ភ្នំពេញៈ លោក ចូ បៃឌិន (Joe Biden) ប្រធានាធិបតីសហរដ្ឋអាមេរិកបានមកដល់រាជធានីភ្នំពេញហើយ នាព្រឹកថ្ងៃទី ១២ ខែវិច្ឆិកា នេះ ដើម្បីចូលរួមកិច្ចប្រជុំកំពូលអាស៊ាន-អាមេរិក លើកទី ១០ និងកិច្ចប្រជុំកំពូលអាស៊ីបូព៌ា លើកទី ១៧ នៅសណ្ឋាគារសុខា រាជធានីភ្នំពេញ រហូតដល់ថ្ងៃទី ១៣ ខែវិច្ឆិកា។
សេចក្តីថ្លែងការណ៍របស់សេតវិមានកាលពីចុងខែតុលាបានឱ្យដឹងថា លោក Joe Biden នឹងបញ្ជាក់ឡើងវិញនូវការប្តេជ្ញាចិត្តយូរអង្វែងរបស់សហរដ្ឋអាមេរិកចំពោះអាស៊ីអាគ្នេយ៍ និងតំបន់កណ្តាលអាស៊ាន ហើយនឹងសម្លឹងមើលការកសាងភាពជោគជ័យនៃកិច្ចប្រជុំកំពូលពិសេស អាមេរិក-អាស៊ាន ជាប្រវត្តិសាស្ត្រនៅទីក្រុងវ៉ាស៊ីនតោន។
នាព្រឹក ថ្ងៃទី ១២ ខែវិច្ឆិកា នេះ លោកនាយករដ្ឋមន្ត្រី ហ៊ុន សែន បន្តដឹកនាំកិច្ចប្រជុំកំពូលអាស៊ាន និងដៃគូសន្ទនាចំនួន ៦ ព្រមទាំងជួបជាមួយលោក Joe Biden និងនាយករដ្ឋមន្ត្រីជប៉ុន លោក Fumio Kishida៕