី កេឈាង នាយករដ្ឋមន្ត្រីចិន នៅរាជធានីភ្នំពេញ។ នេះបើយោងតាមហ្វេសប៊ុក លោក នាយករដ្ឋមន្ត្រី ហ៊ុន សែន ក្រោយកិច្ចប្រជុំ។
សំណើទី ១ គឺការកសាងផ្ទះដែលប្រកបដោយសន្តិភាពជាមួយគ្នា ខណៈដែលចិនត្រៀមជាស្រេចក្នុងការធ្វើឱ្យស៊ីជម្រៅកិច្ចសហប្រតិបត្តិការនៅក្នុងវិស័យការពារជាតិ ឧក្រិដ្ឋកម្មឆ្លងដែន និងក្នុងការចុះហត្ថលេខាលើពិធីសារចំពោះសន្ធិសញ្ញាស្តីពីតំបន់អាស៊ីអាគ្នេយ៍គ្មានអាវុធនុយក្លេអ៊ែរ។
សំណើទី ២ កសាងផ្ទះមួយដែលមានសន្តិសុខជាមួយគ្នា ជាមួយការប្តេជ្ញាចិត្តរបស់ចិន ដើម្បីគាំទ្រចំពោះរបាំងការពារសុខភាពអាស៊ាន និងពង្រឹងកិច្ចសហប្រតិបត្តិការប្រកបដោយប្រសិទ្ធភាពស្តីពីការគ្រប់គ្រងគ្រោះមហន្តរាយ។
ចំពោះសំណើទី ៣ ហ្វេសប៊ុកលោក ហ៊ុន សែន បញ្ជាក់ថា៖ «កសាងផ្ទះដែលមានវិបុលភាពជាមួយគ្នា ខណៈចិននឹងផ្តល់គម្រោងវិនិយោគ សម្រាប់ការអភិវឌ្ឍក្នុងទំហំទឹកប្រាក់ ១,៥ ប៊ីលានដុល្លារអាមេរិក សម្រាប់រយៈពេល ៣ ឆ្នាំ និងត្រៀមជាស្រេចក្នុងការធ្វើការជាមួយអាស៊ាន ដើម្បីទាញយកផលប្រយោជន៍ពេញលេញភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP ) និងពីតំបន់ពាណិជ្ជកម្មសេរីអាស៊ាន-ចិនដែលបានកែសម្រួលរួច និងក្នុងការបង្កើនការគាំទ្រដល់ការអភិវឌ្ឍធនធានមនុស្ស»។
សំណើទី ៤ គឺការកសាងផ្ទះដ៏ស្រស់ស្អាតមួយជាមួយគ្នា ដោយផ្តោតកិច្ចសហប្រតិបត្តិការកាន់តែធំទូលាយលើការអភិវឌ្ឍបៃតង និងសេដ្ឋកិច្ចពណ៌ខៀវ នៅក្នុងចំណោមកិច្ចសហប្រតិបត្តិការផ្សេងៗ។
ចំពោះសំណើចុងក្រោយគេគឺការកសាងផ្ទះមួយប្រកបដោយមេត្រីភាពជាមួយគ្នា តាមរយៈការលើកកម្ពស់វិស័យទេសចរណ៍ ការផ្លាស់ប្ដូររវាងប្រជាជន និងប្រជាជន ជាពិសេសក្នុងចំណោមយុវជន និងថ្នាក់ដឹកនាំវ័យក្មេង។
លោក ហ៊ុន សែន បានដឹកនាំកិច្ចប្រជុំនេះ ខណៈលោក លី កេឈាង គឺជាសហប្រធានដឹកនាំកិច្ចប្រជុំ។
កិច្ចប្រជុំនេះមានការយាងចូលរួមពី ព្រះចៅ ស៊ុលតង់ ហាជី ហាសសាណាល់ បុលគីយ៉ាស ព្រះមហាក្សត្រនៃប្រទេសប្រ៊ុយណេ និងមានការចូលរួមពី លោក ចូកូ វីដូដូ ប្រធានាធិបតីឥណ្ឌូនេស៊ី លោក លី ស៊ានឡុង នាយករដ្ឋមន្ត្រីសិង្ហបុរី លោក ប្រាយុធ ចានអូចា នាយករដ្ឋមន្ត្រីថៃ។
ក្រៅពីនេះ ក៏មានការចូលរួមពីលោក ផាម មីងជិញ នាយករដ្ឋមន្ត្រីវៀតណាម លោក ផនខាំ វីផាវ៉ាន់ នាយករដ្ឋមន្ត្រីឡាវ លោក ហ្វេដីណេន ម៉ាកូស ប្រធានាធិបតីហ្វីលីពិន លោក Tan Sri Datuk Azhar Azizan Harun ប្រធានសភាម៉ាឡេស៊ី តំណាងឱ្យនាយករដ្ឋមន្ត្រីម៉ាឡេស៊ី លោក Ismail Sabri Yaakob និងមានការចូលរួមពីលោក លឹម ចុកហ៊យ អគ្គលេខាធិការអាស៊ានផងដែរ។
លោក ហ៊ុន សែន ថ្លែងក្នុងកិច្ចប្រជុំថា ក្រោមការដឹកនាំរបស់បក្សកុម្មុយនីស្តចិនក្នុងរយៈពេល ៧ ទសវត្សរ៍កន្លងទៅនេះ ចិនបានជ្រោងប្រជាជនចិនរាប់រយលាននាក់ឱ្យរួចផុតពីភាពក្រីក្រ និងប្រែក្លាយចិនជាមហាអំណាចសេដ្ឋកិច្ចដ៏ធំទី ២ នៅក្នុងសកលលោក ដោយឈរលើមូលដ្ឋាននៃស្ថិរភាពនយោបាយ និងសន្តិភាពផ្ទៃក្នុងរឹងមាំ។
លោកបន្តថា ការអភិវឌ្ឍប្រកបដោយចីរភាពរបស់ចិនក៏បានរួមវិភាគទានយ៉ាងសំខាន់ក្នុងការលើកកម្ពស់វិបុលភាពរួមក្នុងតំបន់ និងសកលលោកផងដែរ។ ដោយឈរលើគោលការណ៍នៃការគោរពគ្នាទៅវិញទៅមក កិច្ចសហប្រតិបត្តិការឈ្នះឈ្នះ ការជួយគ្នា និងការរៀនសូត្រពីគ្នាទៅវិញទៅមក កិច្ចសហប្រតិបត្តិការអាស៊ាន- ចិនបានរីកចម្រើនជាលំដាប់ជាមួយនឹងលទ្ធផលជាផ្លែផ្កា និងភាពជោគជ័យដ៏រឹងមាំនៅក្នុងរយៈពេល ៣ ទសវត្សរ៍កន្លងទៅ។
លោក ហ៊ុន សែន ថ្លែងថា៖ «ខ្ញុំពិតជាមានសុទិដ្ឋិនិយមចំពោះកិច្ចសហការអាស៊ាន-ចិនដែលបាននិងកំពុងបើកទំព័រថ្មីមួយនៃព្រឹតិ្តការណ៍ជាប្រវត្តិសាស្ត្រក្នុងការពង្រឹងទំនាក់ទំនង និងកិច្ចសហប្រតិបត្តិការរបស់យើងឱ្យកាន់តែមានសក្ដានុពលប្រកបដោយថាមវន្តបន្ថែមទៀត ខណៈដែលអាស៊ានកំពុងខិតខំកសាងសហគមន៍របស់ខ្លួនឱ្យកាន់តែរឹងមាំ»៕