.jpg)
នាថ្ងៃទី ១១ ខែវិច្ឆិកា លោកនាយករដ្ឋមន្ត្រី ហ៊ុន សែន បានជួបជាមួយលោក Zhang ក្នុងឱកាសនៃកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនៅទីក្រុងភ្នំពេញ។ រូបភាព AKP News
ភ្នំពេញៈ លោក Zhang Ming អគ្គលេខាធិការនៃអង្គការសហប្រតិបត្តិការសៀងហៃ (SCO) បង្ហាញពីក្តីសង្ឃឹមថា កម្ពុជានឹងក្លាយជាអ្នកសង្កេតការណ៍នៃអង្គការនេះ ខណៈកម្ពុជាបានក្លាយជាដៃគូសន្ទនារបស់អង្គការនេះអស់រយៈពេល ៧ ឆ្នាំមកហើយ។
នាថ្ងៃទី ១១ ខែវិច្ឆិកា លោកនាយករដ្ឋមន្ត្រី ហ៊ុន សែន បានជួបជាមួយលោក Zhang ក្នុងឱកាសនៃកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនៅទីក្រុងភ្នំពេញ។
លោក ហ៊ុន សែន ថ្លែងអំណរគុណដល់លោក Zhang ចំពោះការសម្របសម្រួលរបស់លោកក្នុងការគាំទ្រការដាក់បេក្ខភាពរបស់កម្ពុជាជាអ្នកសង្កេតការណ៍នៃ SCO និងបានបញ្ជាក់ពីការត្រៀមខ្លួនរបស់កម្ពុជាក្នុងការទទួលយកអនុសាសន៍របស់ SCO និងកិច្ចខិតខំប្រឹងប្រែងរបស់កម្ពុជា ដើម្បីសម្រេចបាននូវគោលដៅនេះ។
សេចក្តីប្រកាសព័ត៌មានក្រសួងការបរទេសកម្ពុជាបញ្ជាក់ក្រោយជំនួបថា ភាគីទាំង ២ បានពិភាក្សាគ្នាអំពីការដាក់បេក្ខភាពកម្ពុជា ដើម្បីក្លាយជាអ្នកសង្កេតការណ៍នៃអង្គការ SCO បន្ទាប់ពីបានក្លាយជាដៃគូសន្ទនារបស់អង្គការនេះក្នុងឆ្នាំ ២០១៥ ។
លោក ហ៊ុន សែន ថ្លែងថា ចាប់តាំងពីបានក្លាយជាដៃគូសន្ទនារបស់ SCO ក្នុងឆ្នាំ ២០១៥ កម្ពុជាបានរួមចំណែកក្នុងការជំរុញកិច្ចសហប្រតិបត្តិការរវាងអាស៊ាន និង SCO ហើយថា កម្ពុជាបានចូលរួមយ៉ាងសកម្មនៅក្នុងអង្គការនានាក្នុងតំបន់ និងអន្តរជាតិ ដើម្បីពង្រឹងចំណងមិត្តភាព និងការរក្សាសន្តិភាព ស្ថិរភាព និងសន្តិសុខ។
សេចក្តីប្រកាសព័ត៌មានបញ្ជាក់ថា៖ «ឯកឧត្ដមអគ្គលេខាធិការបានកោតសរសើរកម្ពុជាចំពោះការចូលរួមយ៉ាងសកម្មក្នុងការលើកកម្ពស់ទំនាក់ទំនងរវាងអាស៊ាន និង SCO និងបានលើកឡើងពីដំណើរការផ្ទៃក្នុងរបស់ SCO ក្នុងការដំឡើងឋានៈពីដៃគូសន្ទនាទៅជាអ្នកសង្កេតការណ៍របស់ SCO និងបង្ហាញពីក្តីសង្ឃឹមថាកម្ពុជានឹងក្លាយជាអ្នកសង្កេតការណ៍នៃអង្គការសហប្រតិបត្តិការសៀងហៃ»។
ប្រភពដដែលបន្តថា ភាគីទាំង ២ បានពិភាក្សា និងធ្វើការប្តេជ្ញាចិត្តរួមគ្នាក្នុងការពង្រឹងបន្ថែមទៀតនូវកិច្ចសហប្រតិបត្តិការរវាងអាស៊ាន និង SCO»៕
